Biar harei ini, Quoc hoi nyaom biai di bilik biai ka dnak dak Hukum salih, pabak dom paka di 10 hukum hu pambuak tal harak gal karja, kein lagaih pablei salih dalam gah ngak nong saong alam langik. Dahlau nan dalam var page, Quoc hoi nyaom biai ka dom danak dak hu pambuak tapak tal bruk daong prein patagok bahrau ka bhum saong negar, nan lac Jalan ngak buh jien tame danak dak Jalan Vanh ndai 5 - Bhum ban ine Ha Noi saong bruk pasiam jalan ngak buh jien tame Danak dak jalan pasei lao Cai - Ha Noi - Hai Phong. Ini jeng lac dom danak dak ha tang jalan kuhria, hu bruk biak praong saong pambuak truh tabiak langiu dom bhum palei hu jalan nao tapa. Dom lambaok vakil ndom lac, bruk Quoc hoi khin lac ngak habar piah danak dak ngak tabiak siam lagaih patagok samu haong kadung jien karja negar buh tabiak, khik kajap jalan patagok kinh te dua lek taka so.

Bo Tu lenh TPHCM birau pabak khaw tin ka 9 kaya kan lac siuk takoi hu duah mboh dalam tuk kuac duah talang liet si di Bein bingu Lê Thị Riêng. Ini lac asar kadha praong, brei thau angan je di dom liet si. Dom harak tai lieu sajarah ka bol lin Biet dong Sai Gon brei mboh, siuk takoi pandar piah thau lac mbang mesruh tuk Tet anek thak Tra - Mau Than thun 1968. Dalam mbang taong kalin kan ini, hu 15 urang lin biet dong var klak rup drei ndih trun ka taneh ia.

Ngak “Danak dak 500 harei melam jhul khang bruk roh duah, pataom saong ngak tantu angan je atau talang bol lin”, tinh Lam Dong hu salah blaoh bruk mek mau AND atau talang liet si, aval drah 3 bilan dut saong jalan ngak ba tabiak. Di 11 kubo bol lin, kapul chuc nang roh duah 100% dalam taong abih 4.776 kubo oh ka thau hu khau tin. Hu labaih 1.150 kubo oh mek hu mau saong mau oh hu ginup kein lagaih pasang iek AND. Luac jalan peih ngak mek mau sinh pham saong ngak taka so atau talang bol lin, dom kapul khik kajap bruk praong glaong ngan haong dom kubo bol lin.

Piah ba mbuan lagaih ka bruk bac da-a di anek saih bangsa raidiuk kan kandah, kham merat bac da-a, sang bac Dai hoc Cuu Long alin brei 12 paok jien bac ka abih dom thun bac ka anek saih bangsa Khmer hu pakacah gam tame sang bac ini. Sang bac Dai hoc Cuu Long caong khin So Bangsa saong Agama tinh Vĩnh Long daong khaw tin piah sarak jien bac hu daong ka dom anek saih  bangsa Khmer  nao bac.  

Yaom lac ia sua di halau angaok biar, Bhum taneran kraong Cuu Long jeng daok mbuan gaok ia sua dauk tuk ia ndik puac thun hu kuhria pathau khan tagok 2,2-2,3m, jaik tal tanut glaong abih. Dom mbang ia ndik biak glaong kuhria pataom tame dalam puac bilan 10 saong puac bilan 11. Dom labik ciuk kan kandah ia dauk trak lac bhum pasak saong tapen tasik. Dom bhum palei hu pachreih kakei brei srap gap pakajap ar pacang, khik kajap ar pacang ia dauk labaih 2,25m piah khik kajap salamat bruk ngak mbang saong raidiuk rahra.

Bol lin daong bala Colombia daok sami samar duah urang ala mbuk patau kayau, dalam tuk urang metai kayua taneh tayun megei  khang 7,4 do richte di gah Pei negar taneh ia ini tagok tal 240 urang saong 3.800 urang lahik. Kuhria rah tapa, mbang tayun megei taneh ba tal labaih 1.495 urang njauk rambuac saong ngak kan kandah tal labaih 350 do thi di 12 tinh. Urang jakar pak ini kakei ka bruk khat lahik meda tagok glong kayua talei phone di rilo bhum palei oh daok pambuak hu.

Piah pacang cakak dom mbang jru mek dalam var mbang huak di sang bac, Jabat Dinh duong Negar Indonesia pandar dom var mbang huak brei hu mbang dalam 4 tuk hadei ngak jeng kaya mbang. Yam ndok Jabat Dinh duong Negar Indonesia ndom khang lac dom var huak hu tapa tukvak daok mbang hu tui adat di nyu ye oh brei mbang dom kaya nan. Gam haong nan pathau khan anek saih oh ba kaya mbang di sang bac nao sang, kayua oh khik kajap kaya mbang daok hacih sa-at atau tukvak mbang kaya mbang.

Urang lahik bruk ngak dalam uranaih di dunya dak harei dak ralo. Tui Gah Urang ngak bruk Dunya (ILO) labaih 67 trieu dam dara lahik bruk ngak thun blaoh. Njauk caik hatai, labaih 257 trieu dam dara, sumu 20% taong abih uranaih di dunya, urak ini oh hu bruk ngak, oh nao bac saong oh pasram hagait. ILO kakei dahlau urak ini oh lac hu hadom bruk ngak bo daok lac ilimo saong bruk ngak lagaih di dom urang umo ranaih./.