Baoh sang ong Đinh Văn Cần saong amuk Đàng Thị Mỹ Trâm daok di palei Hamu Craok, xa Ninh Phuoc, tinh Khanh Hoa daok patui ngak bruk pasarak meng amaik ame caik mai. Urak ini sa-ai kamei Kinh Thị Mộng Ngưng – urang anek di ong Cần saong amuk Trâm daok patui ngak mbeik thaik thaot bingula brei ka kaya.

Sa-ai Ngưng brei thau, dom harei bahrau pasram ngak bruk, ngak hagait tayah tayaic di nan, urak ini ye randap tangin, ngak siam saong jeng urang ngak hu makna paje. Sap sarak pariak jeng biak randap dalam raidiuk yaok harei di baoh sang sa-ai.

"Akaok meti bac bruk ngak, paoh sarak miat bo nyu jeng hagait. Min yaok harei ngak ha sit, kayua bruk ini brei ciuk kham merat ka meng ngak hu. Kan abih lac bruk paoh sarak pabah kambah hala. Amaik adei banah halei jeng ngak hu, dao kame adei ye ngak bruk pagam (ngak jeng kaya). Jeng caong khin anek taco hadei ini hu urang patui veik ngak bruk ini, meyah o ye lahik bruk."

Ong Kinh Văn Cần saong amuk Đàng Thị Mỹ Trâm thun ini langiu di umo 70 thun, dua diuk pasang gam haong gauk yam tapa dom thun bilan daok dam dara pagam haong bruk pasarak pariak. Dom janih kaya ndap nda ngak tabiak lac dom kaya yau ye: kambah hala, hop hala, kacuac hala, salao… Nan lac dom kaya ndap nda hu urang Cam pandar biak rilo dalam harei Kate, Ramawan, dom adat cambat akaok thun atau harei likhah, harei nao puac nao kuhria lakei kumei …

Amuk Đàng Thị Mỹ Trâm brei thau, kaya sit ye piah padang hala paneng, kaya praong ye piah caik baoh kayau, taong abih piah paling ka po, ong muk ong kei,. Bingula di dom kaya ini payua tame nan lac dom kadha atah dalam di urang bangsa Cam.

"Akaok meti ye ame ngak, blaoh pato veik ka dahlak…”

Meng bruk ngak gheih dalam yaok baoh ndap nda kaya pambuak haong angan je dalam bruk ngak nan tuai blei pandar di ong amuk hu di dom tinh yau ye Lam Dong, Dong Nai, Tay Ninh, Ban raya Ho Chi Minh mai blei kaya.

Ong Đàng Chí Quyết, Bi thu Chi mbo palei Hamu Craok, brei thau, di bhum palei urak ini hu dua palei ngak bruk danei angan lac bruk ngak gaok glah lan am Hamu Craok, saong bruk ngak jih dalah palei Caklaing. Daok di palei Hamu Craok daok hu bruk pasarak pariak biak danei angan. Bruk ini jeng hu bhum palei pamaong tal bruk ba tame danak dak bruk ngak piah patagok jirah rivang ngan haong bruk ngak gaok glah lan am.

“Caong khin karja dom pakat, dom gah sangka sarak pato pakai bruk ngak…”

Meyah hu sangka buh jien tame, bruk pasarak pariak di urang Cam brei pahadiuk gam haong bruk ngak ngak gok glah lan am Hamu Craok ngak jeng dom kaya ndap nda jirah rivang gheih karei, nan daok ieu lac bruk halai di drap ar Campa gam haong dom adat cambat di bhum bhaok saong bruk ngak meng tangin di rahra bhap bini, daong ngak jeng angan je jirah rivang ilamo di tinh Khanh Hoa./.