Dalam mon 19h30 harei ini (18-5), Ban uy, HĐ Bhap bini, UB Bhap bini, UB Mat tran Negar Viet Nam ban raya Dong Nai peih Harei pathau khan padang ban raya Dong Nai. Gam haong nan lac danak dak seni nghe thuat, cuh phao bangu glaong piah salam uan harei padang ban raya Dong Nai. Ban raya Dong Nai urak ini khik bruk pambuak dom gah patagok saong pasak kinh te praong abih dalam negar lac Ban raya Ho Chi Minh haong bhum Tay Nguyen, Bhum tapen tasik Nam Trung Bo, Bhum Taneran kraong Cuu Long. Bruk padang ban raya Dong Nai brei daong prein patagok bahrau oh lac tinh Dong Nai blaoh daok daong palagaih haong labik gah Meraong saong negar.

TPHCM  parang iek 180 blah thaot binguk jak ba saong parang iek thaot binguk  pahadar 136 thun Harei menek di Chu tich Ho Chi Minh saong 115 harei Wa Ho tabiak nao duah jalan daong taneh ia. Ngan haong kadha “ Pato pakei tapa akhar huroh cih vak khan pachreih”, dom kadha pathau khan pambak praong ka raidiuk saong bruk ngak cach mang di Chu tich Ho Chi Minh. Tapa nan, brei mboh thaot binguk gheih ghang hatai ranam taneh ia, sahaneng jak gheih kajap karo, kham merat meng prein khang di drei saong caong khin daong ba haniem phol daong ka bhap bini di Wa Ho.

Pandiak bhang dui atah, takik rah tabiak hajan karei bilan hu brei kein lagaih piah bilan ngak sara thun ini di Lam Dong dui atah jang dut haong bhian meng nan mai. Mbang ngak sara bhian hu ngak meng bilan 12 thun dahlau tal puac bilan klau tui saka ia bulan. Min, thun ini mbang ngak sara dui atah tapa bilan pak tui saka ia bulan. Meng nan, bruk ngak sara hu rilo, ngak hu meng 60 tal 80 tan sa ha di sa bilan. Di tukvak ini, yaom sara di tanut meng 1.100 dong sa kilo tal 1.300 dong sa kilo. Di tinh Lam Dong, hu jaik 560ha ngak sara, pataom tame di dom xa Vĩnh Hảo saong Tân Thành.

Di tinh An Giang, hadei jhul pakhang bruk pathau khan, dom bhum palei daok pakhang bruk pasang iek, langyah dom bruk ngak suan IUU piah ngak brei hu siam  bruk pacang caga hukum taong chap kaya kan ia tathik suan hukum. Mbiah tal ini, Kong an tinh An Giang taduan  tame, langyah 28 bruk, chap mek 37 urang ngak suan hukum. Bruk nan, ralo ba gilai tame ngak mbang suan hukum. An Giang daok dang akaok dalam negar ka gilai taong chap ikan hu labaih 10.000 sruh.

Kong an Ban raya Dong Nai pambuak haong Cuc An ninh mang saong pacang caga urang duas pandar ilamo kong nghe glaong, Mentri Kong an, taong tayah jak jeng jalan talei me-in mbia ca do caong balaong di angaok mang biak praong, dui atah di Ban raya Dong Nai saong rilo tinh, ban. Paok jien meyao meyit tapa jalan talei ini tagok tal labaih 70 ty dong yaok bilan. Jabat kong an peih bruk mek kareik 12 urang saong peih bruk pasang duah samar chip 5 labik hu pambuak tal jalan talei ini.

Trung Quốc sanya blei takik abih 17 ti dola My dom kaya ngak nong di My meng thun 2026 tal thun 2028. Langiu dom kaya meng phun pala, Trung Quoc khan lac pambuak haong dom jabat khik iek di Mỹ piah lang talaih bruk brei padeih bruk ngan dom labik thik ngak rilaow limo Mỹ saong pambuak veik bruk blei rilo manuk ada meng dom bang hu brei thau hacih jit ruak manuk ada.

Indonesia pathau khan hu ginup hlau pabak ralaow athur ka raya Eid al-Adha thun 2026 dalam harei 27/5 anak tal. Taong abih dalam negar hu halau pabak hu kuhria lac jaik 3,3 trieu ralaow athur anak sa dalam dom raya adat di agama praong abih di urang Islam. Rajaei daok maong iek dom jalan pajeng ba anek athur, darak pablei athur saong labik ngak ralaow, dalam nan hu bruk pasang iek dahlau saong hadei tuk ngak ralaow khik kajap bruk pabak dom tanut chuan salamat ka kaya mbang.

Gah Y te Dunya (WHO) khan brei thau bruk tamuh jit ruak Ebola di Taneh ia Dan chu Congo saong Uganda lac “ bruk samar ngak chip gah y te bhap bini ngak dunya huac kanda”,  kakei dahlau pakat dua tui kadha y te dunya, kayua jit ruak meda njom mbak tapa negar karei. Mbiah tal ini, hu abih tih labaih 300 urang ruak saong 88 urang metai, ralo meng di Congo./.