Page, biar harei jak val haong tadai kuan min tal malam sa-ai kamei Lê Thị Lệ Hoa, urang daok di palei Thới Hiệp, xa Cờ Đỏ, ban raya Can Tho jeng daok ramik hu masa tukvak piah bac megru bruk pak njam hang. Bruk ini daong ka sa-ai Hoa hu jien mek tame hadei di dom tukvak lahei. Tuk tame ngak bruk, sa-ai jeng daok rilo kan kandah. Min, rah rah sa-ai hu randap saong meda hu ta-eng salah blaoh kaya ndap nda. Yaok mbang hu taong yaom kaya njauk tanut, sa-ai kamei biak bui sambai kayua prein ngak di drei hu taduan.

Sa-ai Lê Thị Lệ Hoa brei thau, njam hang hu blaoh di palei, salih ka njam hang theik ndong dalam iar atau klak thaoh, rahra meda chraong pataom mai, blaoh brei bambu thu saong pandar piah ngak kaya tamo ngak jeng ndap nda ngak meng tangin gheih mekre, brei tame bruk duah jien.

"Do palei pala tok hu bruk sangka anek atau bruk di baoh sang, hu dom tukvak lahei ye palai, nan drei tame ngak ye hu jien mek tame ka baoh sang piah pasiam raidiuk di drei. Meyah yau drei ngak hu dom bruk ye oh hu palai tukvak di drei, nan bruk ini daong hu biak rilo adei sa-ai kamei dalam tukvak lahei, duah hu jien tame ka baoh sang."

Kapul pak njam hang Thới Hiệp hu padang meng bilan 4/2026 meng bruk daong di Kapul Urang Kamei xa Cờ Đỏ, meng camreip hu 20 urang, tal ini hu 76 urang hu mbaok tame. Amuk Nguyễn Thị Mộng Tuyền, Akaok Kapul pak njam hang palei Thới HIệp brei thau, Bruk hu ngak meng tangin di sang, nan praong sit jeng ngak hu. Dom kaya ndap nda hu ngak tui harak kakei blei di gah ngak mbang pablei salih. Amuk Nguyễn Thị Mộng Tuyền brei thau:

"Jaik di ini oh ka hu kongti rilo nan ba bruk pak njam hang ini tame ye dom urang kamei hu bruk ngak, bui sambai lo. Caong khin uy mban, pakat angaok daong peih veik tal pato blaoh pato veik ka dom urang kamei piah brei bruk ngak ka dom urang piah parilo jien mek tame sangka ka raidiuk."

Tapa tal pato bruk pak njam hang, amuk Nguyễn Thị Thúy Liễu hu tut angan saong bac magru bruk ngak. Tui amuk Liễu, ini lac bruk amuk mboh njauk hadei tuk padeih ngak bruk. Meng bruk dalam pak njam hang brei hu bruk kham merat, tani tanat. Tok lac bruk ngak oh ka njauk, dom bruk pak meda lac oh ka samu tapak gauk, ngan jhak tal kaya. Amuk brei thau, bruk pak njam hang oh tok daong urang kamei hu parilo jien mek tame blaoh daok njauk lagaih haong dom urang srap gap hu tukvak piah sangka ka baoh sang.

"Dahlau diah njam hang theik Ndong, urak ini hu thau ka ka lagaih di njam hang ini paje ye adei sa-ai kamei cakak bam ai bambu, maong yau kaya klah thaig drei pataom main gak jeng kaya piah drei pandar hu, pasiam raidiuk di dom adei sa-ai kamei."

Kapul pak njam hang palei Thới Hiệp, xa Cờ Đỏ hu padang tui jalan kuhria brei bruk ngak di labik, daong urang kamei pandar hu tukvak lahei, parilo jien tame saong pasiam raidiuk baoh sang. Dalam tuk ngak bruk adei sa-ai kamei rami ramik tacei ba saong pato bruk ngak ka gauk, dak harei dak paglaong ilamo pak gak. Jien mek tame meng bruk pak njam hang kuhria rah tapa labaih 2-4 trieu dong/urang/bilan. Amuk Nguyễn Ánh Nguyệt, Akaok Kapul Urang Kamei xa Cờ Đỏ brei thau, Kapul brei patui jak ba urang kamei hu hatai caong khin bac magru bruk ngak hu mbaok tamekapul; pambuak dom gah pataom bleinpiah khik tani tanat kaya pablei tabiak. Bruk daong phun jien jeng pagam haong hatai caong khin tapak saong bruk peih ngak di yaok baoh sang, piah paglaong siam lagaih halau prein.

"Brei mboh bruk pambuak halau kaya saong khik brei karo harak kakei blei lac bruk hu makna, Kapul hu srap gap pambuak haong gah pataom blei kaya, taduan khung pak saong jao brei ka dom adei sa-ai kamei ngak di sang. Dalam tukvak anak tal Kapul brei patui veik palagaih kapul pak njam hang, jak ba veik urang ngak bruk hu hatai caong khin hu mbaok tame saong patagok bruk pambuak kaya, pamaong tal khik tani tanat bruk ngak, parilo jien mek tame saong daong adei sa-ai kamei pambuak pagam suai atah haong bruk ngak njam hang."

Gam haong tangin gheih mekre, dom adei sa-ai kamei di puk palei Thới Hiệp daok salih dom phun njam hang jeng dom kaya ngak meng tangin hu yaom kaom kinh te, daong parilo jien mek tame saong ba kaya ndap nda nao tal urang blei pandar dalam negar saong dunya, gam haong nan dak harei dak jeng jalan duah jien karo kajap ka urang kamei di palei pala./.