Di Bhum Taneran kraong Cuu Long, labik atah di gauk tuk halei jeng lac asal kadha hu makna dalam ngak bruk gah y te. Meyah rahra di pasak ban medin hu kein lagaih nao tal dom sang iek ruak da khoa, chuyen khoa saong pandar ilamo ky thuat pasang iek hadah bahrau, ye di bhum atah bayah, bhum tapen tasik, bhum taneh tapen negar atau bhum hu rilo rahra urang bangsa takik, bruk nao tal sang iek ruak pakat angaok gaok mai lahik rilo tukvak saong jien padai. Kayua yau nan ye, salih ka bruk cang rahra nao tal sang iek ruak tuk ruakkik, rilo bhum palei daok ba bruk pasang iek ruak, halang saong ndom meyai ka prein yava mai di labik bhum. Ngan haong rahra Bhum Taneran kraong Cuu Long, bruk salih ini ba mai dom kein lagaih biak njauk lagaih.

"Dahlak hulin urak ini thun umo praong paje, bhian ralo ruak hakik, dahlak hulin brei nao meng gaiy gilai mai tal ini piah pasang iek ruak taong abih iek prain yava yau habar. Meng aval page mai iek ruak blaoh, dahlak mboh biak sambai hatai.”

Di Can Tho, bhum palei hu ba tabiak danak dak cambaih laih Sarak Nghi quyet 72, dalam nan caik jalan ngak tal abih thun thun ini, bruk pandar BHYT hu 95% rahra. Ong Nguyễn Minh Chí, Phaok Akaok UB Bhap bini phuong Vĩnh Châu, brei thau pasang iek prein yava yaok tukvak, pasang iek halang saong padang harak gal prein yava ndien tu ka rahra hu brei mboh lac bruk hu makna, bhian saong dui suai atah.

"Phuong brei kham merat ngak ginup dom tanut tui jalan kuhria, ngak yau habar patukik di abih bruk klak thaoh rahra, rilo meng lac dom urang khin sangka brei hu pasang iek ruak yaok tukvak dalam mbang ini. Hu makna jang, khol dahlak hulin caong khin ngak jeng bruk bhian randap srap gap sangka prein yava."

Ca Mau – bhum taneh Meraong negar, danak dak pasang iek prein yava dalam rahra hu peih ngak di 64 xa, phuong. Tapa pasang iek halang, kapul chuyen mon hu duah mboh rilo bruk njauk dom ruak oh pambak yau tagok dẩ, me-ik saradang, ruak arak baoh hatai, ruak jalan thuak yava… Urang ruak hu ndom meyai langyah bruk salih bruk ngak, bruk mbang huak, gam haong nan ba tame bruk pasang iek saong taong ruak yaok tukvak. Ong Châu Văn Tạo, daok di Đầm Dơi brei thau:

"Meng aval page mai pasang iek ruak blaoh paje, dahlak hulin mboh biak chreih chrai. Dahlak hulin caong khin hu labik y te jaik taphia yau ini piah lagaih ka bruk nao mai pasang iek ruak. Danak dak ini hu makna biak praong, brei mboh bruk sangka di Ndang haong rahra."

Gam haong bruk pasang iek halang, tukvak tapa, dom bhum palei dalam bhum jeng padang harei Prein yava dalam rahra, pagam haong hartai di Sarak Nghi quyet 72 ka bruk paglaong hatai pacang caga ruak saong padang ilamo prein yava dalam bhap bini. Dom bruk kuhria hu camreip brei mboh bruk dak harei dak cambaih laih jang di y te labik bhum palei.

Min, bruk ngak jeng daok kan daman. Sa binah rahra jeng hu sahaneng lac pasang iek ruak halang di balai y te tok lac bruk pasang iek meng akaok camreip, oh ka taong ruak atau pabak jru, nan oh ka srap gap hu mbaok tame. Meng di gah cagar veik, dom co che, sarak, tacei ba di Trung uong piah peih dom asal kadha di Sarak Nghi quyet 72 daok suai. Kayua nan dom bhum palei gaok kan kandah dalam bruk ngak cambaih laih jeng danak dak, jalan ngak, danak dak saong ramik caga tal prein yava.

Yau nan ye, piah ka y te di puk palei sa labik brei ka rahra kuria prein yawa je tame duah mai tal meng camreip, ye bruk buh jien tame brei samu gauk ka anek manuac, so so vat chat, ndap nda kaya, ilamo kong nghe saong prein ngak chuyen mon. Ngan haong kadha mek urang ruak ngak pasak, dom bhum palei Bhum Taneran kraong Cuu Long daok patui taoh talaih kan daman, paglaong prein y te puk palei saong y te glang caga, gam haong di nan paglaong dom ilamo janih gah njauk lagaih haong hatai caong di rahra./.