Oh danei angan yau ye palei ngak gaok glah Hamu Craok, min palei ngak lan Cam Ragaok, tinh Lam Dong jeng daok tani tanat khik ramik bruk ngak lan bhap bini tapa rilo rai rah. Yaok kaya ndap nda lac bruk hu ngak meng tangin gheih siam saong uranam drap ar. Mbang taom gaok di dua palei ngak gaok glah lan am di Harei Ilamo Bangsa Cam thun 2026 oh sa janih lac peih tabiak kein lagaih pambuak haong gauk, bac magru blaoh daok daong pambak tabiak yaom kaom lan am Cam nao tal rilo bhap bini. Ong Lâm Hùng Sổi, xa Bắc Bình, tinh Lam Dong brei thau:

“Hu mbaok di Harei raya ilamo mbang ini lac bruk hadah mbaok meta gam saong gaok glah lam am bangsa Cam palei Ragaok. Khol dahlak ba dom kaya kan ndap nda bhap bini nao yaih khan saong caong khin hu bac magru dom baoh kadha meng bruk ngak gaok glah lan am Cam palei Hamu Craok. Hadei di mbang nao ini, khol dahlak brei hu rilo jalan sahaneng piah ngak tabiak dom kaya gheih ghang jang, pabak hatai caong di tuai damuai.”

Jeng khik bruk ngak gaok glah lan am ngak meng tangin oh paban payeng, am cuh di langiu langik meng njuh meng pong, lan am Ragaok ghaih ghang biak karei. Yaom lac hu rilo bruk dreih yau gaok glah lan am palei Hamu Craok, yaok palei ngak bruk jeng hu bruk gheih karei meng janih gluh, sambo lan tal bingula bhap bini. Amuk Lương Thị Hoa, daok di xa Bắc Bình ndom meyai brei thau lac:

“Hu mai tal ini ndom meyai saong palei lan am Hamu Craok, dahlak mboh dua gah lan am hu dreih gauk ka thaik thaot. Min, yaok palei hu gluh lan karei di gauk nan kaya ndap nda jeng ba tui dom bruk gheih karei. Mbang mai ini daong brei ka dahlak bac magru rilo kadha piah patui hadei di ini brei patagok bruk ngak saong pambak tabiak yaom kaom gaok glah lan am bangsa Cam.”

Tui tuai damuai urang jirah ye labik ngak gaok glah lan am caik rilo bruk kadha chreih takre, kayua bruk gheih karei di buk jek lan am jeng hu ngak meng tangin siam gheih di dom urang gheih tangin. Amuk Nguyễn Thị Minh Hải, Urang cuak thaik mek binguk mai meng Ha Noi brei thau, yaom lac pang rilo ka palei ngak gaok glah lan am Hamu Craok min ini lac mbang akaok meti hu rivang jirah ek tapak. Dom kaya ndap nda lan am hu thaik thaot rilo, mbaok lan hu sambo ngak ka amuk mboh biak katuak drei.

“Ini lac mbang akaok meti dahlak mai hu mbaok Harei Ilamo Bangsa Cam di Khanh Hoa. Dahlak hulin biak chreih tuk taom dom urang gheih tangin di dua palei ngak lan Hamu Craok saong Ragaok. Bruk ngak dahlak mboh chreih takre di abih lac taong abih kaya jeng hu ngak meng tangin, khik tamo bruk ngak meng tangin meng kal mai. Nan lac dom yaom kaom biak njauk iek praong saong khin hu khik ramik.”

Tui dom urang gheih tangin daok di palei ngak gaok glah lan am Hamu Craok, mbang pataom gauk ini jeng ba tui rilo makna karei tuk dua palei ngak bruk jeng hu klah rabha bruk khik ramik drap ar hu UNESCO brei angan. Ong Phú Hữu Minh Thuần – Yam ndok HTX lan am Cam Hamu Craok, xa Ninh Phuoc, tinh Khanh Hoa.

“Harei Ilamo Bangsa Cam lac kein lagaih piah mikva daok di tinh atah hu mai tal ini…”

Daok tui amuk Châu Thị Tình – Palei Hamu Craok, xa Ninh Phước, tinh Khanh Hoa brei thau, hu harei taom mbaok, hu bac magru ilamo di dom palei ngak gaok glah lan karei mboh biak chreih hatai:

“Hu mbaok di Raya di Cam drei, dahlak mboh biak bui sambai tuk hu taom gaok mikva Cam palei Ragaok…”

Mbang taom mbaok di dua palei ngak gaok glah lan am Ragaok saong Hamu Craok oh lac mbang taom gaok di dom urang ngak bruk, blaoh daok lac bruk pambuak di dua ilamo meng sa baoh halau agha. Tuk dom palak tangin tari taring patui bruk mbeik gluh lan jeng kaya kan gaok glah, jeng lac tuk dom ilamo siam gheih bangsa Cam hu caik veik ka rai rah harei hadei, piah apui di bruk ngak bhap bini miat miat hu daok khik ramik saong pambak praong tabiak./.