Di xa tapen negar Giang Thành, bruk pala padai pagam haong raong hadang sú ba mai siam lagaih kinh te, daong rilo baoh sang rahra uak drei tagok  ngak kaya meda. Naih gheih lac baoh sang ong Trần Minh Phúc, daok di puk Trà Phô. Oh tok lac srap gap hu mbaok tame danak dak khik ramik jalan tapen negar, ong daok patagok kinh te meng bruk raong hadang pagam haong pala padai. Ong Trần Minh Phúc brei thau:

“Mikva meng kal biak kan kandah min urak ini biak sa nang kayua urak ini Karja ba ndien gom mai, lagaih ka bruk njuk ia saong rilo bruk karei. Drei mboh mikva urak ini mbuan jang, raidiuk oh daok kan kandah, urak ini padang sang daning haluk abih paje.”

Gam haong patagok kinh te, dom sarak sangka rahra hu peih ngak samu gauk. Rilo baoh sang gul pataom gam haong dom binah kaya alin meng karja palei saong gah ngak pahla hu daong klah rabha kan kandah, pabak veik prein daong ka mikva bangsa Khmer. Amuk Chau Thị Thu Thủy, Akaok UB Mat tran Negar Viet Nam phuong Chi Lăng, tinh An Giang, brei thau:

“Dalam tukvak mai meng anak tal, jeng brei patui veik jak ba dom halau prein dalam rahra piah sangka siam jang ka raidiuk daok dang me-in ka mikva bangsa Khmer.”

Di xa Ô Lâm, bhum taneh gaok rilo kan kandah kayua mesuh metak dahlau, tal ini, dom jalan hu ngak meng betong. Dalam xa hu 4/12 sang bac mek hu tanut chuan pakat negar, bruk pandar bao hiem y te dalam rahra mek hu 98%. Chreih chrai anak dom bruk salih di palei pala, anai Neáng Phương, daok di xa Ô Lâm brei thau:

“Dahlak hulin jeng biak bui sambai, meng dahlau jalan oh ka hu yau ini, nao mai biak kan. Urak ini ngak yau nan drei nao biak mbuan, radiah dua baoh, pak baoh nduac lagaih di anak sang, mboh biak bui sambai.”

An Giang urak ini hu labaih 600 ribau rahra urang bangsa Khmer, daok pataom di dom xa, phuong, kaoh pulao bhum tapen negar saong bhum palei. Urak ini bruk baoh sang kathaot dalam bhum patrun kuhria rah tapa jaik 3% yaok thun. Bruk urang bangsa takik hu mbaok tame bao hiem y te mek hu labaih 98%, daong khik kajap an sinh xa hoi saong paglaong raidiuk.

Paglaong dom bruk kuhria hu, tinh AnGiang patui veik peih ngak samu gauk dom jalan paglaong raidiuk, jhul tagok cakrok karo kajap bhum mikva bangsa Khmer. Dalam nan, tinh snagka iek praong bruk pathau khan, ngak siam jalan di Ndang, sarak, hukum di Karja; peih ngak siam lagaih Danak dak jalan ngak pakat negar patagok kinh te – xa hoi bhum urang bangsa takik saong bhum ceik tukvak meng thun 2021 - 2030.

Gam haong nan, tinh patui veik jak ba prein yava, salih bruk ngak mbang njauk saong kein lagaih saong randap haong langik salih karei; ngak bruk patrun kathaot karo kajap pagam haong langyah hatai caong ka taneh daok, taneh ngak mbang, ia pandar; jhuk khang pato pakai bruk ngak, brei bruk ngak, daong brei jien mesraiy saong patagok bruk ngak bhap bini.

Gam haong patagok kinh te, An Giang patui bruk khik ramik, paglaong ilamo, raya adat bhap bini di bangsa Khmer, daong pasiam bruk gul pataom taong abih bangsa negar, sangka piah raidiuk mikva dak harei dak trei sir, haniem phol selamat./.