Meng harei 15 tal harei 18/6, Bo Tu lenh Ban raya HCM  pambuak haong dom jabat chuyen mon pasang duah talang liet si di Bein bngu Le Thi Rieng, lac labik hu dar dom liet si haong gauk, bhap bini plang lahik di Mbang Mesruh metak praong saong dang tagok bi bilan Pataih nethak tra Mau Than thun 1968. Kapol urang ilamo ngak tui dua jalan pandar radar pasang trun taneh saong thaok binguk duah dom kaya dalam taneh. Dalam nan, jalan pasang radar trun taneh tame dalam rilo labik karei di gauk. Tapa nan, dom duah dom kadha, he thong meda duah mboh dom rilo bruk karei ala taneh, piah daong duah dom labik dar liet si. 

Dalam 6 bilan akaok thun, Kapol Jum pataom dom sư sãi anit ranam taneh ia tinh An Giang jak ba saong alin brei jaik 12 ribau paok pandap, padang 5 baoh sang Jum pataom, ngak 10 baoh tatua palei pala, alin labaih 10.000 blah siphau, 2 mac halang ia…Kuhria tui jien peih ngak labaih 10,4 ti dong. Bilan he thun ini, dom baha Nam tong Khmer dalam tinh An Giang pih labaih 460 tal bac akhar huroh Khmer saong labaih 12.900 anek saih saong anek kamun Khmer tui bac…

Anak bruk dom janih cim glai saong cim labik karei mai mbuan gaok urang chap mek, peih loa ju pataom mek, tinh Dong Thap daok peih ngak tabung glong piah khik ramik cim brim di bhum taneh ia dauk. Di dom labik praong yau Bein pakat negar  Tràm Chim, glai tràm Gáo Giồng saong dom labik khik ramik, bol lin chuc nang  peih bruk pasang iek melam. Gah chuc nang caong khin taong abih dom labik pablei salih mbang menyum brei mbaoh harak oh raong dalam var ro, thik ngak rilo saong pablei athur glai suan hukum.

Di Dong Nam bo, baoh manuk laik yaom trun biar. Rilo po var ro di xã Phú Giaó khan lac, meng bilan 3 mbiah tal ini, baoh manuk  pablei tabiak di var raong yaom meng 1.200 -1.500 đồng sa baoh/ trun labaih 1.500 đồng sa baoh dut thun dahlau. Dalam tuk nan, jien buh tame ngak ralo, labaih 1.600 đồng sa baoh, ba tal urang raong glang khat lahik trak. Di Dong Nai, Tay Ninh, TPHCM, yaom baoh manuk kong nghiep trun gam gam. Bruk ini brei mboh urang pablei yaok baoh manuk tabiak khat lahik dom rituh dong.

Sa labik di jalan Thiên Hộ Dương, di phuong Kiến Tường, tỉnh Tây Ninh birau glut jaleih taneh trak atah labaih 91m. Ini lac jalan ta-eng duh ka bruk nao mai saong pajeng ba  kaya kan di 200 baoh sang  daok tapen  kraong Cửa Đông. Hadei  tuk rah tabiak bala, gah chuc nang pacang talei kakei oh brei radaih  tapa labik ini. Urak ini, jabat chuc nang taong yaom  saong ba tabiak jalan ramik pasiam aval dahlau.

Mỹ saong Iran mbaoh harak padeih mesruh metak dui atah jiak 4 bilan. Tui nan, harak pahadar  hu peih pabah mbang eo tathik  Hormuz di harei Suk anak tal, Iran oh pandar vu khik hat nhan. Yau nan min, dom drap ar di Iran daok njauk Mỹ pacang oh brei peih paha tal tuk taneh ia ini ngak salah blaoh dom asar kadha hu ginum biai. Khaw tin ini ngak pambak tal bruk trun tagok yaom xang menyek di dunya. Dalam mbang meyao meyit harei akaok adit 15/6, yaom menyek WTI di Mỹ trun labaih 5%, trun labaih 80 USD sa thung.

Rajaei Campuchia peih ngak Danak dak ngak iek brei mien thi thuc ka bhap bini Trung Quoc. Tui nan, bhap bini Trung Quoc brei pandar ho chieu piah tame negar Campuchia bo oh cang likau thi thuc, bhap bini Trung Quoc meda tame negar Campuchia rilo mbang soang daok veik 14 harei yaok mbang. Rajaei Campuchia caong khin danak dak ini ba mai kein laba siam lagaih oh lac ka tuai damuai bo daok pambuak bhap bini di dua negar.

Negar Anh brei pakauk uranaih umo ala 16 thun pandar rilo mang xa hoi piah pakhang bruk khik caga uranaih anak dom asar kadha oh siam saong bruk pandar  dien tu ralo. Rajaei Anh daok pasang iek piah pacang dom chatbot, pandar di kadha main dien tu gam khik ramik tui tukvak piah pacang uranaih pandar ralo ung dung di melam./.