Di mbang nyaom ka sa di Mban tacei  ba Trung uong peih ngak dom Danak dak  pakat negar  peih ngak page ini, Thu tuong Lê Minh Hưng njauk brei roh duah pagam tame dom danak dak  pakat negar tui njauk bruk lagaih, oh njauk pagam tui jalan “ pagam dua bruk haong gauk” lac blaoh. Brei hu bruk pataom tame pambuak bruk di 4 danak dak pakat negar piah jhul pasamar  patagok, abih di nyu lac dom bhum kan kandah, di bhum ceik, bhum urang bangsa takik.

UBND TPHCM caong khin ngak salah dom bruk bayar jien, daong jien, padang veik labik daok birau saong jao brei mbaok taneh ka danak dak Metro Bến Thành - Cần Giờ ka po buh jien tame dahlau harei 2/9, ginup bruk peih ngak tui tukvak. Tui nan, dom bhum palei  hu danak dak tapa pathau khan, jak ba bhap bini njauk hatai haong bruk ngak po buh jien tame yau sarak bayar jien, daong, padang labik daok birau, ba mbuan lagaih jhul pakhang bruk jao brei mbaok taneh.

Dom danak dak padang Sang bac pho thong gam bac gam daok pakat tieu hoc saong THCS di dom xã taphia negar di tinh Dak Lak daok jhul pakhang tukvak padang ngak, sumu bruk ba tabiak duh ka thun bac birau. Piah ngak sumu tukvak, Mban Khik iek danak dak peih bruk padang ngak tabung glong “ 70 harei melam oh padeih, padei”, brei urang jakar, ky su bhian tui iek danak dak, pambuak haong dom po thau lang talaih dom kan kandah dalam tuk ngak.

Kuhria meng akaok thun ini di tinh Dong Thap rah tabiak 6 mbang njauk jru mek kaya mbang. Ini lac bruk biak haduh hatai, ngak kan kandah tal prein yawa bhap bini saong ba tabiak jalan paglong bruk khik iek di karja kaya mbang  hacih sa-at. Tapa nan mboh bruk khik iek daok rilo kurang njauk brei pasiam. Pho Akok UBND tinh Dong Thap Nguyễn Phước Thiện khan brei thau, tapa pasang iek camereip, dom mbang njauk jru mek kaya mbang mai meng dom labik saong urang ngak kaya mbang,  pablei salih oh ngak njauk tui hukum ba tabiak kaya mbang siam hacih, khik piah, pandar kaya tamo piah ngak saong pasang iek kaya hu njom anek ruak  

Meng akaok thun tal ini, di tinh Cà Mau kayua langik salih karei, oh lagaih bala rah tabiak gam gam kan thau dahlau, ba tal metai manuac saong khut khat drap ar kuhria labaih 25 ti dong. UBND tinh Ca Mau tacei pato  gah chuc nang tui iek bruk rah tabiak di langik, thuy van, glut jaleih taneh, njom ia mbak, tacei pato bhap bini caga dahlau, bala meng langik, lagaih tui bruk langik salih karei, njauk ndem tal bilan hajan ribuk.

Po negar Trung Quoc Tập Cận Bình caong khin pakhang bruk salih birau khoa hoc - kong nghe, dalam nan njauk ndem tal bruk pachreih urang joi negar langiu saong jhul pakhang bruk roh duah dom gah kong nghe praong ngak dahlau. Tukvak anak tal, Trung Quoc pataom tame dom gah yau tri tue nhan tao, kong nghe luong tu, vi mach, ngak tabiak mac jamraih birau jeng yau dom gah ngak mbang suai atah yau tathik, langik saong ala taneh. Tui nan, negar ini jeng pakhang bruk padang ngak ha tang ilamo - kong nghe, jhul pakhang bruk pandar ung dung AI tame rih duah.

Pacheih tui bruk chreih chrai di World Cup 2026, sa kuan ahar di ban raya Miami, Mỹ daok pachreih ralo urang takre caoh mbanh ngan haong rilo ahar take limo ngak jeng baoh mbanh, hu pagam hala daok di dom kapol pakacah yai. Kati hatai ahar hu palih ruah  tui yaok taneh ia. Tui bruk ba tabiak, ban raya Miama brei dang peih bruk caoh tu ket di harei 11 bilan 7 saong mbang caoh mbanh ka Klau di harei 18/7, pagol taduan  raok rilo tuai damuai takre caoh mbanh grauk labik dalam dunya.

Kayua langik thu lagu saong pandiak dui atah, jaik 7.500 ha glai di Prang Pháp apui khuah mbang abih. Bruk ba tal jhak yau nan mai meng bruk pandiak trak pataom jaik dua bilan tapa. Urak ini hu 47 tinh di Prang ba tame kakei dahlau ka apui khuah “glong” saong 7 tinh karei di biak glong. Anak bruk ini hu rilo bhum palei kham klak dom bruk cuh phao bingu yau meng lavik mai di bingun pahadar harei Negar 14/7.