Lac sa taneh bhum ngak padai dang takai pasak di negar, yaok thun bhum taneran kraong Cuu Long ngak tabiak labaih 25 trieu tan padai, hu makna dalam bruk khik kajap an ninh kaya mbang saong pablei tabiak padai brah di Viet Nam. Min, khat lahik dalam majam padai brah di Bhum taneran kraong Cuu Long jeng daok di tanut glaong. Ong Tô Văn Huấn, Kuk Pala saong Pacang khik phun kayau, Mentri Ngak nong saong Alam langik brei thau, ngak tabiak padai di Bhum taneran kraong Cuu Long daok gaok rilo kan kandah meng langik salih karei, bruk pandiak bhang saong njom ia mbak. Gam haong nan di bilan hajan bruk yuak padai, bambu padai gaok rilo kan kandah, kajhah jhak tal asar siam.

"Bhum taneran kraong Cuu Long jaik 25 trieu tan padai/thun ye khol drei jeng jaik sumu yau nan lac dom pong nerang, asal kadha khol drei pandar yau habar piah paglaong hu siam lagaih pandar pong nerang, njauk ndom mayai tal lac haong 2 mbang ngak padai hu kein lagaih, tukvak yuak padai di bilan hajan yau ye mbang pala Thu Đông saong Hè Thu, ye 2 mbang pala ini biak kan kandah. Ini jeng lac kadha katih ba tabiak dom kaya patagok meng pong nerang."

Tui dom roh duah, piah patakik khat lahik dalam majam padai brah brei ngak samu meng bruk ngak tabiak, yuak padai, pajeng ba, bambu, khik ramik tal chai padai saong pablei. Gam haong di nan salah blaoh ka jien padai, sarak daong, tanut chuan asar brah saong patagok pambuak dalam chuoi yaom kaom.

Tapa roh duah dom bruk ngak di dom tinh Dong Thap, An Giang saong Vinh Long, amuk Trần Thị Thanh Nhàn, Mbang Darak pasar saong Gah kaya kan, Jabat Kuhria, Sarak Ngak nong saong Alam langik brei thau, piah patakik khat lahik dalam majam padai brah khin hu salih bahrau ilamo kong nghe, kapul ngak tabiak padai, pambuak darak pasar saong bruk daong:

"Tui bruk ngak padai di mblang hamu saong hadei yuak kuak ye khol drei hu dom bruk cambaih laih pambuak tal bruk patapak mbaok taneh hamu meng tia laser, atau lac yuak meng jamraik rilo jang, dil samu jang. Daok hadei di yuak padai ye pajeng ba samar saong bambu dalam 24 tuk jam atau ilamo ngak kong brei bambu ka nyu thu, khik di gilang hadah krah. Daok gah ngak tabiak kaya saong pasiam majam yaom kaom ye hu chai padai saong hu papaok majam pagam dom yaom kaom."

Khat lahik hadei di yuak kuak padai brah tamuh tabiak di rilo gah, meng yuak padai, bambu thu, chai tal khik ramik. Yaom lac rilo gah hu pasasiam, yau jamraik yuak kuak meng jamraik yuak paoh saong pandar dom bruk bambu karei gauk, jeng daok bruk piah paglaong siam lagaih, patak pataom nang luong saong patakik khat lahik.

Ong Lê Minh Hùng, Yam ndok Jabat Co ndien Gah ngak nong saong Ilamo ngak kong hadei yuak padai brei thau, piah patakik khat lahik hadei yuak kuak, taphia bruk pasiam kong nghe, kaya, bruk padang saong ngak tui jalan njauk chuan di yaok jalan mngak hu makna dalam luac jalan ngak tabiak, daong paglaong asar siam brah di Bhum taneran kraong Cuu Long.

"Biak kan ka khol drei kayua meda salih taong abih majam di jamraik, min khol drei meda pasiam binah halei khol drei oh njauk piah buh tamne ka jamraik bahrau, pasiam nyu. Sa bruk karei lac khol drei meda dang ka bruk paglaong hu luac jalan ngak tabiak meng bruk khol drei meda pagam dom kong nghe bahrau AI, IOT, dom cam bien brei daong ka khol drei peih ngak, pasang iek dom bruk ilamo ky thuat khol drei ka njauk, tani tanat jang."

Cambaih laih lac, pandar ilamo khoa hoc, kong nghe, ngak jamraik samu gauk, pasiam jalan yuak kuak, bambu saong khik ramik, gam haong paglaong pambuak jeng majam dom jalan langyah piah patakik khat lahik hadei yuak kuak. Bruk peih ngak samu gauk dom jalan langyah brei daong patakik khat lahik, pabak hatai caong di darak pasar, pamaong tal patagok gah padai brah bhum taneran kraong Cuu Long./.