Malam kabroi (18/5) di Dong Nai, rah tabiak harei pathau khan padang ban raya Dong Nai daok dalam Trung uong saong taduan raok Huan chuong Ngak bruk glaong abih. Di harei Raya, Tong Bi thu, Po Negar Tô Lâm pandar, padang sa ban medin ka menuac urang, grauk rahra jeng hu mbang tui bruk jak jeng patagok; brei sangka siam jang bruk ngak, sang daok, sang bac, sang iek ruak, pasiam ilamo, labik daok rahra, labik daok dang, rilo meng lac ngan haong urang ngak kong, urang ngak bruk, bhum atah bayah, bhum kan kandah… Jalan ngak puac abih lac piah yaok baoh sang hu raidiuk trei sir jang, salamat jang, haniem phol jang raong pabam ilamo di menuac urang Dong Nai dalam jaman bahrau. Pamedeih khang hatai daong di gah ngak mbang pablei salih saong Rahra.

Di Gilang khik piah drap ar ilamo tinh Gia Lai daok peih bruk parang iek thaok binguk ngan haong kadha “ Gia Lai - Meng ceik glai tal tathik hijao”. Ini lac bruk pahadar  136 thun Harei menek di Chu tich Ho Chi Minh (19/5/1890 - 19/5/2026) saong Harei Dunya  Gilang khik piah (18/5). Parang iek 148 blah rup thaot hu 5 kadha  nan lac: ceik glai radam rasa, drap ar pataom tame, bhap bini dom bangsa tinh Gia Lai, kaya mbang bingi saong jit vu rivang ma-in yulit. Dom kadha brei mboh bruk chreih sambai, siam gheih di sajarah dakrai, ilamo saong anek manuac Gia Lai dalam tukvak cakrok patagok.

Meng harei 1/6 anak tal, xang sinh hoc E10 hu pablei dalam negar. Ini hu maong yau lac jalan nao hu makna dalam luac jalan kuhria salih nang luong, patakik pambak tame xang menyek hoa thach saong jhul tagok bruk pandar xang menyek oh kanjah tal alam langik di Viet Nam. Bruk xang E10 hu darak pasar taduan raok siam lagaih dalam tukvak akaok meti peih ngak ka mboh hatai urang pandar daok rah rah randap haong jalan pandar xang menyek sinh hoc.

Jalan danak dak binah 1, jalan peih drah samar Bien Hoa - Vung Tau atah 16 km, tapa Ban Dong Nai brei peih radaih. Tui ong Đinh Tiến Hải, Yam ndoc Mban Khik iek danak dak  buh jien tame ngak Ban Đồng Nai, dalam tukvak camereip brei ka radaih oto ala 9 ghaiy ndik tapa piah sumu jalan 2,3 oh ka brei dom janih radaih tapa. Bruk peih radaih tui danak dak binah 1, jalan peih drah samar  Bien Hoa - Vung Tau atah jaik 54 km  hu ba tame pandar taong abih.

Adit raya palao kalang thun 2026 daok rah tabiak di phuong An Xuyên, tinh Ca Mau. Danak dak peih tabiak labik ilamo ndung bak sambo bar, dui pavhreih rilo urang mai jirah rivang, ba drei tame. Danak dak lac kaya alin ka hatai di dom adei uranaih, tui hatai caong ba mai ka dom adei hu labik tukvak ranaih biak bui sambai, siam mekre saong hu makna. Abih di nyu nan lac, bruk naih gheih abih lac bruk parang iek kalang meng gom LED ngak mekre dalam var malam, ngak jeng tanrak hadah biak gheih di angaok langik Ca Mau.

Pahadar 136 thun harei Menek di Chu tich Ho Chi Minh (19/5/1890 - 19/5/2026), rilo ngak piah pahadar peih tabiak di Lào. Harei ini, Dai su Viet Nam di Lào peih ngak rilo bruk pahadar biak praong dalam yau: parang iek tapuk, daoh tamia ilamo van nghe atau peih phim tu lieu ka Chu tich Ho Chi Minh. Dahlau di nan, Tong Lanh su quan Viet Nam di Luangprabang saong di Pakse, Sang bac dua sap Lào - Việt Nam Nguyễn Du hu Cuh gahluw  pahadar Chu tich Ho Chi Minh.

Mỹ brei pa-atah tukvak veik 30 harei co che brei ka dom negar patui veik blei tame menyek di Nga daok pajeng ba di angaok dom kapal gilai angaok tasik, piah patakik bruk kurang halau pabak nang luong kayua mesuh metak di Trung Dong ngak tabiak. Bruk ini brei mboh veik bruk salih bahrau di My ngan haong menyek di Nga, hadei tuk karja My dahlau nan brei thau ka dom bruk oh lagaih hu samar drah salah blaoh.

Cảnh sát Thái Lan ba tabiak kaoh tui hukum urang peih radaih pui pajeng kaya ndap nda ginuh tame radaih buyt di Ban ine Bangkok ngak 8 urang metai saong  33 urang njauk rambuac harei 17/5. Tui pasang kuhria camereip, urang peih radaih hu njuk jru phien saong peih radaih ngak rah tabiak bala trak. Hadei mai rivang dom urang gaok bala daok ndik iek ruak di sang iek ruak, Thu tuong Thai Lan kakei rajaei brei sangka  tal dom bruk duh hatai daok huac di dom urang gaok bala nan./.