Di Nyaom biai BCH Dang bo UBND TPHCM mbang ka 4 (pambuak rilo gah), mbang I, vaktu meng thun 2025 -2030 peih tabiak page ini, UBND TP pakacah jak ba ngak bruk tabung glong “150 harei melam” kham merat ngak blaoh dom bruk ba tabiak, tanut patagok kinh te - xa hoi  thun 2026. Tui bruk ba tabiak, Ban raya pataom tame peih ngak 5 bruk hu makna nan lac: kham merat  khik hu bruk patagok GRDP meng 11% tagok; peih brei abih phun jien di karja, jhul pasamar ngak dom danak dak hu makna praong; jak ba doanh nghiep, po buh jien tame peih praong bruk ngak tabiak, jien ngak mbang, duah bruk ngak saong rik tame ngak brei patagok dua angka so.

Harei ini, di Kubo ghor Liet si xã Trần Văn Thời, Mban Tacei ba bruk duah pataom saong duah angan ka talang liet si tinh Ca Mau peih bruk cuh gilau kakuh saong ba 237  mau talang liet si oh ka thau angan je nao dut iek ADN di Vien Khoa hoc hinh su, Mentri Kong an. Tỉnh Cà Mau kham merat  dalam quy 1/2027 kham ngak hu taong abih 3.382 kubo liet si oh ka thau angan dalam tinh.  

Bol lin ngak bruk di TPHCM duah mboh saong kuac mek hu veik 2 atau talang liet si di Bein bingu Lê Thị Riêng, oh hu harak gal. Yau nan, mbiah tal tukvak ini, duah saong pataom hu 11 talang liet si. Harei 9/7 bol lin kuac praong lubang dar, ba mbuan lagaih ka bruk duah pataom, kuac mek saong pataom  atau talang liet si dalam tuk vak anak tal. Bruk duah pataom peih ngak samar, tani tanat, ngak njauk bruk, brei mboh bruk hadar dhar phol dom anh hung liet di var klak rup drei daong ka taneh ia.

Piah hu umo atah karo kajap saong paglong tagok di uranaih, dam dara, tinh Dong Thap kham merat ngak brei bhap bini umo karo kajap meng 75,5 thun tagok; umo thun karo kajap hu meng 68 thun tagok. Piah ngak hu bruk ba tabiak, UBND tinh Dong Thap brei caik hatai ka ka co so pandap nda, kaya y te; paglong prein iek ruak, jru ruak, y te caga ruak, daong iek ruak samar saong pasiam chuc nang; brei buh jien tame ngak y te bhum palei, bhum atah bayah, bhum ceik saong labik daok kan kandah.

Dalam negar hu 30 labik ngak bruk di Tong cuc Hai quan Trung Quoc brei dut iek Cadimi saong 31 labik dut iek jru Vàng O di baoh kayau that pablei tapa Trung Quoc. Dom labik pataom di Ha Noi, Cần Thơ, Quảng Ninh, Đà Nẵng, Đắk Lắk, Lâm Đồng, Đồng Tháp saong Cà Mau. Tui Mentri Ngak nong saong Alam moi truong, bruk ini daong doanh nghiep, HTX  hu palih ruak jabat dut iek tui bruk ba tabiak di Trung Quoc.

Mentri Noi vu Thai Lan birau peih bruk pasang taong abih gah hadei tuk duah mboh bruk ngak suan kadha pakacah di labaoh 5.000 urang kong chuc birau. Kol ini ngak bruk biak kan thau, mbang jien meng 350.000 tal 800.000 baht (10.000 - 21.000 USD) ka yaok mbang palih ruak. Mentri Noi vu Thai Lan khan brei thau langiu bruk brei padeih ngak, dom urang jakar ini njauk bayar veik abih jien bilan hu mbang tui sarak karja.

Negar Mỹ hu yaok rituh mbang urang ruak aih caraoh kayua ky sinh trung di rilo bang dalam negar. Tui dom urang ilamo, ky sinh trung ini pambak ruak tapa ruak tian, cambuai, tapa kaya mbang, ia menyum atau mbaok ndap nda hu anek ruak mai meng urang ruak. Njam patam, baoh karaoh that meyah oh hu rao hacih atau ia pruh nerak. Gah Y te Mỹ kakei bhap bini  brei rao tangin meng japon saong ia hacih hadei nao tame jaman, dalam tuk ngak saong hadei tuk ngak kaya mbang…

Jit Ebola di Cong hoa Dan chu Congo daok pambak praong, kayua bhap bini nao mai ralo labik.  Congo hu 1.561 urang ruak, dalam nan hu 506 urang metai. Lambaok Gah Y te Dunya  di Cong hoa Dan chu Congo khan brei thau ka dom kan kandah praong daok kandong, yau ye bruk ngak tapa prein di dom pasak iek ruak. Sa urang ruak oh taong ruak abih di bhum palei bo nao labik karei ba tui ruak tal dom labik birau./.