Subuh page aval, Mblang pajeng ba pabah tasik Phan Thiet hu bak dom sambai chreih chrai. Dom baoh ghe gilai ikan, gaiy adat hu ramik caga hala dok ngu hanh, huong an, caing, hagar; dom urang taha nao tasik ngui cuk ao dhai bangsa, khan kak akaok pataom srap gap ka adat raok yang. Njauk tuk 7, kapul gilai tabiak tasik, tabiak pulao Hòn lao ngak adat bhap bini, hadei di nan gilac mai pabah bambang Cồn Chà. Meng di ini, yaok rituh urang nao tabak takai tui raok yang tapa dom jalan tapen kraong Ca Ty, dahlau tuk mai Danaok Vạn Thủy Tú salah blaoh bruk adat.

Adat raok Sap Lệnh Ông Sanh gam saong adat duh yang Po Nam Hải, atau Ong Ikan, di rahra tapen tasik. Tapa blaoh adat, urang nao tasik likau ka taneh ia palei pala po pajeng siam makre salamat, tasik siam, angin lagaih, gilai tabiak tasik salamat, pandar lagaih. Ong Phạm Triều, urang nao tasik hu labaih 45 thun pambuak pagam haong tasik, klah rabha panuac brei thau:

“Adat ini hu angan dalam hatai dom urang nao tasik yau ye khol dahlak hulin, nyu jeng brei thau lac bruk ngak meng kal lak dak dia mai tal ini. Tal harei Adat ngak yang Likau ikan, mikva likau ka taneh ia palei pala siam makre, ngak mbang tani tanat, nao tasik salamat, ginup meda, gaok rilo patuah jamo”.

Gam tui adat raok yang, banah adat di Danaok Dinh Vạn Thủy Tú daok hu adat tiên yết, giỗ sắc, adat bế hoàng saong adat palao gom di kraong Ca Ty. Banah harei raya hu adaoh bả trạo, adaoh bội, adaoh bài chòi, tamia lan-su-rong, kadha me-in bhap bini, adaoh tamia di jalan ban medin, nyaom darak pablei salih saong labik kaya mbang hu angan di Phan Thiet. Tapa nan, rahra saong tuai damuai hu kein lagaih duah thau raidiuk, tanarakun saong ilamo di rahra nao tasik. Ong Đào Quang Thanh, Phaok Akaok UB Bhap bini phuong Phan Thiet, ndom lac bruk pacang khik raya adat brei ka rah ra bhap bini urang nao ngak mbang tasik di labik pasak, gam haong nan ndam gam haong jirah rivang njauk lagaih:

“Bruk hu makna abih ieu lac hu adat brei peih ngak di bruk iek praong adat cambat, adat bhap bini saong brei ka bhap bini urang nao tasik ngak po. Bruk pambuak pagam adat saong jirah rivang jeng hu palih ruah, khik kajap gam yaih khan ilamo nao tasik Phan Thiet, gam oh ngak lahik bruk praong prang saong hu yaom glaong gok agha di adat”.

Di bruk patagok di ban medin, jitvu saong jirah rivang tasik di tinh Lam Dong, dom urang nao tasik, Danaok Dinh Vạn Thủy Tú, sap adaoh bả trạo saong kapul raok yang di angaok kraong Ca Ty jeng kakei kanal gadar ka ilamo siam gheih di Phan Thiet. Adat Ngak yang Likau ikan kayua yau nan ye oh lac sa janih brei khik ramik hatai je di urang nao tasik anak dom mbang tabiak kulidung, blaoh daok patui veik binguk yava di sa bhum nao tasik, piah ka dom yaom kaom ilamu nan hu brei caik rai harei hadei, pambak tabiak saong daong ngak meda kaya ngui ilamo di Lam Dong jalan patagok bahrau./.