Meng akaok thun tal ini, An Giang hu 35 mbang tuh glut jaleih taneh ar kraong, ribaong, barat hu taong atah labaih 1.700m ngak ka 45 baoh sang brei panduan samar chip capat.

Tui dut iek bahrau di abih, dalam tinh urak ini hu 56 jalan rah ar kraong, ribaong, barat daok dalam bruk kakei caga ka glut jaleih taneh hu taong atah 181.000m. Njauk caik hatai lac dalam nan 4 jalan ar kraong di tanut biak kan kandah dalam nan hu kraong hậu; kraong Vàm Nao; ribaong Xáng Tân An; kraong Tiên binah Long Điền A saong binah Phú An. Saong hu 3 binah kan kandah saong biak mbuan glut jaleih taneh tuh di angaok ar kraong Hậu, binah atah abih tagok tal 13.200m.

Oh sa janih di dom baoh kraong, bruk taneh tuh jaleih nde tasik jeng daok dalam bruk njauk kakei caga. Di xa Vân Khánh hu 9km ar tasik ye hu tal labaih 1.500m nde tasik tuh jaleih biak kan kandah, rilo labik mbang mbro tame dalam taneh jaik pacalah klaoh cagar nde ar. Trak praong abih lac binah labik Vàm Kim Quy, binah nde ar caga nagar quoc phong atah 500m njauk calah klaoh, ngak ka ia tasik tame mblang hamu, ngak kan kandah tal kaya kan saong raidiuk rahra bhap bini. Ong Huỳnh Văn Sơn, umo 65 thun, urang daok di palei Kim Quy B duh hatai:

"Thun ini tra lac 5 thun jaleih taneh, rahra di tapen tasik biak kan kandah kayua tal bilan meraong meng bilan 7, bilan 8 ba tagok lac ia tasik ndik, karei di nan daok hu ribuk, ribuk ye rahra khat lahik rilo jang. Raong aring hadang dalam danao ye ia sraiy ar tame, aring hadang theik nao abih. Rahra khat lahik biak rilo, bruk ini jeng hu ba panuac tagok pakat angaok daong pasiam gilac jalan nde ar ini meng rilo thun blaoh paje, mahit lac jaik si ngak".

Dang anak bala daok kateik geik, chi cuc Kraong ribaong hu ndom biai ka UB Bhap bini tinh ba tabiak panuac patacei paglaong bruk pacang caga glut jaleih taneh tuh, ia dauk. Tinh urak ini pataom tame kak kajap pasang iek bruk padang danak dak tapen kraong; srap gap pasang iek, ramik caga labik daok ka dom baoh sang rahra daok dalam bhum mbuan gaok bala. Gam haong nan pathau khan kakei caga tal yaok rahra; pambuak pasang iek, taong bhat catang dom bruk lih tame ar pacang khik danak dak kraong ribaong. Ngak tui adat “4 di labik”, peih dom kapul pasang duah pambuak gah di 12 bhum palei, daong dom binah akaok pacang caga saong pasiam dil samu. Ong Lương Huy Khanh, Quyen Chi Akaok Quyền Chi cuc Kraong ribaong tinh An Giang brei thau:

"Meng akaok thun tal ini, So Ngak Nong Alam Langik tinh pambuak haong so jien padai saong gah hu pambuak bruk peih ngak jaik 20 mbang pasang iek bruk ngak tabiak, bruk pacang caga bala, glut jaleih taneh tuh, njom ia mbak, ia ndik ia sua,… di dom xa, phuong, kaoh pulao. Tapa di nan, brei hu dil samu kadha pato tacei, daong bhum palei taoh talaih kan kandah dalam bruk ngak, pacang caga bala langik".

Brei ka bruk atah dhua suai atah, An Giang brei mboh bruk padang nde ar kajap ieu lac sa bruk hu makna piah pacang khik taneh riya kraong ribaong ha tang saong dom labik danaok daok di rahra. So Ngak nong song Alam langik kuhria taong abih, ba tagok Rajaei maong iek daong meng kadung jien trung uong. Kuhria, phun jien labaih 7.000 ti dong brei hu caik dahlau buh jien tame ka 18 danak dak nde ar pacang glut jaleih ar kraong pasak dalam tinh.

Yaom mada lac daok rilo kan kandah min piah khik taneh, pacang khik bruk diuk rai saong drap ar ka rahra bhap bini daok di tapen kraong, tapen tasik, gam saong bruk srap gap, lagaih di karja palei gam haong bruk daong dil samu ka phun jien meng pakat Trung uong ayu ye anek kiar hu makna daong An Giang aval drah tani tanat jalan ar, daong rahra sahnang hatai karo labik daok piah ngak mbang anak langik salih karei dak harei dak catang./.