Page ini (12/5) di Pasak Nyaom biai Negar, Ban ine Ha Noi, peih Nyaom biai lambaok vakil pakat negar Mat Tran Negar Viet Nam mbang ka XI vaktu  2026-2031 ngan haong kadha: “ Jum pataom - Ngak njauk - Salih birau - Hadah krah - Patagok”. Brei panuac di nyaom biai, Tong Bi thu, Po negar Tô Lâm  khan brei thau  Jum pataom taong abih bangsa lac bruk hu makna praong, jalan tacei ba di Dang, lac hahlau gha prein khang di Viet Nam. Dang drei Đảng drei khang kayua pambuak meng rilaow darah haong bhap bini. Tong bi thu, Po negar caong khin, Mat tran Negar  Viet Nam  samar tacei pato, ba tabiak ngak tui sarak, khik brei Mat tran ngak ngak bruk hu lagaih, oh tavak cagar gauk.

UBND tinh Tay Ninh birau pok tagok HĐND tinh pasang iek brei tapa sarak buh jien tame ngak danak dak pambuak jalan Long An - Tân Ninh kuhria phun jien labaih 20.700 ti dong. Tui UBND tinh, ini lac danak dak brei ngak samar piah salah blaoh dom jalan pambuak bhum palei birau, trun gar jalan di urak ini saong peih praong bruk cak rok patagok. Tui bruk ba tabiak, danak kuhria peih ngak dalam vaktu meng thun 2026 tal thun 2031. 

UBND tinh Dong Thap pok tagok Sarak ka bruk brei tapa sarak ramik Quy hoach tinh Dong Thap meng thun 2021-2030, pamong tal thun 2050. Bruk njauk ndem tal lac pamong tal bruk roh duah labik ngak brei cakrok patagok gah timur, labik Cái Bè - Cai Lậy. Ngan haong pasak karja tinh, tuk pabak dom bruk njauk ngak saong bruk peih ngak, duah thau salih tapa bhum taneh Cái Bè meng thun 2030.

Bruk glut jaleih taneh, ia dauk, pandiak saong njom ia mbak di Bhum taneran kraong Cuu Long daok rah tabiak  jhak, rilo bruk tapa tanut bala. Yau nan ye meng ini tal thun 2030, Mentri Ngak nong saong Alam moi truong peih ngak 8 danak dak praong, kuhria abih tih  labaih 32.000 ti dong piah caga bruk glut jaleih, pandiak bhang tua riya, njom ia mbak. Urak ini dom danak hu kuhria caga aval di bhum taneran kraong Cuu Long.

Labaih 32.700 anek saih bac tal 12 di Ban raya Cần Thơ birau tame pakacah iek tamat THPT thun 2026. Ini lac bruk pasram  hu makna biak praong  brei ka uranaih ngak randap haong kadha pakacah. Urak ini, dom sang bac THPT brei ba tabiak bruk pato ka anek saih kanal hadar kadha bac meng dahlau, parabha anek saih tui prein bac piah hu jalan pato ka lagaih. Langiu bruk patao dom asar kadha gru pato daok tacei ba jalan pakacah, khik iek tukvak saong sahaneng tani tanat.

50 ban raya pandiak abih di dunya, dalam harei 27/4 panjiak tagok tal jaik 45 do C di An Do,  langik panjiak yau nan tui gah AQI langyah lac oh ka bhian mboh di jaman ini. Dang akaok lac Banda, ban raya daok di Barak Ấn Độ, labik langik panjiak catang saong bhian yam tapa bilan he pandiak catang. Langik panjiak  di rilo labik ngak kan kandah tal bruk ngak nong, pala drak, tui nan ngak kan kandah tal bruk ngak mbang kinh te saong gah y te An Do.

Trung Quoc hu jaik 1,7 trieu dam dara mbaoh harak lakhah dalam quy 1 thun ini, trun labaih 6% dut saong tukvak ini thun dahlau. Dalam dom thun jiak ini, Trung Quoc kham merat ngak brei mbuan mbiah takik harak gal hanh chinh saong salih jitvu khik iek bruk lakhah, piah ba mbuan lagaih  dalam bruk tut angan lakhah. Njauk ndem tal brei ka dom dam dara mbaoh harak lakhak meng can cuoc bhap bini di labik jabat halei hu ginup harak gal karja.

Tay Ban Nha birau hu sa urang njom ruak dalam dom urang  hu ba tabiak truh gilai pajeng tuai sirah ma-in  MV Hondius. Mentri Y te Tay Ban Nha khan lac sa dalam 14 bhap bini taneh ia ini  hu ba tabiak truh gilai MV Hondius tapa duk iek mboh njom virus Hanta. Gah y te daok patui bruk dut iek ruak tui jalan khik brei salamat hu padang tabiak./.