Tinh Binh Phuoc klak, urak ini lac Ban Dong Nai, meng dahlau mai hu thau angan dalam nagar lac labik pala rilo pa-aok blait, meblah labaih 50% taong abih taneh pala pa-aok blait dalam negar. Meyah yau dahlau diah, urang pala pa-aok blait tok randap haong bruk pablei asar tamo atau hana haong sara, asar asar pa-aok blait… ye urak ini, jalan sahaneng ngak nong hu salih.

Di HTX Hoàng Anh, phuong Bình Phước, Langiu di dom kaya OCOP bhian randap meng asar pa-aok blait, rahra hu pandar rilo abih baoh pa-aok blait klak thaoh piah ngak jeng alak pa-aok blait saong ia mesin baoh pa-aok blait. Amuk Nguyễn Thị Dung, urang dalam HTX Hoàng Anh brei thau:

"Dahlak hulin mboh mikva urang ngak nong rilo meng lac pataom blei saong pandar meng asar, blaoh baoh ye biak rilo dut saong asar nan klak thaoh ye biak palai. Kayua yau nan ye, khol dahlak khin paarilo jien mek tame ka mikva saong pandar rilo abih halau kaya tamo hu dahlau. Baoh pa-aok blait hadei di tuk pataom blei, ngak kaya di bein ye brei tram tui tukvak biak suai, meng 6 tal 9 bilan, blaoh tapa dom luac jalan ngak hacih, ngak jeng kaya meng patabiak jeng ndap nda”.

Hadah krah dalam bruk ngak nong oh hu sa janih di HTX, di Kongti TNHH Pablei salih saong Jitvu OHAL, labik 7 urang meng dahlau hu ngak gru pato di Sang bac Dai hoc Thủ Dầu Một, Ban raya HCM padang tabiak, hu roh duah, paglaong bimao linh chi jeng dom kaya rilo yau ye ia taiy linh chi, ia taiy linh chi galau asar, sua masam linh chi tahana sấy saong jabon hu ngak meng linh chi. Tui sa-ai Lê Duy Khánh, Phaok Yam ndok Kongti dom gah ngak mbang pablei salih peih mbang ngui meng kaya nong urak ini jeng daok gaok rilo kan kandah:

"Urak ini, dom gah ngak mbang pablei salih gaok kadha praong dalam bruk marketing kaya kan, pathau khan, yaih khan ilamo di kaya. Khol dahlak hulin caong khin hu rilo kenh piah yaih khan angan je, ba kaya kan nao atah jang. Hu rilo kein lagaih taom gaok, peih praong darak pasar ye jeng caong khin hu daong ka phun jien”.

Dong Nai daok hu thau lac labik raong rilo pabui, menuk rilo abih di dalam negar, gam haong nan hu dom bhum pala phun mbang baoh praong yau ye durian, patei, kruac bung…Urang ngak nong Dong Nai daok pasamar patagok dom bruk pala saong raong glang pandar ilamo kong nghe glaong, piah parilo kaya kan, ba angan je kaya nong bhum palei “papar atah”. Yaom lac, kadha katih ba tabiak urak ini jeng lac kein lagaih pambuak pablei salih haong gah langiu. Amuk Hoàng Thu Hiền, Taong Yam ndok Kongti TNHH Buh jien tame saong pablei tabiak blei tame muk Thu Hiền taong yaom lac, gah patabiak tui jalan bhap bini atau dom palei ngak bruk yaom lac biak naih joi ngak tabiak kaya kan siam glaong, min gilac patakik ka ilamo pablei salih saong takik hu kein lagaih pambuak haong darak pasar gah langiu. Kayua nan, karja palei khin hu bruk ngak talei pambuak, srap gap pei jalan ka jalan pablei salih.

"Bruk praong ieu lac karja palei brei pambuak, daong peih tal pato pakai ka gah pablei tabiak ka tanut chuan ka asar siam kaya kan, bruk ngak kaya pathau khan njauk tanut di nyu, pathau khan gok agha di nyu cambaih laih saong salah blaoh harak bi-ar piah pablei tabiak darak pasar. Gah pablei tui palei ngak bruk bhap bini oh ka hu rilo kein lagaih tame darak pasar gah langiu.”

Meda mboh lac, kein lagaih dalam bruk salih jalan sahaneng hadah krah di urang ngak nong ini hu srap gap. Min, piah kaya ngak nong biak hu darak pasar saong padang khang kajap di darak pasar dunya, bruk kham merat meng gah rahra lac oh ka ginup. Tuk karja mek njauk arak, langyah njauk bruk mahu di urang ngak nong saong gah ngak mbang pablei salih, kaya nong Dong Nai oh tok padeih di asal kadha patruh kathaot, blaoh daok brei uak drei patagok jeng bruk naih gheih brei ka bruk ngak nong ba akaok negar./.