Var malam puac adit, sang bhap bini mbon palei Đắk N’Drung, xa Đức An, tinh Lam Dong chreih chrai ragam kong caing. 25 urang dalam kapul hu dom urang nghe nhan tapak tacei ba yaok ragam caing, meng bruk taong caing tal bruk taong habar ka njauk ragam. Tapa yaok var pasram, sap caing dak harei dak harei dak gheih ghang, jaik taphia. Sa-ai Thị Hợi, chreih chrai brei thau:

"Dahlau tuk bac, dahlak sahaneng bruk taong caing kan lo. Min hu mbaok tame tal bac ini, dahlak mboh oh kan yau drei sahaneng. Tal ini, dahlak hu taong hu klau kadha caing. Biak bui sambai tuk drei hu thau taong caing. Dahlak brei kham merat pasram veik piah daong khik ramik ilamo di drei.”

Tal pato kong caing meng camreip hu bruk daong di karja xa Đức An saong gah ilamo tinh Lam Dong. Hadei tuk tal bac tamat blaoh, dom adei sa-ai kamei jeng srap gap khik tani tanat saka tukvak bac di sang ilamo mbon palei. Bac bhian dalam dom var malam puac adit, adei sa-ai kamei gilac rami ramik bruk apuh pakak, bruk sang piah gam haong gauk bac yaok kadha caing, kakei ka gauk yaok ragam taong. Dom var pasram nan hu daong sap caing dak harei dak bhian randap, nao tame raidiuk di mbon palei.

Ngan haong dom ragei, bruk pato caing oh tok lac pato sa janih alat ragam, bo lac pato sa jalan diuk rai, daong rai rah sit umo thau ka yaok kadha caing sameng tagok dalam bingun halei, hu makna hagait, piah meng nan mboh hadah mbaok tame pandar tame raidiuk di mbon palei.

Piah daong prein dom ragei patui veik pato dom yaom kaom siam gheih ka rai rah harei hadei, hadei tuk pagam xa, xa Đức An hu mbaoh tangin daok bruk ngak yaok harei ka dua Ragei Uu tu di mbon palei Đắk N’Drung. Ragei Uu tu Thị Phyơn, Akaok kapul Adaoh tamia bhap bini mbon palei Đắk N’Drung brei thau: ini lac bruk sangka biak hu makna di jalan khik ilamo M’nông.

"Dahlak hulin mboh biak thau dhar phol Ndang, Karja hu sarak daong ka dahlak labaih 3 trieu dong 1 bilan. Ini lac bruk daong prein praong piah dahlak patui veik khik ilamo bhap bini. Dahlak hulin brei patui veik tacei ba, pato bruk taong caing ka rai rah sit umo, ba kapul caing kamei patagok jang, piah anek taco patui veik drap ar di mukkei.”

Meng dom yaom kaom ilamo hu khik ramik, xa Đức An daok kuhria padang bruk jirah rivang bhap bini di mbon palei Đắk N’Drung. Tuai damuai brei hu bingun piah ba drei tame me-in kong caing, dom raya adat, bruk jhik menyim saong kaya mbang M’nông. Dalam nan, sang ilamo bhap bini lac bruk naih gheih di pasak, parang dom kaya bhap bini, yaih khan ilamo bhum palei saong dom bruk ilamo jirah rivang. Amuk Thị Rơi, Bi thu Ci bo mbon palei Đắk N’Drung, brei thau:

"Bruk jak ba adei sa-ai, kapul dam dara hu mbaok tame bac kong caing oh tok khik ramik ilamo blaoh daok paglaong bruk pambuak pagam bhap bini. Xa hu buh jien tame padang sang ilamo bahrau ka mbon palei, brei kein lagaih piah mikva pambuak me-in, pasram. Khol dahlak caong khin ba dom kaya kan, kaya pambuak me-in bhap bini tame parang di ini, piah rairah sit umo thau jang ka ilamo bangsa.”

Meng dom palak tangin cai inem kayua pandiak angin di apuh, dom urang kamei M’nông di mbon palei Đắk N’Drung daok pabam ragam, khik binguk yava ka sap caing palei pala. Apui di sang ilamo sameng tagok ba ilamo mbon palei tabiak atah gam haong bruk patagok di palei Đức An, Lam Dong./.