Di labaih 2 ha taneh apuh, ong Nguyễn Văn Hào, daok di xa Tánh Linh, tinh Lam Dong pilih ruah phun kruac bung, phun pa-aok blait saong pambuak haong bruk raong glang pabaiy piah ba bruk ngak ka baoh sang. Meng phun jien di Kapul Urang ngak nong, sang ong Hào hu buh jien tame blei 20 drei pabaiy binai, tal ini tapol pabaiy manek hu labaih 100 drei. Meng bruk kham merat yam tapa kan kandah dalam bruk ngak mbang pala drak, thau kuhria ngak mbang, patak pataom dalam bruk cai pandar yaok harei, tal ini sang ong Nguyễn văn Hào padang hu mbang ngui tani tanat, dak harei dak yam tagok ngak meda meng prein ngak bruk di drei. Ong Hào ndom meyai lac:

“Thei thei ngak bruk jeng caong duah jalan ngak bahrau, njauk kuhri kuhria ngak habar ka nyu hu laba. Mek prein drei buh tabiak ngak laba. Nan lac jalan ba tabiak ngak ka bruk salih jalan ngak mbang lac yau nan.”

Jeng yau sang di ong Nguyễn Văn Hào, sang sa-ai Bùi Văn Trọng daok di xa Đồng Kho hu raidiuk meda mbiah yau harei ini jeng mai meng bruk kham merat saong duah hu rilo jalan dalam bruk cak rok patagok kinh te baoh sang. Hu dahlau dom ndap nda kaya ngak nong, kanjah mbie saong taneh pala hareik rilo bo sang sa-ai hu caga pala dahlau di taneh apuh, yaok mbang raong, saai raong hu labaih 60 drei limo, palamek dalam labaih 3 bilan, jien laba mek tame tui kuhria hu labaih 200 trieu dong yaok mbang raong.

Tui ilamo raong glang lamo di sa-ai Trọng, piah raong palamek hu jak jeng, bruk palih ruah pajaih saong jalan sangka iek glang lac jalan ba mai rilo kein lagaih di abih. Langiu di hareik that, pong, nerang hu dahlau, jeng caong pala veik hareik voi, hareik sả pagam haong dom janih pandap mbang srau haong gauk yau ye tapung tangei, tapung brah, kanjah mbie, haleik lac meda raong hu limo palamek biak siam lagaih.

“Raong limo menek urak ini mblang hareik dak harei dak takik, nan ye oh hu labik piah palao. Meng nan, hu hatai sahaneng raong iek dahlau tui jalan pagam sir lac raong palamek, gam menek gam palamek, piah salih labik raong. Ngan haong jalan raong ini, tuk blei sa drei pajaih mbiah 15 trieu, jien buh tabiak dalam meng 10 tal 15 bilan kuhria hu mbiah 15 trieu tal 30 trieu. Tuk pablei, drei halei hu 40 trieu, daok oh ye hu 35 trieu, langiu di taong abih jien buh tabiak ye mek hu laba mbiah 5 trieu sa drei.”

Bruk dreih yau gauk dalam bruk cak rok patagok kinh te baoh sang di ong Hào di xa Tánh Linh saong sa-ai Trọng di xa Đồng Kho lac bruk ngak akaok meti ka oh hu ilamo, oh hu kein lagaih min jalan sahaneng hadah krah. Dom urang nan pala phun hagait saong raong anek hagait bo darak pasar daok khin caong, oh ngak tui jalan meng kan, mboh mikva palei pala ngak ye drei ngak tui.

Dom jak jeng di bruk ngak ini brei mboh danak dak urang ngak nong pacacah ba gauk ngak mbang, pablei salih naih joi patui veik patagok taong abih gah; rik tame daong pambak tabiak hatai ngak mbang kham marat tari taring, hadah krah, khin sahaneng, khin ngak. Gam haong nan, jhul tagok parilo bruk ngak mbang, njauk lagaih haong gah ngak nong, palei pala dalam jaman bahrau./.