Mai tal palei Đam Pao, xa Phú Sơn Lâm Hà, tinh Lam Dong, mbuan mboh thaik thaot urang kamei bangsa K’Ho kham merat taphia daning menyim. Meng dahlau lac tukvak bruk menyim jih dalah dang anak bruk mbuan kurang, min meng hu daong kaya tamo meng Danak dak jalan ngak pakat negar patrun kathaot karo kajap, rilo baoh sang hu khik tani tanat bruk ngak, brei hu jien mek tame. Njauk caik hatai lac, bruk ngak bhap bini daok hu pato veik ka rairah sit umo. Amuk Long Dinh K’Thin tangin nduac talei mrai, brei thau:

“Dua anek kamei jeng menyim abih. Tuk halei lahei ye manaok nyu ngak. Tuk halei oh lahei ye nao ngak bein manaok nyu padeih oh ngak. Tuk Lahei tukvak daok di sang ye manaok nyu ngak daong menyim. Ngak bruk ini lac tani tanat lo. Dua binah ini jeng sa blah lac 2,5 trieu dong.”

Danak dak patrun kathaot karo kajap bhum mikva urang bangsa takik saong bhum ceik hu daong yaok rituh baoh sang bangsa takik di palei Đam Pao pasiam bruk ngak mbang duah jien di baoh sang. Daok di bruk menyim jih dalah oh tok lac sa janih daong brei ka urang kamei hu bruk ngakm duah jien mek tame dom tuk lehei tukvak blaoh daok daong khik bruk jhik menyim jih dalah bhap bini. Sa-ai Ha Mi, urang jakar UB Bhap bini xa Phú Sơn Lâm Hà brei thau, khin hu dom danak dak jalan ngak pakat negar paglaong siam lagaih, khin hu daong njauk hatai caong khin saong brei kein lagaih piah rahra srap gap patagok bruk ngak mbang duah jien.

“Daong akaok tame lac dom kaya tamo piah ngak tabiak ndap nda. Hu dom tal pato pakai, tal bac pasram bruk ngak, hu dom tacei ba tapak taong abih dom baoh kadha bo rahra khin.”

Meng bruk ngak mbang duah jien di baoh sang tal ha tang sang danaok palei pala, halau prein meng dom danak dak jalan ngak pakat negar daok daong pasalih di dom labik bhum kan kandah di Lam Dong. Dalam 5 thun tapa, bhum palei patrun jaik 50.000 baoh sang kathaot tui tanut chuan rilo gah.

Di xa Đam Rông 4, labik bhum biak kan kandah, dom danak dak jalan mbak, sang bac saong ha tang duh bruk ngak mbang hu brei caik dahlau buh jien tame. Ong Nguyễn Văn Quang, Phaok Akaok UB Bhap bini xa Đam Rông 4, brei thau, thun ini xa hu ramik caga labaih 22 ty dong piah dak harei dak pabak hatai caong njauk hu di rahra.

“Khol dahlak hulin ngak gilac veik taong abih co so ha tang piah buh jien tame dom ha tang njauk hu dahlau, peih praong jalan mbak, pasiam gilac mbaok meta dalam palei pala. Dom hatai caong njauk hu ka ha tang di mikva dalam bruk ngak tabiak, nao mai ye jeng hu pabak hatai caong khin.”

Thun 2026, tinh Lam Dong hu ramik caga jaik 900 ty dong phun jien buh tame ngak dom danak dak jalan ngak pakat negar ka bruk padang palei pala bahrau, patrun kathaot karo kajap saong patagok kinh te – xa hoi bhum mikva bangsa takik, bhum ceik. Ong Hồ Văn Mười, Uy vien Trung uong Ndang, Akaok UB Bhap bini tinh Lam Dong, ndom mayai lac:

“Lam Dong brei mboh ini lac sa bruk ngak biak hu angan makna. Lam Dong pagun sanya dalam bilan 12 brei bayar taong abih paok jien ini, gam haong nan brei pataom tame ieu da-a dakvak rik daong dalam rahra piah gam haong phun jien di Trung uong padang ngak siam jang veik Danak dak jalan ngak pakat negar”.

Meng bruk menyim jih dalah menyim khan bai di xa Đam Pao tal dom danak dak ha tang bhum atah bayah, dom danak dak jalan ngak pakat negar daok daong pasiam raidiuk rahra Lam Dong. Tukvak bahrau caong khin tinh oh tok jhul samar bruk  bayar jien blaoh daok brei pandar jien ka njauk menuac urang, pagam haong buh jien tame ha tang haong padang danak dak duah jien, parilo jien mek tame saong khik ramik ilamo. Ini lac kein lagaih piah dom danak dak paglaong siam lagaih suai atah, brei daong prein karo kajap brei ka bhum kan kandah./.