Bahrau bac tamat blaoh sang bac cao đẳng min ka oh duah hu bruk ngak lagaih, saai H’Đoái Byă, daok di puk palei Ê Rang, phường Thành Nhất, tỉnh Đắk Lắk tut angan tame tal bac sơ cấp Kỹ thuật ngak pandap mbang kayua bhum palei peih tabiak. Saai H’Đoái khan lac, ini lac ilamo pabak, gam lac sa bruk ngak bahrau mayah ka oh duah hu bruk ngak njauk haong gah drei bac blaoh.

“Dom harei bac yau ini ba mai ka drei hu rilo ilamo saong hu pato biak naih jang, hadei di nan thau hu rilo jang ka dom pandap nda kaya mbang huak, hu rilo ilamo jang, ngak ka pandap mbang maong gheih mata jang. Tui hatai caong di dahlak lac tuk bac tamat blaoh tal bac ini, ye meda tame ngak di dom kadai kuan ngak pandap mbang atau ngak dalam dom công ty”.

Saai H’Đoái Byă lac sa urang dalam 60 urang bac lac urang bangsa takik hu mbaok tame tal bac sơ cấp Kỹ thuật ngak pandap mbang kayua UBND phường Thành Nhất pambuak haong Sang bac Cao đẳng Buôn Ma Thuột peih tabiak. Dalam dua bilan, urang bac hu pato tacei dom ilamo ngak pandap panda kaya mbang, khik ramik pandap, khik tani tanat haci hacih pandap mbang saong parang gheih ghang pandap mbang.

Tui ong Nguyễn Hữu Luật, Phaok akaok Thường trực UBND phường Thành Nhất, tal bac hu peih ngak tui Danak dak sit ka 3, Danak dak 5 ka bruk patagok bruk ngak saong ba bruk ngak ka urang ngak di bhum urang bangsa takik saong bhum ceik. Bruk pilih ruah bruk ngak hu bhum palei pamaong tame hatai caong di rahra saong pamaong tame prein ngak bruk hadei di tuk bac magru blaoh.

“Phường Thành Nhất jeng patui peih tabiak dom tal bahrau dom bruk ngak lagaih haong hatai caong di urak ini piah daong ka mikva hu hatai sahaneng, duah hu bruk ngak lagaih, piah meng nan mikva jang yau urang bac pilih ruah hu sa bruk ngak piah paglaong hu jien mek tame saong piah patagok raidiuk, mbang ngui”.

Di phường Tân An, saai H’Ju Êban, urang daok di puk Kmrơng Prŏng, hu peih tabiak quan pak di palei hadei di tuk bac di tal bac pato ngak gheih mbaok mata kayua bhum palei peih tabiak. Bruk ngak hu ba mai ka saai H’Ju jien mek tame karo tani tanat jang.

“Dalak hu mbaok tame tal bac ngak make-up kayua phường Tân An peih tabiak. Camriep meng akaok thun 2026 dalak hu peih tiệm, bruk ini hu ba jien mek tame tani tanat jang ka sang dalak”.

Tui jalan ba tabiak ngak bahrau, piah paglaong bruk pato bruk ngak di bhum palei tal thun 2030, Đắk Lắk ba tabiak jalan ngak yaok thun pato bruk ngak, pabak ilamo bruk ngak ka labaih 10.000 urang ngak di bhum palei, meblah 85% urang hu bruk ngak hadei di tuk bac blaoh; brei ngak dahlau abih di bhum mikva urang bangsa takik, bhum atah biyah.

Ong Nguyễn Quang Thuân, Phaok Yam ndok Sở Nội vụ tỉnh Đắk Lắk brei thau lac, piah ka bruk ba tabiak ngak ini hu ba tame ngak, bruk pambuak di gah pato bruk ngak haong labik ba bruk ngak lac hu makna glaong di abih.

“Dom sang bac, dom labik pato bruk ngak pambuak haong gah urang ngak mbang blei salih, pambuak haong dom doanh nghiep dalam saong langiu di tinh, meda lac dom urang ngak mbang blei salih di negar langiu piah paglaong ilamo pato bruk ngak, jang yau peih bruk pato bruk ngak, pasram bruk ngak ka anek saih, sinh viên; piah hadei di ini hu văn bằng, chứng chỉ, dom adei tut angan tame chip tame bruk ngak, oh lac pato veik ngan haong dom urang ngak mbang blei salih”.

Sa tal bac meda dui atah dom bilan, min bruk hu yaom glaong di abih di nyu lac peih tabiak kein lagaih brei ka duah bruk ngak, eng drei ba tabiak bruk ngak saong piah duah jien mek tame. Tuk blaoh bruk drei pilih ruah jaik haong hatai caong khin saong pambuak jaik haong tuk bac tamat ba mai siam makre brei kein lagaih piah ka rahra, abih di nyu nan lac mikva bangsa takik yam tagok./.