Mentri Pato Megru bahrau ba tabiak harak kuhria ka gah, pato pakai ka bruk trak, kanjah jhak, kan kandah saong harak angan ka gah, ka bruk kan palih ruah min dalam rahra hu hatai caong piah mek panuac ndom meyai. Dalam gah prein yava, rilo gah daok dalam harak angan hu ba tabiak. Njauk caik hatai lac, anek saih, sinh vien tui bac dom gah, bruk ngak trak, kanjah jhak, kan kandah di ilamo meteh pakat, kao ndang daok dalam sarak hu patrun 70% jien bac. Sarak ini peih tabiak kein lagaih patrun naong trak jien padai ka urang bac hu caong khin tui dom gah daok dalam gah prein yava.

Di Mbang nyaom ka 6 (mbang nyaom tui kadha) HĐND TPHCM mbang XI, vaktu 2026-2031, pambuak haong bruk peih taneh dom danak dak hu makna praong saong bruk padang veik labik daok, ong Nguyễn Văn Được, Akok UBND TP.HCM khang hatai: Yaom lac hu daong jien pah sang daok dalam tukvak katut ka urang oh ka hu labik daok, min kayua bruk caong khin hu labik daok ka bhap bini biak ralo yau nan ye piah pabak samar chip, njauk ndem tal bruk padang labik daok. Dom danak dak kinh te tui jalan ngak habar raidiuk mikva hu siam jang urak ini.

Patui Harei Dunya pacang, caga metai diel thun ini, Kapul Metai diel Dunya patui veik ba tabiak asal kadha “Every Minute Counts – Yaok minit jeng hu makna”, ieu bhap bini samar drah duah mboh bruk medil ka metai diel. Yaok thun hu labaih 200.000 urang njauk ruak bahrau saong labaih 167.000 urang metai. Dom urang ilamo pachreih rahra pasang iek prein yava yaok tukvak, pasang iek darah, jalan darah, lamek darah, khik tani tanat jak ba saong klak njuk pakao. Tuk rah tabiak bruk mboh medil ka metai diel, khin brei daong samar chip 115.

UBND tinh Ca Mau mbaoh harak brei buh jien tame ngak mbang 35 ti dong gam ngak ar pacang glut jaleih, khik 2 sang bac di xã Thanh Tùng piah hu lagaih bruk nao mai, bac megru saong bruk diukrai di gru pato, anek saih jeng yau bhap bini. Danak dak padang ngak ar kraong atah labaih 624 met di jalan kraong Nông Trường - barat Bào Dừa jaik kraong Bảo Mũ. Danak dak  jeng rik tame ngak mekre labik jaik nan, paglong bruk ngak lagaih langik salih karei saong patagok kinh te - xa hoi khang kajap di bhum palei.

Meng bilan 6 tal ini, dom kapul Pataom atau talang bol lin daok dalam Bo Tu lenh Ban raya HCM bahrau duah mboh, pataom 862 atau talang bol lin di bein bangu Lê Thị Riêng. Dalam nan, 333 atau talang bol lin hu kaya pagam tui. Daok di harei 29.10 duah mboh saong pataom veik 10 atau talang bol lin. Kuhria di mbang ka 2, meng harei 15 tal abih harei 29.10, dom kapul hu pataom 131 atau talang bol lin di labik khu B. Dahlau nan, harei 14.10, Ban raya HCM peih adat rivang, truy dieu 731 bol lin di bein bangu Lê Thị Riêng, hadei nan ba atau talang bol lin mai labik palao di Kubo Bol lin Ban raya HCM.

Dom harak don likau daong jien lahik bruk ngak Mỹ dalam adat tapa takik abih kuhria dalam 57 thun tapa, brei mboh takik brei urang ngak padeih bruk. Dom urang ilimo  kinh te mboh lac, bruk ngak di Mỹ daok “takik palih ruah tame ngak, takik brei padeih bruk”. Langiu di nan, bruk urang ngak takik kayua sarak brei urang negar langiu tame di Tổng thống Donald Trump jeng rik daong ngak brei urang takik lahik bruk ngak.

Indonesia daok srap gap peih pandar pablei salih ndien tu Loka, pambuak dom ging mbang huak daok dalam Danak dak Var huak Dinh duong Oh mek jien (MBG) ngan haong dom kapul, htx urang ngak nong saong urang raong glang. Urang dang akaok Jabat Dinh duong pakat Negar Indonesia ndom khang ka hatai caong kaya mbang di Danak dak Var huak Dinh duong brei kein lagaih ka taong abih chuoi pabak, meng urang mbang tui lagaih, urang ngak nong, urang raong glang, htx, gah ngak mbang pablei salih gap mbiah saong sit, tal dom ging mbang huak, labik pajeng ba saong pablei kaya kan.

Danak dak Kaya mbang Padai brah Dunya kakei hu labaih 266 trieu urang di 47 taneh ia saong bhum taneh di dunya daok dang anak bruk kurang kaya mbang. Bruk mesruh metak  mbuan ba tal yaok trieu urang kurang kaya mbang, ngak klaik klaoh bruk ngak tabiak kaya nong… Langiu di nan, dom bruk langik oh lagaih, bruk ngak mbang kinh te saong jien  blei xang menyek, pajeng ba tagok glong ba tal kan kandah ka gah ngak tabiak saong yaom kaya mbang.