Mbiah tal bilan 7 ini, TPHCM ba tame pandar 88 radaih buyt ndien, taong yaom bruk ngak hu makna praong bruk salih tapa nao mai meng radaih buyt hajao hacih, salih birau saong siam ka alam moi truong. Kham merat tal harei 1/1/2029, taong abih radaih buyt  di TPHCM brei peih meng ndien. Bruk jhul khang nao mai meng radaih ndien daong takik tathuak nerak, paglong  jitvu duh ka tuai damuai saong pasiam bruk nao mao di bhap bini.  

UBND tinh Ca Mau padang Kapol urang jakar mai tal sang daong mikva ngak harak gal; paglong bruk daong ka bhap bini rahra, doanh nghiep dalam tinh. Tui nan meng harei 15/7, urang taha umo, urang jaoh jo, baoh sang dalam sarak karja saong dom kapol nyaom mbuan gaok kan landah dalam tinh Ca Mau brei langyah dom harak gal di sang; piah hu lagaih, sumu, njauk tui hukum karja. Dom don vi brei mbat tauk angka laik phone di kapol urang jakar ngak bruk tal sang piah langyah dom bruk caong khin daong di bhap bini.

UBND tinh Lâm Đồng taduan bruk buh jien tame ngak mbang di Po Danak dak jalan ba ndien 500kV Krông Buk - Tây Ninh 1, jalan atah labaih 330km. Talei katung atah tal rilo xa, phuong di tinh Dak Lak, Lâm Đồng, TP. Đồng Nai, TP. Hồ Chí Minh saong tỉnh Tây Ninh. Danak dak hadei ngak salah blaoh pabak ndien ka bhum gah meraong saong bhum kreh negar, Tay Nguyen piah khik ginup nang luong dalam negar.

Raya Baoh Durian  Dak Lak 2026 ngan haong kadha “ Durian Dak Lak - Pambuak atah” peih ngak meng harei 15/8 tal harei 2/9 anak tal, hu 17 bruk ngak, dalam nan hu 2 bruk yaih khan pambak  praong hu peih ngak dahlau tuk raya. Mbiah tal ini, dom bruk pathau khan dahlau harei raya, dalam nan hu tour rivang iek bruk “ pagam tambung bingu durian” di xã Krong Pac  pachreih ba hu labaih 1 trieu mbang urang saong jaik 1.000 mbang tame bac megru online. Bruk ngak talk show kaya mbang durian  peih ngak hu jak jeng hu mbaok di dom urang tahaneh  gak kaya mbang di dunya dalam nan hu Viet Nam, Thai Lan saong Malaysia.

Pakacah nduac  jalan trun tagok ngan haong kadha “ Jalan sahaneng Côn Đảo 2026” peih ngak di harei 30/8 tal Dac khu Con Dao, TPHCM nduac atah meng 6 tal 50 km, tapa dom labik inem krung sajarah darai dalikan jeng yau hu mong iek  dom labik siam gheih di  bhum taneh ini. Yai  kayua Rayo papar sap saong thaik binguk TPHCM( HTV) peih ngak. Mban peih bruk caong khin bruk pakacah yai nduac hu jeng bruk padhih the thao yaok thun, rik tame yaih khan thaik binguk Côn Đảo, pambak praong bruk pasram prein yawa saong anit takre bac sajarah dakrai, dom labik alam Viet Nam siam gheih.

Gah ngak kong di Campuchia hu tagok siam dalam enam bilan akaok thun ini, brei mboh labik dang biak lagaih pachreih dom urang buh jien tame ngak mbang di dunya. Urak ini, hu 3.284 sang mac  praong ngak bruk kuhria abih tih phun jien buh tame labaih 27,6 ti USD, pandar labaih 1,33 trieu urang ngak di bhum palei. Rajaei Campuchia tuk halei jeng pachreih doanh nghiep negar langiu buh jien tame ngak dom kong nghiep daong saong pambuak bruk haong dom doanh nghiep mbiah saong sit di Campuchia piah hu jeng gah ngak mbang njauk jia tame.

Thai Lan birau khan brei thau bruk ngak piah pacang caga kol duis pambak tame taneh ia ha tang logistics saong mblang kapal ahaok birau di taneh ia ini ngak jalan pajeng matuy. Bruk birau abih lac pabak ung dung tri tue nhan tao AI gam he thong pasang X-quang birau saong  kapol athau ngak bruk piah tui iek taong abih gah tame tabiak negar, salih ka bruk pataom tame pasang iek bruk tame negar yau dahlau diah. 9 bilan tapa, negar ini chap mek hu labaih 1 tấn matuy yaom meng 700 – 800 baht sumu 19 -22 trieu USD.

Sa lubang ameh gah Barak Sudan glut jaleih di harei kabroi 6/7 ba tal 15 urang jeng  kuac ameh  metai. Meng akaok thun ini, hu sa lubang ameh rah tabiak di gah Meraong negar Sudan, ba tal 14 urang metai saong 6 urang njauk rambuac. Ameh mek hu thun 2025  di Sudan labaih 70 tấn, glong abih dalam 5 thun tapa. Yau nan min, labaih 20 tấn hu pablei tabiak negar langiu tui sarak hu pambuak bruk./.