Page harei adit, dalam sang bhap bini mbon Puăn, xa Ea Phê, tinh Dak Lak, sap caing sameng tagok hlai haong sap tacei ba di urang gheih tangin nghe nhan. Sa gah sang bhap bini lac dom adei sit mbang akaok meti pan gai taong caing. Gah daok veik lac dom urang nghe nhan dalam mbon daok bac veik dom kadha caing bhap bini piah me-in njauk jang, ginup jang.

Adei Y Lisan Kbuôr, umo 13 thun daok bac taong caing, tangin oh ka bhian randap, gaok mai pablait ragam min caik hatai bac megru. Y Lisan Kbuôr brei thau:

“Meng dahlau mai anek oh ka hu bac kong, caing, harei ini hu bac megru lac biak bui sambai, khin bac kong, caing piah hu mbaok tame kapul caing.”

Di gah karei, dom urang gheih tangin nghe nhan rilo thun pagam haong kong caing jeng daok hu ngak gilac meng dom kadha caing bhian randap. Ong Y Cư Ayun, langiu 50 thun, daok di mbon Puăn, brei thau:

“Dahlau diah jeng thau poh thau taong, jeng hu taong caing min oh ka pang jeng, pasram ye ta-eng roh duah haong ayut cuai min. Harei ini pasram gilac, adei sa-ai bac gilac ka njauk, ka thau rilo jang piah gah xa khin drei nao pambuak me-in, kong, caing, tamia xoang, parang iek. Nan lac adat cambat di Randaiy drei, drei khin khik gilac harei hadei oh kurang lahik.”

Urang dang tal pato lac Nghe si Uu tu Y Phôn Ksơr. Sang daok di phuong Buôn Ma Thuột, min tuk hu gah ilamo da-a, ong oh huac truh tapa jalan atah labaih 40km nao tal sang bhap bini mbon Puăn, xa Ea Phê di yaok malam puac adit, pato dom ilamo drei patak pataom hu piah khik ramik drap ar hu yaom glaong di mukkei. Nghe si Uu tu Y Phôn Ksơr brei thau:

“Ini lac kein lagaih piah drei pato gilac taong abih dalam tuk daok prein, kayua yaok labik bhum jeng hu sa ragam taong karei gauk min dahlak daok caong khin lac bruk mbuan mbiah abih thei thei jeng thau. Tuk hu pato kong caing ka rairah sit umo brei hu ginup majam di nyu, dalam nan hu majam caing Knah, majam hagar, majam caing C’har piah taong abih dom kamuan, dom adei, dom urang gheih tangin nghe nhan jeng hu thau.”

Tal bac di mbon Puăn hu labaih 30 urang tame bac lac dam dara saong urang nghe nhan urang Randaiy gheih tangin. Dalam 25 var, langiu di bruk paoh hlai ragam, urang bac daok cih vak, cuak video, ngak taka so kadha caing bhap bini. Ini lac sa dalam klau tal pato kong caing hu tinh Dak Lak peih ngak piah ba bruk khik ramik gilac mai bhap bini; jeng lac dom gah ilamo bhum palei peih ngak piah ngak cambaih laih dom bruk di Sarak Nghi quyet 80 meng dom bruk khik ramik meng di labik.

Min, khik tamik ilamo bhap bini oh meda pambak tame dom tal pato atau dom danak dak katut panak harei. Ini lac luac jalan suai atah, brei hu bruk daong di sa majam politik chinh tri, meng salah blaoh co che, sarak tal ramik caga halau prein saong peih ngak. Ong Y Nhuân Byă, Phaok Akaok UB Bhap bini tinh Dak Lak ndom lac, Sarak Nghi quyet 80 di pakat nagar Trung uong lac bruk hu makna piah bhum palei padang jalan kuhria saonh brei caik dahlau halau prein ka bruk khik ramik ilamo meng labik.

“Sarak Nghi quyet 80 lac yau ye Gang Jamang asar biak cambaih laih piah khol drei ngak bruk khik ramik ilamo dalam dom drap ar oh mboh di meta yau kong caing saong dom gah karei, asal kadha ini jeng khin brei caik dahlau bruk kuhria, hu jalan peih ngak cambaih laih, rabha bruk ka dom labik.”

Sarak Nghi quyet 80 brei kein lagaih piah dom bhum palei padang dom jalan langyah lagaih haong raidiuk. Gam haong Dak Lak, cambaih laih Sarak Nghi quyet 80 oh lac janih peih ngak dom bruk khik ramik, blaoh daok brei kein lagaih piah ka yaok mbon palei, yaok urang nghe nhan saong rairah sit umo jeng gah ngak po di luac jalan khik ramik ilamo, brei kein lagaih piah drap ar hu khik ramik meng dalam rahra bhap bini./.