Tinh An Giang hu yuak labaih 861.000 ha padai meng akaok thun tal ini, bruk mek hu kuhria rah tapa 7,05 tan/ha, mek hu labaih 6 trieu tan, mek hu labaih 69% jalan ngak di thun 2026. Njauk caik hatai lac, padai asar siam meblah labaih 74% taong abih padai yuak hu, gam haong labaih 4,5 trieu tan. Ong Lê Hữu Toàn, Yam ndok So Ngak nong saong Alam langik tinh An Giang, brei thau gah ngak nong di tinh hu srap gap peih ngak lagaih dom jalan kuhria cakrok, truh tapa dom kan kandah kayua langik rah tabiak oh bhian, tapa nan khik karo kajap bruk tani tanat dalam ngak tabiak kaya mbang.

Gah ngak nong tinh patui jhul khang bruk pandar ilamo ky thuat, patagok gah ngak nong tathuak nerak biar, paglaong padai asar siam; gam haong nan ngak siam bruk kuhria pathau khan, pasang iek kaya ngak jhak saong pasiam halau ia duh ka bruk pala drak salamat, siam lagaih. Dalam gah ngak mbang, bruk pala padai di An Giang daok panduan salih tui yaom kaom patagok, patakik taneh dom pajaih padai pakat biar, pataom tame dalam dom janih brah pahe, brah siam glaong duh ka bruk pablei tabiak saong pandar dalam negar. Ong Lê Hữu Toàn brei thau:

“Gah ngak nong thun ini cakrok lac sa di dalam dom bruk ngak hu khol dahlak takre di abih. Hadei pagam jeng sa, gah ini jeng khik tani tanat prein cakrok saong rik daong ka cakrok di tinh. Ini lac bruk kham merat biak praong di gah ngak nong. Ngan haong dom bruk pandar ilamo kong nghe glaong hu paglaong, dalam nan njauk ndom tal lac Danak dak 1 trieu ha mek hu labaih 150.000 ha tui caong khin, saong njauk ndom tal lac nao tal hu dom bhum ngak tabiak padai ka mikva."

Sa di dalam dom bruk naih gheih ngak tabiak padai di An Giang lac peih ngak Danak dak “Patagok karo kajap sa trieu hecta taneh hamu padai asar siam saong tathuak nerak biar pagam haong cakrok hijao bhum taneran Kraong Cuu Long tal thun 2030”.

Dalam mbang ngak padai Dong Xuan 2025 – 2026, tinh hu peih praong danak dak taneh padai siam glaong njauk tanut tathuak nerak biar jaik 160.000 ha, padai yuak hu labaih 1,2 trieu tan. Mbang pala He Thu 2026, taneh pala mek hu labaih 160.000 ha, kuhria padai yuak hu labaih 965.000 tan.

Sa urang ngak nong daok di xa Tân Hội hadei tuk hu bac tangi pandar jak jeng bruk urang pandar bruk padai asar siam tathuak nerak biar ye hu pandar peih praong tabiak 6ha ka baoh sang, brei thau:

"Hu ilamo di ini paje, tabiak pandar di langiu oh hu hagait kan kandah abih, rahra biak njauk hatai, yau mbang pala ini danak dak hu salah blaoh meng thun blaoh min urang ngak nong jeng pandar tui danak dak jeng biak siam. Drei mboh hu kein lagaih nan ye khin hu ma so bhum pala praong tabiak piah hu adat praong ka HTX, ka bhum palei."

Thun ini, gah ngak nong An Giang patui pathau khan, jhul tagok peih praong taneh ngak Danak dal 1 trieu ha padai asar siam, tathuak nerak biar. Ngan haong bruk patui peih praong taneh padai asar siam, tathuak nerak biar, An Giang daok dak harei dak hu panduan salih meng jalan paglaong kaya mek hu tapa paglaong yaom kaom saong siam lagaih bruk ngak tabiak.

Gam haong pasiam prein ngak ka dom HTX, paglaong pambuak di gah ngak mbang pablei salih saong urang ngak nong, tinh An Giang pamaong tal ngak jeng bhum ngak tabiak padai tani tanat, pabak siam jang ka hatai caong khin di darak pasar saong daong patagok gah ngak nong hacih hijao, karo kajap.