Nan hu kadha di sa-ai Trần Tài, yam ndok Kongti TNHH Bimao sinh hoc Viet Nam daok di palei Tân Bình, xa Kim Long, Ban raya Ho Chi Minh (dahlau diah daok di xa Bàu Chinh, huyen Châu Đức, tinh Ba Ria – Vung Tau klak), labik ini ieu lac bhum taneh asar pasak ngak nong. Sa-ai hu pok meyaom lac Urang dam naih gheih di Ban raya Ho Chi Minh thun 2025, mek hu yai ka Dua di danak dak peih mbang ngui dam dara bhum palei dalam negar.

Tui sa-ai Trần Tài, tukvak akaok peih mbang ngui, labik jeng ngak tui jalan bhap bini dalam negar yau nan ye lagaih oh ka hu glaong, kurang bruk karo kajap. Bruk njauk hatai mai tal tuk sa-ai hu kein lagaih nao tapa Japon bac megru, pandar ilamo ngak kong pandar sang mac, majam ngak ta-eng, luac jalan pahacih saong bruk pala tui cara gam srei kandauk. Meng nan, sa-ai mboh bruk ngak nong ilamo ngak kong glaong daong patakik pah urang ngak bruk, paglaong bruk ngak hu saong khik kajap asar siam kaya samu gauk.

Gilac mai nagar drei, gait panduan kongti meng Thu Duc mai Ba Ria – Vung Tau, di taneh labaih 1.200 m2, sa-ai padang sang ngak hu dom labik ngak bruk karei karei di gauk yau aduk bilik oh njom nerak, bilik la-an, bilik tam pabam, bilik raong saong labik ngak jeng kaya, khik kajap yaok bruk hu pasang iek tani tanat.

“Meng harei bo dahlak hulin pandar majam ta-eng ngak, sang ngak di dahlak oh brei ramik pahacih yaok thun, yaok bilan, jeng ta-eng ngak hacih sa-at abih. Urang ngak bruk jeng takik glaih glar jang, var page ye tok brei tame dom gah ngak bruk min.”

Sa-ai Tài lahik labaih 6 thun salah blaoh majam, ngan haong paok jien peih mbang ngui meng akaok meti lac 600 trieu ndong, dalam nan hu 50 trieu phun jien di sa-ai buh tabiak, langiu di nan saai mesraiy piah khik bruk ngak. Tal ini, taong abih jien buh tame ka sang xưởng sang ngak di saai kuhria mboh bih labaih 8,2 ty dong, sa-ai hu patak pataom saong peih praong jang tui yaok tukvak.

Urak ini sang xưởng di sa-ai Trần Tài ngak tabiak kuhria rah tapa hu 100-200 kg bimao thu yaok bilan, rilo abih lac mek hu 600kg. Dalam thun ini, sa-ai kuhria pambuak haong sa labik ngak kaya mbang chuc nang di Amirik.

Sa-ai brei thau, meng akaok meti, gah pambuak bruk kakei blei 2 tan kaya bimao dong trung ha thao yaok bilan. Min, anak prein ngak urak ini, kongti nyaom biai gilac saong kuhria jaln peih praong bruk ngak.

“Meng camriep gah blei khin hu yaok bilan mboh blaoh huac “gaok kan kandah”, kayua urak ini barau ngak hu 100-200kg, rilo abih nyu hu 600kg sa bilan. Hadei di nan, dahlak ba tabiak bruk ngak ginup 600kg sa bilan dahlau, gah pambuak bruk mbaoh tangin min nyu khin hu dalam sa thun brei tagok ginup 2 tan dalam yaok bilan.”

Tui sa-ai Tài, tuk gah pambuak bruk ba tabiak caong khin ralo, labik ngak brei pasiam palagaih bruk, khik kajap bruk ngak saong khik tani tanat bruk pabak kaya suai atah. Sa-ai ndom mayai lac gah ngak nong ilamo kong nghe glaong brei ka hu kuhria atah, buh jien tame ngak tani tanat meng akaok meti piah ka hu karo kajap.

Langiu bruk ngak tabiak ndap nda kaya, dalam rilo thun tapa, sa-ai daok hu daong rilo urang dam dara peih mbang ngui meng rilo bhum palei meng dom ilamo lagaih. Tui sa-ai, gah ngak nong ilamo ngak kong pakat glaong biak khin hu bruk daong meng Karja, abih di nyu nan lac meng phun jien mesraiy, mac jamraik saong salih ilamo khoa hoc kong nghe, piah daong dom urang hu chreih takre min oh ka hu jala kuhria tantu cambaih laih atau bruk pablei tabiak tani tanat meda patagok karo kajap./.