Sap Ginang, sap Saranai pok tagok dalam labik ginreih di inem mek Bimong Po Ine Negar, Phuong Bắc Nha Trang, tinh Khanh Hoa. Luac 18 thun tapa, nghe nhan Vạn Ngọc Chí jeng daok kham merat yaih khan dom ilamo siam gheih bhap bini di bangsa drei nao tal tuai damuai dalam saong langiu negar. Nghe nhan Vạn Ngọc Chí brei thau:

“Alat baoh ragu ragam bhap bini di bangsa Cam biak rilo, naih gheih yau ye Ginang, Saranai, Grong gam haong dom janih alat ragam karei. Dom ragam tamia bhap bini jeng biak rilo yau ye tamia adat, tamia ndua buk…Tuk parang iek, meyah tuai damuai sangka saong duah thau, khol dahlak hulin tuk halei jeng srap gap yaih khan ka alat ragam ragu, ilamo saong dom bruk naih gheih dalam raidiuk di urang bangsa Cam.

Hadei di pagam Ninh Thuan dan saong Khanh Hoa hu bhum drap ar ilamo Cam biak praong, atah luac bhum tapen tasik jaik 500 km. Dom bhap bini bangsa Cam di Khanh Hoa ngan haong rahra labaih 100 ribau urang, jeng daok khik ramik dom ilamo siam gheih karei, hu dom palei ngak bruk bhap bini, dom raya adat bhap bini, seni nghe thuat parang iek saong adat cambat bhap bini. Min tapi, bruk ba ilamo Cam tame patagok jirah rivang jak jeng yau Bimong kalan Po Ine Negar jeng daok lac bruk kan si mboh hu.

Tui Pho Giao su, Tien si Lê Chí Công, Akaok khoa Jirah rivang, Sang bac Dai hoc Nha Trang, khin pandar siam lagaih ka kein lagaih meng ilamo bangsa Cam ka bruk patagok jirah rivang bhum palei, brei salih meng bruk jirah rivang bhian tapa rivang iek ilamo dalam, pambuak dom labik mai tal, palei ngak bruk saong bruk dalam bhap bini.

 "Khin patagok asal kadha tuai damuai di Harei Kate, brei salih meng bruk tok mai maong iek raya adat tapa bruk ba drei tame taong abih ilamo bangsa Cam. Bruk hu makna abih ieu lac brei dui atah tukvak daok pandaok, patagok dom danak dak blei salih, kaya mbang saong ba drei tame dalam ilamo hu bayar jien. Di bruk nan, bruk pandar jien rilo abih di tuai damuai oh njauk lac mai meng bruk rivang me-in raya adat, bo mai meng bruk daok pandaok, kaya mbang saong badrei dalam ilamo gheih karei.”

Tui So Ilamo, Pahat padhih saong Jirah rivang tinh Khanh Hoa, taphia bruk khik ramik, Khanh Hoa daok pamaong tal jalan ngak ba drap ar ilamo bangsa Cam jeng kaya ndap nda jirah rivang gheih karei, brei bruk ngak ka bhap bini saong patagok prein dui pachreih di labik jirah rivang. Ong Lê Văn Hoa, Phaok Yam ndok brei thau, dom bruk paglaong siam lagaih di labik gah Barak Khanh Hoa brei dak harei dak hu peih praong tal dom bhum hu rilo mikva urang bangsa takik diuk rai.

"Tukvak anak daok tal, khol dahlak hulin brei pataom tame prein ngak buh jien tame ka palei menyim jih dalah palei Caklaing, palei ngak gaok glah lan am Cam palei Hamu Craok saong dom drap ar ilamo Cam karei piah dak harei dak jeng dom kaya ndap nda jirah rivang gheih karei, dreih yau bruk daok paglaong siam lagaih di labik gah Barak di tinh. Gam haong nan, gah ilamo brei bad om danak dak seni, parang iek bhap bini Cam tal dom labik inem mek, dom bimong Cam piah duh ka tuai damuai jirah.”

Meng dom sap Ginang yawa tagok yaok harei di Bimong kalan Po Ine Negar mai tal dom palei menyim jih dalah Caklaing, palei ngak gaoh glah Hamu Craok daok cang hu pambuak jeng kaya ndap nda jirah rivang siam taong abih, luac jalan pamedeih ilamo Cam siam gheih jeng daok rilo bruk daok ngak. Tuk inem mek hu khik ramik meng prein diuk di raidiuk jaman bahrau, ilamo Cam oh lac hu khik ramik blaoh daok jeng sap rein brei ka bruk patagok jirah rivang karo kajap di Khanh Hoa./.