Pho Thu tuong Phạm Thị Thanh Trà birau mbaoh Sarak ba tabiak Bruk peih ngak “ Harei Ilamo Viet Nam” harei 24/11 vaktu meng 2026 -2030. Tui Bruk ba tabiak, Mentri Ilamo, Padhih the thai saong Yulit, Rayo papar binguk Viet Nam, Rayo sap ndem Viet Nam, Thong tan xa Viet Nam, dom jabat bao chi di Trung uong saong bhum palei, mbuak haong Mban Tuyen giao saong Dan van Trung uong;  dom mentri, dom gah pakat negar; UBND dom tinh, ban peih bruk padang ngak kaya ka “Harei Ilamo Viet Nam” hu asar kadha, jalan ngak cambaic laic, lagaih haong ilamo saong bruk ngak di yaok bhum, palei. Padang saong pambak praong dom bruk khik ramik, patagok ilamo oh mboh di meta saong ilamo di bhap bini dom bangsa pambuak haong bruk patagok yulit.

Biar harei 22/6, Mban Tacei ba 515 tinh An Giang  peih nyaom biai “ Bruk ngak 500 harei melam jhul pakhang bruk duah pataom saong duah thau angan talang liet si” saong bruk mek  mau, jao brei talang  liet si dalam tinh. Brei panuac  di nyaom biai, ong Lê Văn Phước, Pho Akok UBND tỉnh, Akok Mban tavcei ba  515 tỉnh An Giang caong khin  dom so, dom gah, karja bhum palei paglong bruk ngak, pakhang bruk pathau khan, pasang iek, duah thau khaw tin liet si, kubo liet si; pambuak kajap bruk duah pataom mek mau saong  brei thau angan  talang liet si, pabak tui hatai caong khin  di baoh sang urang liet si.

Tong Kongti Mblang kapal ahaok par Viet Nam (ACV) brei thau, hadei jaik 3 adit peih danak dak pakacah 180 harei malam brei ngak samar salah blaoh Danak dak Mblang kapal ahaok par pakat dunya Long Thành, urak ini labik ngak danak dak khik tani tanat kuhria rah tapa hu labaih 7,3 ribau urang hu mbaok tame ngak bruk, tagok jaik 5% dut saong dahlau harei 1/6. Tukvak anak tal, labik ngak danak dak yam tame tabung glaong bilan hajan, kayua nan ACV gam haong dom labik hu pambuak hu srap gap padang jalan pacang cakak, pasiam jalan tame ngak bruk tui kein lagaih di langik.

Bein pakat Negar Tràm Chim daok samar drah srap gap raok 6 drei seu akaok bhong meraih mbang ka 2 mai meng Thai Lan, patui veik jalan “ba tapol seu mai sang” di tinh Dong Thap. 6 drei dalam nan hu 2 drei tano saong 4 drei binai, urak ini daok hu raong di Bein athur Nakhon Ratchasima. Pak urang ilamo Thai Lan brei tui iek prein yava tapol ciim dalam luac jalan pajeng ba saong tukvak akaok meti lagaih haong labik bahrau. Bruk taduan srap gap rilo bilan tapa. Majam var ro caik karei, menek saong labik meteh hoang da di Tràm Chim hu srap gap.

Palei Lò Làng, daok di phuong Hòa Hiệp, tinh Dak Lak bahrau hu Cuc Jirah rivang pakat Negar Viet Nam palih ruah lac sa dalam 5 lambaok di Viet Nam salah blaoh harak gal hu mbaok tame yai thuong “Palei Jirah rivang siam abih” thun 2026 di Kapul Jirah rivang Lien hop quoc. Palei Lò lac sa palei tapen tasik lavik rai pagam haong sajarah ngak jeng bhum taneh Phú Yên dahlau diah, urak ini daok khik hu rilo ilamo karei di bhap bini urang nao tasik bhum tapen tasik Maraong Kreh Negar. Labik ini naih gheih haong dom baoh sang pabung yao klak tapen tasik, palei ngak bruk tasik jaik yau daok tamo.

Danak dak Jakarta rah tabiak di harei kabroi (22/6) di jabat Mbang Thu ky ASEAN, pahadar 5 thun padang gah pambuak Jalan kuhria Taong abih ASEAN - Trung Quoc. Ngan haong kadha “Pamaong tal sa Bruk Pambuak gauk ka Jalan Kuhria taong abih ASEAN - Trung Quoc khang kajap saong siam lagaih jang ka kein lagaih praong jang di labik saong dunya”, Danak dak hu bruk hu mbaok di urang ngak praong dalam rajaei, dom urang ilamo, dom jabat roh duah, gah ngak mbang pablei salih saong dom kapul dunya.

Bo Tong tham muu pambuak bol lin Han Quoc brei mboh gah CHDCND Trieu Tien daok ngak bruk pagam rilo “bruk kan kandah” rah tui jalan labik gah Barak tapen negar bol lin lien Triều (MDL). Tui Hiep dinh ini, labik 2 km nao tal gah Barak saong 2 km mai tal gah Maraong kuhria meng MDL lac labik oh ngak bruk bol lin (DMZ). Dalam tuk nan, dom “kan kandah”, hu langyah lac dom kaya meda ngak kan tavak, dalam nan hu talei paga thep garuai, bi Trieu Tien daok pagam di labik biak jaik dut saong MDL.

Dom urang ngak khao co Ai Cap bahrau duah mboh dua kubo hu labaih 5.000 thun di Minya, gah Merang ban ine Cairo. Ini hu thau lac dom inem mek daok dalam Jaman Sơ jaman patao di Ai Cap. Tui Akaok Mentri Jirah rivang saong Kaya Yao klak Ai Cap Sherif Fathy, dom bruk duah mboh ini meda daong dom urang roh duah tui luac jalan patagok di thaik thaot kalan kubo di Ai Cap meng kal klak tapa dom jaman karei gauk./.