Dahlau diah gam saong 5 kong taneh hamu, yaok thun baoh sang saai kamei angan Đặng Thị Loan daok di Bình Hiếu, phuong Long Bình pala hu dua mbang padai. Mboh bruk ngak padai jien mek tame oh karo tani tanat yau nan ye sa-ai Loan marat hatai kuac danao raong ikan pajaih. Tukvak mbang akaok meti sa-ai pataom prein tame raong dom janih ikan pajaih yau ye ikan kadah tadaoh, ikan kan, ikan jhak… Hadei rilo thun pagam haong bruk ngak, sa-ai hu buh jien tame ngak kaya piah paglaong yaom kaom ndap nda pablei.

Sa-ai Loan srap gap padang majam pambuak meng bruk raong ikan pajaih tal pablei ikan mek ralo di dom baoh sang raong piah ngak kaya, gam khik kajap akaok pablei tabiak brei ka urang raong, gam srap gap halau pandap tamo duh bruk ngak luac thun. Tui sa-ai Loan, salih ka bruk pablei ikan that hu yaom labaih 60.000 ndong/kilo, hadei ngak kaya yaom kaom kaya tagok dua mbang.

"Urang raong ikan, drei blei ikan mai ngak jeng ndap nda kaya kan, tabiak jeng kaya meng pablei tabiak darak pasar, kaya hu ikan kadah tadaoh mek talang, ikan ndam janih ngak pahe bangi haong chả. Drei pablei ikan that ye urang kateik yaom, daok drei ngak yau ini ye urang oh kateik yaom.”

Tukvak blaoh tapa, labik ngak tabiak jeng kaya kan, Võ Đình Chiến di sa-ai Loan hu ngak rilo kaya yau ikan kadah tadaoh mek talang, chả ikan, ikan kadah tadaoh pandam dom janih brei ngak ka nyu mbau pahe bangi, rik thu ikan jhak… Dalam nan, kaya ndap nda ikan kadah tadaoh ndam janih ngak pahe bangi hu brei OCOP 3 patuk. Urak ini yaok bilan, sa-ai Loan pabak labaih 500kg kaya ndap nda ikan hu ngak ba tabiak darak pasar. Oh tok patagok kinh te baoh sang, labik di sa-ai Loan daok lac labik brei bruk ngak ka rilo adei sa-ai kamei baoh sang kan kandah di bhum palei. Sa-ai Huỳnh Thị Trúc Linh, daok di Bình Hiếu brei thau:

"Sang dahlak hu klau kong taneh hamu. Bhian ye daok di sang dahlak gam iek glang anek gam ngak hamu, pasang dahlak ye nao ngak apah. Tuk lahei tukvak ye adei mai di ini ngak. Jien mek tame sa harei jeng tani tanat. Urak ini jien mek tame piah yaom bilan pandar ka anek nao bac, blaoh blei kaya pandar dalam sang.”

Sa-ai Huỳnh Thị Duyền – Akaok Kapul Urang Kamei Viet Nam phuong Long Bình taong yaom, bruk di sa-ai Đặng Thị Loan lac sa dalam dom bruk di urang kamei ngak mbang naih joi. Dahlau diah rilo adei sa-ai kamei hu ngak hamu, ngak bein atau ngak apah tui tukvak nan bruk ngak oh tani tanat. Labik ngak kaya ikan di sa-ai Loan hu brei bruk ngak ka urang kamei di ini pandar dom tuk lahei tukvak, hu jien mek tame di bhum palei blaoh oh njauk nao atah duah bruk.

"Bruk ini jeng daok dalam luac jalan patagok ban medin karo saong brei bruk ngak ka labaih 10 adei sa-ai kamei ngak bruk di bhum palei. Jaik tal Kapul brei hu dom khau tin pathau khan yaih khan peih praong dalam dom adei sa-ai kamei hu kein lagaih piah ngak bruk ini, njauk ndom tal lac brei yaih khan ka halau drei pajaih khik kajap asar siam piah adei sa-ai kamei raong hu siam lagaih.”

Tapa bruk ngak di sa-ai Đặng Thị Loan brei mboh, ini oh lac asal kadha truh tapa kan kandah ngak kaya meda di sa urang ngak nong, blaoh daok brei mboh brei ka siam lagaih di danak dak urang kamei ngak mbang, daong patagok kinh te baoh sang, padang palei pala bahrau dak harei dak gheih siam ginup meda./.