Mai tal labik taneh tuh jaleih di ceik Đá Lăn, yaok gluh baoh sang bangsa Raglai di xa Thuận Bắc, tinh Khanh Hoa, thei thei jeng peih cambuai klao yaom lac bilan hajan angin daok jaik mai tal.

Sa-ai Katơ Thị Phe daok di palei Kháng, xa Thuận Bắc brei thau, dahlau diah, yaok mbang tame bilan hajan, baoh sang di sa-ai mboh suhsah duh hatai kayua huac ceik tuh jaleih. Sa-ai Phe brei thau, bruk sa-ai mboh di akaok meti meng uak takai mai tal labik daok bahrau mboh biak njuel njac, biak sahnang hatai. Oh daok medeih luac malam maong iek ia di angaok halau tuh trun, oh daok gam ndih gam mahit sap danei meng likuk daning ceik.

"Meng labik daok klak panduan tapa labik daok bahrau hu Karja daong tui adat. Hu sang daok bahrau praong laneing lanoi jang, mikva biak bui sambai, daok di labik klak kan kandah oh ngak mbang hagait hu. Mai tal labik bahrau ini jalan nao lagaih jang rilo, blaoh ngak mbang pablei salih jeng hu sahnang."

Dom baoh sang bahrau hu padang khang karo kajap, pabung meng ton bhong di kreh langik hijao laham, daning simang mbau pahe cun bahrau. Tui mikva urang bangsa Raglai di ini abih rai pambuak pagam haong sang tong, sang gak di danak tapen mbuan ceik, ini oh lac sa labik daok pandaok padeih kakai, blaoh nyu lac sa baoh sang daok caong takre dalam hatai meyah oh hu Karja saong bhap bini thraong daong, gait lac dom urang oh sahaneng tal dalau hu.

Bhum ceik di xa Phước Kháng, huyen Thuận Bắc, tinh Ninh Thuan klak, urak ini lac xa Thuận Bắc, tinh Khanh Hoa hu kakei caga lac labik kan kandah kayua bruk cek jaleih taneh tuh saong patau galung trun yaok mbang hu hajan praong.

Piah khik kajap brei ka labaih 50 baoh sang mikva urang bangsa Raglai daok di takai ceik Đá Mài saong Cầu Đá, thun 2022, tinh Ninh Thuan hu peih padang sa labik daok hu praong labaih 7,5 ha, hu taong abih jien buh tame labaih 93 ty dong piah padang bruk panduan rahra tabiak truh bhum ceik jaleih taneh tuh.

Tal ini, hu brei panduan blaoh jaik 40 baoh sang daok dalam bhum njauk kan kandah patau ceik galung nao tal labik bahrau karo salamat; dak harei dak tani tanat raidiuk saong patagok kinh te - xa hoi bhum palei.

Ong Trần Xuân Tình, Phaaok Akaok UB Bhap bini xa Thuận Bắc brei thau, yaok baoh sang daok di ini hu brei padang praong 200m2 di mblang taneh praong 250m2. Dalam tukvak anak jaik tal, bhum palei daok patui jak ba labaih 16 baoh sang karei mai labik daok ini.

"Sarak daong ka yaok baoh sang panduan tame daok ye hu daong padang sang 180 trieu dong brei ka sa baoh sang brei ka dom baoh sang bangsa takik kathaot, jaik kathaot; dom baoh sang karei hu daong 50%. Danak dak pacang caga cek jaleih taneh tuh di Đá Lăn lac danak dak brei labik daok, oh hu labik brei taneh ngak mbang pala drak. UB Bhap bini xa Thuận Bắc jeng hu jalan kuhria likau panuac di UB Bhap bini jao banah taneh hu mek taneh daok (labik klak di mikva) meng jalan lac brei ka mikva ngak mbang pala drak min oh brei daok di nan”.

Thuận Bắc lac xa hu rilo mikva bangsa Raglai, hu labaih 653 baoh sang, dalam nan hu labaih 400 baoh sang kathaot. Raidiuk di mikva rilo meng lac urang ngak apuh ngak nong, pambak tame hajan saong hu dom baoh sang raong glang limo, pabe saong pabo, nan raidiuk biak kan kandah, thun halei jeng hu Karja daong. Mai labik daok bahrau, mikva urang bangsa Raglai diuk di bhum cek jaleih taneh tuh dahlau diah thau dhar phol bruk sangka thraong daong di Ndang saong Karja, kayua tui mikva, labik daok karei ini oh lac labik daok bahrau blaoh daok lac suan yava di sa raidiuk hadah krah siam mekre, karo kajap piah daok dang ngak mbang karo kajap./.