Tamia hagar Chhay-dăm saong tamia Kala ieu lac dua janih seni bhap bini gheih karei, daong ngak jeng ilamo karei di urang bangsa Khmer di Tay Ninh. Tamia hagar Chhay-dăm hu brei angan lac drap ar ilamo oh mboh di meta thun 2014. Bruk naih gheih di janih seni ilamu nghe thuat ini lac bruk pambuak di ragam ragu hagar haong dom thaik rup khang kadang, bangi tangi gheih mata.

Urang tamia oh sa janih pah hagar meng tangin blaoh daok pandar meng kuk kieng, meng ta-uk, tanduan takai, pambuak pagam saong pala ban li-u, ngak jeng bruk parang iek biak bangi maong. Oh khin hu phling, ragam hagar jeng binguk yava, brei mboh hatai sahnang saong prein diuk di bhap bini urang bangsa Khmer…Amuk Cao Thị Thu Loan, urang pato tamia hagar di phuong Hòa Thành, tinh Tay Ninh, brei thau:

 “Hu nao parang yaih iek di rilo labik, drei bac tangi sua hu rilo kadha gheih piah pato ka anek taco, ka dom adei sit. Jien piah pandar di puk palei daok kan kandah, nan tuk hu Karja daong, khol dahlak dak harei dak hu daong prein piah buh abih prein, patui veik khik ramik saong paglaong seni nghe thuat bhap bini di bangsa.”

Khik ramik ilamo oh sa janih daok di bruk khik tani tanat dom janih seni bhap bini brei mboh dalam raidiuk bhian harei. Di phuong Long Hoa, tinh Tay Ninh, adat cambat Cao Dai, bruk ngak pablei salih saong ilamo di bangsa Khmer ngak jeng rilo mbaok meta di bhum palei.

Tui ong Nguyễn Hoàng Nhã Trúc, Akaok jabat Ilamo – Rahra phuong Long Hoa, bhum palei pambuak haong dom labik ugama Cao Dai dalam bruk pathau khan, jak ba; gam haong sangka daong mikva bangsa Khmer salah blaoh harak khan menek, kat can cuoc rahra saong tut angan khan brei thau labik daok. Sang ilamo Khmer di khu pho Trường An jeng hu pasiam, pabak kaya ndap nda, brei kein lagaih pia mikva khik tani tanat bruk pambuak me-in bhap bini saong khik ilamo bangsa siam gheih. Gam haong di nan, bhum palei sangka iek praong padang raidiuk ilamo di labik daok rahra, paglaong bruk di dom gah saong kapul nyaom dalam pathau khan, jak ba rahra. Ong Nguyễn Hoàng Nhã Trúc brei thau:

 “Mboh hu dom kan kandah, tavak tavaiy di angaok jalan peih padang raidiuk ilamo di labik daok rahra, Jabat Ilamo hu nyaom biai haong Ndang uy, UB Bhap bini phuong padang jalan ngak, patabiak dom jalan langyah cambaih laih. Khol dahlak brei mboh ini lac bruk ngak chinh tri, brei ka hu sa majam chinh tri tame bruk, oh njauk lac bruk karei di gah ilamo. Dalam nan, bruk pambuak di dom gah gam haong pathau khan, jak ba rahra bhap bini ieu lac bruk njauk ngak piah padang raidiuk ilamo di bhum palei.”

Meng khik ramik seni bhap bini tal padang raidiuk ilamo bhap bini, dom yaom kaom bhap bini daok peih tabiak kein lagaih patagok jirah rivang. Tui ong Ngô Trần Ngọc Quốc, Akaok Kapul Jirah rivang tinh Tay Ninh, gah ngak mbang pablei salih bhum palei hu kein lagaih thau ka bhum taneh, adat cambat saong raidiuk rahra, tapa nan ngak tabiak kaya ndap nda hu inem karei. Kaya mbang taba, seni bhap bini Khmer, raya adat saong palei ngak bruk meda hu ngak jeng dom bruk ba drei tame dui pachreih meyah hu pandar lagaih, iek praong yaom kaom tamo.

 “Kein lagaih di jirah rivang Tay Ninh ieu lac labik daok dalam kreh bhum taneran saong bhum ceik car, gam haong majam palei ngak bruk, inem mek sajarah saong rilo janih jirah rivang meda. Kapul Jirah rivang tinh caong khin paglaong prein dalam, padang majam he sinh thai pambuak di dom gah ngak mbang pablei salih dalam tinh. Gam tui nan, tapa bruk ngak pambuak langiu, yaih khan kaya kan, labik mai tal di Tay Ninh nao tal dom tinh, ban dalam negar saong di dom halau dhan khau tin negar, piah tuai damuai dunya jeng thau tal saong palih ruah Tay Ninh.”

Khik drap ar ilamu oh sa janih lac khik ramik blaoh daok ba ilamo nao tame raidiuk, brei bruk ngak saong paglaong prein dui pachreih di sajarah. Bruk jum tangin di bhap bini, karja saong gah ngak mbang pablei salih brei mboh ka prein diuk di drap ar ilamu.