Anak dom bruk oh ka bhian mboh hu labaih 140 anek saih Tuyên Quang pakacah 10 tanut mon Toán mbang pakacah tamat THPT thun 2026, Pho Thu tuong Lê Tiến Châu caong khin Mentri Pato megru dang tabiak peih ngak, pambuak bruk haong Mentri Kong an, jabat pambuak tal pasang iek taong abih tanut pakacah tamat THPT thun 2026 di dom bhum palei dalam negar. Meyah duah mboh dom bruk oh bhian, samar pambuak haong dom jabat chuc nang piah langyah tui hukum saong taduan bruk drei ngak suan.

 Bo Tu lenh TPHCM iew brei thau khaw tin, harak tai lieu piah duah lubang dar dom liet si mbang taong tame mblang kapal ahaok Tân Sơn Nhất thun nasak Tra Mậu Thân 1968. Tui dom harak tư lieu sajarah dakrai dalam saong langiu negar, labik gah Pei mblang kapal haok Tân Sơn Nhất lac labih hu dua lubang dar dom liet si. Labik ini hu dar  rilo urang jakar, urang lin var klak rup drei taong kalin di melam 30 page harei 31/1/1968 (lac Bingun 1 saong Bingun 2 Tet Mậu Thân). Jaik 60 thun tapa, rilo bol lin daok ndih ala taneh, gauk gar di dom baoh sang daok cang mong akaok.

Anak dom bruk kan kandah bo dom doanh nghiep daok gaok dalam tuk bruk ngak mbang rilo kan daman, ban raya Can Tho sanya pataom tame lang talaih dom bruk tavak harak gal taneh riya, harak gak karja, ha tang, urang ngak bruk saong jalan ngak, sarak; oh luac dom caong khin likau di po ngak mbang doanh nghiep daok gal tavak kayua kurang bruk ngak atau takik pambuak bruk haong dom jabat. Ini lac brei mboh bruk di Akaok UBND ban Can Thơ Trương Cảnh Tuyên di Nyaom biai taom mbaok, pachreih jak ba doanh nghiep ngak tabiak kaya, pablei salih thun 2026 peih ngak di harei 7 bilan 7. Akaok UB bhap bini ban raya Can Tho jeng mong mboh  dom kan kandah doanh nghiep ndem tagok yau biak.

So Padang ngak Ban Dong Nai birau likau ngak brei atah jalan metro ka 3 (Vũng Tàu - Bà Rịa - Phú Mỹ) tal mblang kapal haok Long Thành.  Tui nan, Metro ka 3 atah labaih 40km, akaok jalan meng pasak phuong Vũng Tàu tui Jalan raya 51 tal phuong Phú Mỹ saong puac jalan tame Dong Nai. Piah pambuak jalan ini tal mblang kapal ahaok Long Thành, tapa roh duah hu dua jalan ngak. Jalan ngak ini piah pakhang bruk pambuak dom bhum, patagok siam lagaih bruk ngak di mblang kapal ahaok saong ngak brei sumu gauk jalan pasei negar.

Sa drei aring tano trak 300g hu thaik thaok karei mboh birau duah mboh di xã Tân Lộc, tỉnh Cà Mau. Salih ka bruk hu dua giraong pachip ye drei aring ini hu tal 4 giraong kachip. Hu thaik thaok karei min aring ini biak khang karo saong sahanak. Dua giraong saong 8 pachip mek kaya mbang hu. Sa-ai Đặng Sự daok palei 8, xã Tân Lộc lac urang duah mboh aring ini. Sa-ai khan lac, dalam tuk palih aring meng bhap bini, sa-ai meng catuah drei.

 Rajaei Indonesia brei mboh bruk sanya khik an ninh saong tani tanat padai brah pakat negar dalam tuk langik El Nino, brah khik piah dalam gilang 5,2 tấn, ralo abih meng lavik mai. Dom bruk ngak nong  saong pambuak hu sron mbuan, daong ka bhap bini taduan hu dom janih kaya mbang hu yaom lap.

Uy ban Salih birau saong Patagok pakat negar Trung Quoc khan lac, gah ngak kong nghiep  pambuak tal tri tue nhan tao (AI) di taneh ia ini kuhria patagok labaih 30% dalam thun ini. Quy mo gah AI di Trung Quoc peih tabiak praong tani tanat, samar pandar ung dung, rilo angka so ngak brei patagok glong. Thun 2025, quy mo gah bruk ini tapa 1.000 ti nhan dan te. Urak ini Trung Quoc peih ngak labaih 30 labik ngak iek hu pandar ung dung AI pakat negar,  tui nan jhul pakhang dom doanh nghiep karja peih labaih 1.000 bruk ngak.

Dom urang jakar tinh Maha Sarakham, bhum timur Thai Lan, birau brei adat pasang iek di ralo labik kuan ngak laba baoh lahong saong kuan mbang hu padar “pla ra”, lac janih ikan pandam di bhum Isan, hadei tuk duah mboh yaok ribau sinh vien bac thun sa dut iek mboh njom sán lá gan. Sán lá gan lac janih ky sinh trung mboh ralo di Thái Lan, njauk ndem tal do bhum Dong Bac saong gah Barak, jeng yau di Lào saong Campuchia. Sán nyom mbak mai meng ikan ia taba atau ngak kaya mbang oh ka tathak./.