Di bingu pahadar 136 thun Harei menek Chu tich Ho Chi Minh (19/5/1890 – 19/5/2026), page ini, Kapul Lambaok vakil Ban raya Ho Chi Minh kayua Uy vien Mentri Chinh tri, Bi thu Ban uy Ban raya Ho Chi Minh Trần Lưu Quang ba akaok kapul paling bangu pahadar Chu tich Ho Chi Minh di bein bangu rup patau Chu tich Ho Chi Minh. Jeng dalam page ini, Ban uy Ban raya Ho Chi Minh peih bruk pok peyaom 358 kapul, menuac urang neih gheih ngak tui panuac Wa Ho. Var raya piah pok meyaom dom menuac urang, kapul naih gheih, dom bruk ngak hadah krah… dalam bac megru saong ngak tui jalan sahaneng, ilamo saong bruk daok dang di Wa Ho Chi Minh.

Ban Can Tho birau peih bruk jak ba “ Pala phun hadar miat miat dhar phol Wa Ho” thun 2026. Dalam mbang tabiak ngak bruk, dom gah hu pala 1.200 phun hoàng yến rah tui ar kraong, ar ribaong di xã Thuận Hòa. Tapa peih ngak jak ba dom bruk njauk lagaih, bhum bhum palei caong khin ngak jeng prein khang di kapol nyaom, pambak praong bruk ba tangin tame khik ramik alam moi truong tal yaok bhum palei, samar ngak blaoh salah ka bruk pala phun kayau hijao dalam xa.

Raya baoh kayau tinh Dong Thap brei rah tabiak dalam 4 harei (meng harei 5-6 tal harei 8-6-2026) ngan haong kadha “Dong Thap – Bhum baoh yamein”. Raya piah pok meyaom yaom kaom, angan je saong thaik thaot gah baoh kayau hu angan di Bhum taneran kraong Cuu Long saong dalam negar. Ini daok lac bingun piah yaih khan dom ndap nda kaya baoh kayau khik kajap asar siam, salamat kaya mbang, hu thau cambaih meng halei mai; paglaong ilamo, jalan kuhria pablei saong pabak hatai caong darak pasar dalam. Tinh Dong Thap hu taneh pala phun mbang baoh praong abih dalam negar, labaih 135.000 ha phun mbang baoh, mek hu meng 2,2 - 2,5 trieu tan sa thun.

Anak bruk ba tabiak glong di darak pasar negar langiu, tinh Vĩnh Long daok pataom tame jhul pakhang bruk brei saong khik iek ma so bhum pala, ma taka so papaok piah paglong asar kaya nong siam, peih praong darak pasar pablei saong pamong tal bruk cakrok patagok gah ngak nong karo kajap. Urak tinh Vĩnh Long hu brei 1.006 ma taka so bhum pala saong papaok di taneh praong jaik 34.000 ha. Dalam nan, hu 733 ma taka so bhum pala njauk tui hatai caong  takre di rilo darak pasar yau Trung Quoc, Hoa Kỳ, New Zealand, EU, Hàn Quốc, Úc…

Dalam tukvak oh hu suai lavik, negar rah tabiak 2 mbang mblung ia ngak ka 9 uranaih metai, anak dom bruk pandik harao ini, Mentri Y te pandar UB Bhap bini dom tinh, ban patagok ngak dom bruk pacang caga bala, njauk rambuas saong pacang caga mblung ia di uranaih; kakei caga bruk mbuan rah tabiak bala, njauk rambuas saong mblung ia dalam bilan pandiak he saong bilan hajan, ribuk; tacei ba ilamo salamat, ilamo plaih bala, mblung ia ka uranaih…

Gah Y te Dunya (WHO) khan brei thau mbang tamuh jit ruak Ebola di Cong hoa Dan chu Congo saong Uuganda lac bruk ngak samar chip di gah y te công cộng ngak ka dunya huac kanda, kayua jit ruak njom mbak tabiak saong ralo sruh jit ruah rah tabiak jang bruk hu kuhria mboh. WHO brei ba dom urang ngak bruk drah samar jeng yau urang ilamo mai ngak bruk di kabik. LHQ caong khin dunya samar daong ka dom bruk piah pacang caga haong Ebola.

Dom bang saong kapul hu angan di An Do daok pachreih rahra menek veik anek, yaom lac An Do urak ini lac negar hu rilo rahrah abih dalam dunya hu labaih 1,42 ty urang. Lien hop quoc kuhria rahra An Do meda tagok veik dalam labaih 4 pluh thun anak tal saong meda tagok tal 1,7 ty urang. Min, dom urang ngak bruk kuhria tui sarak saong dom kapul Hindu ndom lac negar ini brei samar drah langyah bruk patakik menek anek, dalam nan bruk daong jien padai ka dom baoh sang hu rilo anek bik.

Kuhria abih tih 5 urang metai dalam mbang patuh phao rah tabiak di jalan pandiak harei 18/5 (tui mon Washington) di sa pasak urang Hoi giao di ban San Diego, bang  California. Urang patuh phao nan lac dua urang likei umo 17 saong 19 thun, dua urang ini metai. Kapol  nyaom Pambuak Mỹ - Hoi giao di  San Diego ndem panuac ka bruk patuh phao, tui nan iew brei pakhang bruk khik caga dom labik agama dalam tuk huac bruk patuh phao tame bhap bini bangsa takik di Mỹ./.