Di mbon palei Bia Ray, baoh sang sa-ai K’Ming hu 1,6 ha taneh ngak mbang, dalam nan hu 8 sao hamu padai, 6 sao kophi saong 2 sao njam patam. Salih ka bruk khik tani tanat taneh pala padai oh hu lagaih, sa-ai salih tapa pala njam, pagam saong pasiam bein phun kophi saong pandar pajaih padai asar siam. Meng nan, yaok thun baoh sang mek tame laba labaih 200 trieu dong, hu kein lagaih tani tanat raidiuk saong buh jien tame ngak mbang pala drak veik. Maong gilac dom salih dalam kinh te baoh sang, sa-ai K’Ming chreih chrai ndom lac:

“Meng tuk salih sa binah taneh tapa pala njam patam hu ba mai jien tame tani tanat ka baoh sang. Langiu di nan, baoh sang hu pagam pasiam bein phun kophi, pala dom pajaih padai asar siam, kinh te baoh sang hu tani tanat saong meda tagok yaok harei.”

Bruk salih di Tân Hội daok brei mboh dalam hatai padang palei pala bahrau, khik ramik thaik thaot saong patagok ta-eng thau khik ramik di bhap bini. Di mbon palei Srê Đăng, labik hu palih ruah piah padang palei pala bahrau kieu mau, mikva bah ramik hacih jalan palei, pala bangu, pasiam labik daok rahra. Ong Liêng Hót Ha Kim, urang hu angan je di mbon palei Srê Đăng bahrau:

“Dalam luac jalan padang, khol dahlak hulin hu pathau khan mikva ngak bruk ramik hacih sa-at jalan palei, pala bangu di 2 tapen jalan. Njauk ndom tal lac, jak ba salih taneh pala phun kophi taha tapa pala njam patam bangu saong dom janih phun pala ba mai siam lagaih.

Di xa bhum atah bayah Quảng Sơn, dom danak dak jalan ngak pakat negar gam daong pajaih, kaya kan, ky thuat di karja saong dom labik daok daong rahra patagok bruk ngak mbang. Xa hu labaih 23.000 rahra, dalam nan hu bhap bini bangsa takik.

Baoh sang amuk Nguyễn Thị Nẩy daok di palei 3A meng dahlau hu daok dalam sarak baoh sang kathaot kayua bein phun kophi yaok baoh sang kathaot kayua bein caphe taha. Hu Kapol Kinh te – Quoc phong Quảng Sơn, Quan khu 5 daong ramik pasiam bein phun, hadei 3 thun, brei paik baoh, njam patam  labaih 5 tấn hecta, glong dua mbang dut haong dahlau diah.  

 “Dahlau diah baoh sang kan kandah, bein phun kophi taha, ba mai kein lagaih biar. Meng labik Quoc phong daong khak drak, pagam pasiam saong tacei ba ilamo ky thuat nan bein phun patagok siam jang, baoh sang jeng patruh kathaot. Urak ini anai daok klah rabha kan kandah gam haong parilo pajaih, patagok bruk ngak mbang.”

Gam haong bruk daong ngak tabiak kaya kan, dom danak dak jalan ngak pakat negar daok daong buh jien tame ka ha tang jalan mbak saong dom danak dak njauk hu, pasiam kein lagaih bruk pambuak me-in daok dang haong gauk dalam mikva bangsa takik. Taong abih jien buh tabiak ngak dalam bhum xa Quảng Sơn dalam tukvak peih ngak danak dak mek hu labaih 200 ty dong.

Lam Dong urak ini hu labaih 683.000 rahra bangsa takik, hu 17,6% rahra dalam tinh. Piah pamaong tal jalan ngak tal thun 2030 lac oh daok baoh sang kathaot, tinh brei pagam halau prein bu tame haong paglaong prein ngak tabiak, brei bruk ngak tani tanat saong paglaong hatai ta-eng thau bruk di drei di rahra. Tuk bhap bini srap gap salih bahrau jalan sahaneng, bruk ngak, halau prein daong jeng kein lagaih ka bruk patruh kathaot karo kajap, padang mbon palei trei sir, siam mekre, meda ilamo./.