Pan ieik bruk di bhum taneh riya, hu pabah lamnge ikan praong saong hu kapul gilai taong mek kaya ikan kreih tasik, balai Bien phong Tay Yên tuk halei jeng taom gaok haong rilo bruk ngak hu makna: iek glang gilai tame tabiak pabah lamnge, pasang iek urang nao tasik, pathau khan pacang taong mek kaya ikan tasik suan hukum, oh pathau khan saong oh ngak tui adat hukum, tal tuk meraik pacang cakak pablei dauk, bleik saleik dalam pablei salih saong tame tabiak langiu negar suan hukum. Dang Anak bruk yau nan, urang pato tacei di labik hu srap gap peih ngak bruk payua harak khan ka kol ngak duas, daong urang jakar, bol lin thau ka bruk siam lagaih jang.

Meng bruk “urang thau rilo pato urang thau takik”, abih khau tin brei thau baoh kadha brei pabak gam gam, njauk ndom mayai lac dalam dom mbang tabung glaong meraik pacang caga kol duas atau tuk langik oh lagua lagaih.

Langiu di nan, kapul bien phong ieik glang tapen nagar daok tapak tacei ba urang nao tasik pandar dom ilamo jamraik ngak kong. Thieu ta Nguyễn Hải Nam, urang jakar di balai pasang iek Kinh Dài, daok tacei ba urang nao nao tabiak tasik ngak dom harak gal tapa jamraik brei padar ung dung brei thau:

"Meng blaoh adei tacei ba ka sa-ai pandar eCDT, phan mem ini lac pasang duah gok agha kaya ikan dalam tasik, yau harak inem kaya tasik nan. Harak inem di ini lac harak inem taong mek, harak inem pataom blei kaya jeng hu ndih dalam ini abih. Pham mem eCDT di pabah lamnge ikan hu ngak saong jhul tagok majam ka sa-ai paje, urak ini urang jakar bien phong brei ngak harak gal tame lamnge ka sa-ai. Tuk sa-ai tame ye dom sa-ai brei tame ini piah urang jakar bien phong tacei ba ngak harak gal…”

Bruk panduan salih meng cih vak tangin tapa harak inem online meng akaok meti oh plaih hu dom kan kandah ka urang nao tasik. Min, bruk kham merat tacei ba di kapul bien phong akaok meti jeng hu ba mai bruk mboh siam lagaih. Ong Võ Văn Tuấn, sa urang nao tasik di xa Tây Yên brei thau:

"Dahlak jeng thau paham hu ha sit kayua adei sa-ai bien phong tacei ba ka dahlak ngak harak gal meng online. Meng kal ini adei sa-ai tacei ba ka dahlak saong dahlak jeng paham thau ha sit ha sit…”

Min di jalan salih taka so di bhum tasik jeng gaok rilo kan kandah, dalam nan hu dom urang rahra praong thun. Dai uy Huỳnh Hoàng Lộc, Phaok Akaok Kapul Jak ba bol bhap rahra, Balai Bien phong Tây Yên, duh hatai ndom meyai lac:

"Langiu di nan jeng hu dom kan kandah. Urak ini rilo meng lac rahra praong thun oh ka pandar hu ilamo ngak kong gah jamraik khau tin dalam raidiuk. Di jalan ngak bruk ye Kapul Jak ba bhap bini…”

Mboh cambaih dom kein lagaih saong kan kandah, dalam tukvak anak tal, Balai Bien phong Tây Yên brei mboh brei patui ngak salah blaoh phan mem pasang iek gilai taong ikan, gam haong di nan peih praong bruk payua harak khan ka kol duas tal praong dalam dom baoh sang urang nao tasik. Bruk pabak dom lagaih pasang iek saong patagok bruk pambuak, klah rabha dom kadha du lieu haong dom kapul chuc nang siam lagaih pambuak, pacang khik kajap taneh riya tasik kaoh pulao, an ninh tapen negar dalam bruk bahrau./.