Hu mbaok di var alin yai mbao chi pakat negar mbang 20 rah tabiak melam kabroi 21/6 di ban Hai Phong, Akok Quoc hoi Trần Thanh Mẫn caong khin, Mbao chi lac bol lin brei ngak dahlau dalam bruk khik ramik jalan sahaneng di Dang, kham merat pacang caga dom  bruk sahaneng suan, pamoh mebai jhak hatai. Di labik hu kadha ndem meyai oh njauk, ngak cagar ye labik nan hu mbao chi ngak taong tayak; labik halei hu khaw tin ndem jhak, sahaneng  karei ye labik nan hu mbao chi ndem brei thau cambaic laic pakhang hatai jia. Kapol Hoi ndong mbao chi pakat negar hu alin yai 11 kadha Yai A, 26 kadha yau B, 50 kadha Yai C. Rayo sap ndem Viet Nam mekre hu yai 2 A, 2 yai C, 1 yai khuyen khich.

Lien doan Lao dong TP.HCM pambuak haong Trung uong Kapol Gru jru ranaih umo Viet Nam saong Lien doan Hukum Luat su Viet Nam peih bruk iek ruak oh mek jien ka labaih 2.000 urang ngak, urang lao dong hu radiuk ikan kandah, urang kumei, urang ngak bruk njom ruak. Bruk njauk caik hatai lac pandar ung dung tri tue nhan tao (AI) tapa app khoemanh.net daong palih ruah saong duah mboh aval samar ruak kik. Bingun ni, Mban peih bruk  hu alin 100 paok pandap ka urang ngak hu raidiuk kan kandah. 

Meng tuk hu pablei tui sarak pambuak haong Trung Quoc di thun 2022, durian hu jeng baoh kayau ba mai jien padai ralo ka po bein. Yau nan min, tame bilan piak baoh praong di thun ini, darak pasar  baoh durian di dom tinh gah Pei negar  trun yaom biar. Bruk nan kayua bilan paik baoh hu ralo, ba tal urang blei padeih atau takik blei. Anak bruk nan, Rajaei caong khin Mentri Ngak nong saong Alam moi truong, samar ngak bruk haong Trung Quoc, piah samar mbaoh harak  ka dom jabat dut iek baoh durian hu tanut chuan Viet Nam. 

Mban Khik iek danak dak buh jien tame padang ngak danak dak jalan mbak tinh Dong Thap hu ngak salah blaoh bruk palih ruah po thau ngak Danak dak patagok bhum Dong Thap Muoi vaktu ka 1 saong Danak dak paglong, peih praong jalan tinh 878. Tui kuhria mboh dahlau, dalam akaok bilan 7 tal dua danak dak ini hu padang ngak. Ini lac dom danak dak  hu makna biak praong dalam bruk pakhang pambuak bhum, pachreih urang buh jien tame saong ngak brei patagok di bhum Dong Thap Muoi di tinh Dong Thap dalam tukvak anak tal.

UB Bhap bini ban raya Can Tho bahrau ba tabiak bruk samar chip ka bala jaleih ar kraong ba Láng, puk Thạnh Lợi, xa Thạnh Xuân (gah anak UB Bhap bini xa tân Phú Thạnh klak). Jalan betong jaleih atah 21m, praong 6-8m, dalam 1-3m. Ini lac jalan pasak pajeng ba ndap nda kaya, nao mai, jeng lac jalan ar pacang tapen kraong Ba Láng, labik daok rahra rilo saong phun mbang baoh, njam patam, ha tang rahra dalam. Meng akaok thun tal ini, ban raya Can Tho rah tabiak labaih 60 labik jaleih, hu taong abih atah labaih 1.500m

Tuai damuai saong rahra bhum palei di Madrid, Tây Ban Nha daok gaok kan kandah haong nhiet do tagok tal 40 do C. Di Prang, kongti jalan pasei pakat negar hu pachreih kakei dom urang mbuan gaok kan kandah oh brei nao radaih dalam mbang pandiak bhang. Kakei caga pandiak bhang jeng hu ba tabiak di jaik abih negar Duc, tuk nhiet do tagok jaik 38 do C. Dom urang Ilamo brei thau, langik salih karei daok ngak ka mbang pandiak bhang jeng bhian saong catang jang di grauk chau Au.

Dom urang ruak Ebola hu brei mboh di Cong hoa Dan chu Congo hu tagok 956 urang, dalam nan hu 247 urang metai. Akaok Mentri Y te negar ini brei thau jitruak jeng daok dalam tukvak tagok saong dom urang njauk ruak jeng hu brei mboh meda hu patui veik tagok tuk dom kapul pacang caga peih praong bruk duah urang ruak saong tame dalam jang dom bhap bini njauk pambuak tal ruak.

Tuai damuai saong rahra bhum palei di Madrid, Tây Ban Nha daok gaok kan kandah haong nhiet do tagok tal 40 do C. Di Prang, kongti jalan pasei pakat negar hu pachreih kakei dom urang mbuan gaok kan kandah oh brei nao radaih dalam mbang pandiak bhang. Kakei caga pandiak bhang jeng hu ba tabiak di jaik abih negar Duc, tuk nhiet do tagok jaik 38 do C. Dom urang Ilamo brei thau, langik salih karei daok ngak ka mbang pandiak bhang jeng bhian saong catang jang di grauk chau Au.