Bi thu Trung uong Ndang, Phaok Thu tuong Phạm Thị Thanh Trà bahrau mai rivang, daong prein saong jao alin kaya ka dom uranaih ruak daok taong ruak di Sang iek ruak Uranaih 2, Ban raya Ho Chi Minh di Bilan gak bruk ka uranaih saong Harei Dunya urnaih 1/6. Phaok Thu tuong Phạm Thị Thanh Trà brei mboh bruk drut druai tuk hu tapak taom gaok rilo uranaih ruak ung thu daok taong ruak di sang iek ruak min jeng brei mboh bruk khang hatai anak ruak hakik. Phaok Thu tuong Phạm Thị Thanh Trà rivang tangi prein yava, daong prein saong jao alin kaya ka 260 uranaih ruak di dom gah, dom bilik di sang iek ruak, yaok paok kaya alin hu 2 trieu dong jien mbaok gam haong kaya alin hu makna ka dom adei.

Labaih 170.000 anek saih hu mbaok pakacah taong yaom prein bac mbang ka 2 di Dai hoc Quoc gia Ban raya Ho Chi Minh peih ngak meng harei kabroi 24/5, dalam nan hu jaik 110.000 anek saih hu mbaok di mbang pakacah ka 1 hu pakacah gilac piah palagaih tanut. Ini lac mbang pakacah hu anek saih pakacah rilo abih, tagok jaik 80% dut saong tukvak ini thun dahlau saong glaong abih kuhria meng mbang pakacah ini hu peih padang. Mbang pakacah taong yaom prein bac mbang ka 2 rah tabiak di 15 tinh, ban. Kuhria, bruk kuhria hu hu pathau khan di harei 6/6. Urak ini hu labaih 100 labik pato megru pandar tanut pakacah mbang ini piah palih ruak.

Thanh ndoan Can Tho peih bruk patabiak bruk ngakka Harei Adit hacih hijao dalam negar thun 2026 di phuong Soc Trang di harei kabroi, dui pachreih labaih 200 urang ndoan, dam dara, urang jakar, bol lin saong rahra; tapa nan pambak tabiak khang ka jalan diuk rai hacih hijao. Bruk diuk rai hacih hijao di dam dara ban raya Can Tho hu labaih 240 danak dak di dam dara peih ngak samu gauk meng akaok thun 2026 tal ini, ngak kein lagaih ka rahra labaih 5,7 ti dong, tapa nan brei mboh bruk hu makna dalam bruk pambak jalan diuk rai karo kajap, padang sa ban medin siam gheih.

Canah jalan Điện Biên Phủ (Ban raya Ho Chi Minh) bahrau hu peih jalan mbak meng gom tin hieu salih ka bruk nao tui kaong payeng. Harei akaok meti ba tame pandar, rahra daok katuak ba tal bruk gar jalan. Yaom lac yau nan, bruk paneh radaih daong ka jalan mbak hu siam mekre, salamat jang. Bruk njauk caik hatai abih lac kapul chuc nang hu pagam dua talei neh jalan dui atah meng jalan Điện Biên Phủ - Đinh Tiên Hoàng tal tatua Điện Biên Phủ piah neh calah taong abih radaih nao tapak saong vaih gah ieu. Inem mata mắt võng jeng hu cih cih veik piah brei ka dom radaih vaih gah hanuk gam gam meng jalan Điện Biên Phủ tame jalan Nguyễn Bỉnh Khiêm.

Biar harei malam kabroi 24/5, khau tin meng xa Phọng Thạnh saong phuong Giá Rai, tinh Ca Mau brei thau, hajan ribuk pagam tui angin khang rah tabiak dalam bhum ngak ka rilo baoh sang rahra njauk papeih pabung, khut tayah, rilo gang ndien, labik tuh xang jaleih… Tui khau tin meng akaok meti, hajan ribuk pagam tui angin ngak ka 15 baoh sang di pu 2A, xa Phong Thạnh papeih pabung. Kuhria khat lahik labaih 150 trieu dong; 34 baoh sang rahra di dom labik 19A, labik 20, labik 22 saong labik Phong Thạnh, phuong Giá Rai papeih pabung. Bhum palei daok patui veik kuhria dom khat lahik, min oh ngak kan kandah tal menuac urang.

Danak dak Var mbang huak Dinh duong Oh mek jien (MBG) di Indonesia hu brei ka labaih 62 trieu urang mbang tuikein lagaih dalam negar. Ini lac sa dalam dom sarak hu makna di Tong thong Prabowo Subianto piah paglaong asar siam ka menuac urang tapa bruk pabak dom var huak saong kaya mbang pabak dinh duong njauk hu. Danak dak pamaong 82 trieu rahra dalam negar hu mbang tui, dalam nan hu anek saih, urang kamei metian, amaik daok brei anek mum saong uranaih daok dalam dom baoh sang hu jien mek tame biar.

Anh saong labaih 40 negar daok srap gap sa bruk pasang duah patayah thủy lôi saong khik kajap salamat jalan tasik si eo tasik Hormuz hadei tuk mek hu bruk mbaoh tangin di My saong Iran. Bruk ngak ini piah daong pasiam bruk peih nduac gilai thuong mai tapa mbang pajeng ba nang luong hu makna abih dalam negar. Bol lin tasik Medhin Patao Anh daok srap gap dom kaya sonar, kaya ta-eng ngak dalam ia saong majam pasang duah mboh thủy lôi piah srap gap peih ngak tuk kein lagaih an ninh brei ngak.

Anak bruk rah tabiak srau kadau di jit ruak Ebola di Congo saong Rwanda, jabat Y te Lien minh chau Phi harei kabroi kakei caga ka ruak hu urang metai biak rilo ini, daok ngak kan kandah tal 10 negar chau Phi, dalam nan hu Angola, Burundi, Trung Phi, Cộng hòa Congo, Ethiopia, Kenya, Rwanda, Nam Sudan, Tanzania saong Zambia. Ebola lac janih ruak mbuan ngak metai biak glaong saong ngak metai labaih 180 urang di dalam oh ka bak 12 bilan. Kapul Y te Dunya jeng hu pathau khan jit Ebola lac bruk samar chip pakat dunya.