Di xã Bác Ái Đông saong sak Bác Ái, tỉnh Khánh Hòa, danak dak “Patagok raong glang pabui juk tui jalan huu co” hu peih ngak di palei oh lac tok sa janih daong brei anek pajaih pabui blaoh nyu daok brei panduan jao ilamu, tacei pato ilamu raong glang tui jalan ilamu barau jeng ye dak padang bruk raong meteh karek meteh palao laghaih tui taneh riya langik taisk di bhum ceik. Meng nan, ngak daong brei khik ramik hu halaw gen biak hu yaom ini, cak rok patagok bruk ngak mbang blei salih di palei saong dak harei dak ngak brei paglaong rai diuk ka bhap bani. Thac si Lê Thị Kim Tuyến – Sang bac Đại học Ngak nong ban raya HCM khan brei thau:

“Sang bac hu padang ngak angan je Pabui juk Bác Ái. Ini lac jalan ngak piah daong ka mikva grap tanat bruk ngak mbang saong tapa truh kathaot khang kajap”.

Yau nan min, gam saong dom mikva oh hu daong meng dom danak dak ye daok gaok kan kandah prong abih dalam nan hu lac kurang anek pajaih piah patui ngak saong cak rok patagok tapul nyaom. Bruk blei anek pajaih gaok rilo kan kandah, yaom kaom oh tani tanat, ngak pambak tapak tal bruk peih prong raong glang. Amuk Katơr Thôn – urang daok di palei Ấn Đạt, xã Thuận Bắc brei thau:

 “Pabui juk kan duah blei, manuac urang jeng takre. Drei pablei yaom jeng lap, pabui sit jaik 300 ribau sa drei, pabui prong ye karei”.

Dalam tuk nan, rilo baoh sang jeng daok ngak tui meng kan, pandar pandap mbang hu blaoh piah patrun jien ndo. Tui amuk Patâu Asah Thị Dui – palei Ấn Đạt, xã Thuận Bắc:

“Raong pabui ye drei jeng hu bruk ngak, hu bei pleim ye blei ka pabui mbang. Thei caong khin ye drei pablei pajaih, min jeng khik veik meneng, pablei abih ye hadei ini oh daok pajaih piah raong”

Sa-ai Tapu Tâm – Akaok Mban ngak bruk Mặt trận palei Ấn Đạt, xã Thuận Bắc brei thau, anak meta brei mboh, meyah hu daong njauk jalan – meng anek pajaih, ilamu tal darak pasar blei tame – bruk raong pabui juk puk palei di Thuận Bắc ye meda hu jeng ngak mbang khang kajap. Kayua yau nan ye, karja puk palei saong bhap bani thei jeng caong mong hu mbluak dom sarak daong ba biak biai jang, abih di nyu lac anek pajaih saong labik tabiak pandap panda.

 “Mikva meng lavik mai jeng raong pabui juk. Urak ini anek pajaih nyu daok takik, caong khin hu Karja sangka piah raong ka nyu prong. Karja ye khin hu sarak  daong ka labik pablei tabiak yau dak padang hợp tác xã piah mikva raong glang, cak rok patagok kinh te, suai lavik ye dak padang pandap biak karei pabui juk di Thuận Bắc jeng yau di tỉnh Khánh Hòa. Caong khin dom pakat, dom gah sangka tal pabui juk di mikva, abih di nyu lac di bhum ceik”.

Mboh di meta brei ka bruk piah khik ramik saong cak rok patagok pajaih pabui juk palei ye karja saong gah ngak nong njauk samar drah daong dak padang tapul pajaih hu asal di puk palei, tacei pato ilamu palih ruah anek pajaih, juak pajaih njauk ilamu; gam haong nan pambuak pagam asal kadha pacang khik anek athur raong puk palei haong dom danak dak cak rok patagok bruk ngak mbang khang kajap di bhum urang bangsa takik saong bhum ceik dalam tỉnh./.