Xa Thanh Hưng hu ba pataom meng 3 xa An Thái Trung, Tân Hưng saong Tân Thanh, nan lac bhum taneh pala phun mbang baoh prong abih di tinh Đồng Tháp. Dalam xa urak ini hu labaih 4.000 ha phun mbang baoh.

Mai meng jhul khang bruk panduan jao ilamu, gam haong bruk hadah krah di sang bein dalam bruk ngak mbang, baoh kayau pablei salih di Thanh Hưng dak harei dak tagok, dak harei dak pabak hu hatai caong khin di darak pasar pablei tabiak langiu nagar. Meng akaok thun tal ini, baoh kayau dalam xa mek hu jaik 50.000 tấn. Ta-eng duriang hu labaih 1.700 ha daok brei baoh.

Saai Nguyễn Thành Long, urang daok di palei ap 6, xa Thanh Hưng, hu 1 ha bein. Dahlau diah, sa-ai pala pa-aok min tapi jien mek tame oh hu rilo kayua yau nan ye sa-ai salih tapa pala durian pajaih Monthong. Thun dahlau, sa-ai paik hu jaik 18 tấn baoh, pablei hu yaom 80.000 đồng/kg, jien mek tame labaih 1 ty ndong. 

“Meng harei dahlak akau salih tapa pala durieng ye kinh te mboh karei jang. Dahlau abih, drei njauk pandar ilamu tame dalam bruk mong iek phun pala, ngak brei ka phun tabiak bingu karei bilan. Tuk ngak brei ka phun tabiak bingu karei bilan ye meda plaih caga hu ‘gaok’ darak pasar; tuk labik karei oh hu baoh kayau ye drei gilac hu. Dahlak jeng takik buh khak hoa hoc, brei buh khak huu co piah ka phun cak rok patagok siam, dhan phun tabiak samu guak”.

Oh lac sa janih iek prong tal bruk patagok paralo baoh karaoh nang suat, xa Thanh Hưng daoak dak padang labik ngak tabiak pabak hu hatai caong khin pablei tabiak langiu negar. Tal urak ini, xa hu pabak brei 52 ma so labik pala duh ka bruk pablei tabiak langiu negar gam haong taneh labaih 1.200 ha.

Patagok dalam bruk ngak bein jeng dui hu bruk ngak mbang pablei salih, blei tame baoh kayau dak harei dak tamuh khang. Langiu di 3 baoh darak peih ngak biak khang, xa Thanh Hưng urak ini daok hu 184 urang ngak mbang pablei salih baoh kayau, brei ba kaya ngak nong di palei pala saong dom labik jaik taphia nao tal darak pasar dalam negar saong pablei tabiak negar langiu.

Ong Nguyễn Hoàng Vũ, Phaok akaok UBND xa Thanh Hưng, brei thau hadei di ba pataom, kinh te bein di xa patui bruk cak rok patagok gah ba paglaong asal, pabak caong khin pablei tabiak negar langiu. Karja saong dom kapul nyaom di puk palei tuk halei jeng nao gam haong bhap bani dalam bruk mong iek, pacang khik bein phun, gam haong nan pacang caga haong bala meng langik tasik, abih di nyu lac aia ndik, hajan ribuk. Ong Nguyễn Hoàng Vũ daok brei thau:

“Karja xa hu peih ngak danak bruk daong bhap bani cak rok patagok bruk ngak bein. Xa hu daa dom jabat chuyen mon mai panduan jao ilamu, mboh rilo lac angaok phun durieng, piah patrun ham luong Cadimi, ngak brei ka phun tabiak bingu suan bilan, pacang caga khiak hala... Xa jeng hu danak bruk nao rivang bein, pasiam veik jalan ba aia pruh saong dom talei ar pacang khik grap tanat bruk ba ia, taoh aia brei ka phun pala”.

Ong Huỳnh Đức Thạnh, Mbi tha Ndang uy xa Thanh Hưng, brei thau langiu di bruk ngak bein, dom bruk raong glang kaya ikan dalam aia, abih di nyu lac raong ikan aia taba tapain kraong, jeng ba mai baoh jeng siam mekre saong jien mek tame hu biak glaong.

“Hadei di ba pataom, xa Thanh Hưng hu rilo lagaih. Danak dak ha tang pabak hu hatai caong khin, abih di nyu lac jalan mbak nao mai. Kadua tra nan lac hatai gul pataom dalam bruk yak yum jum pataom ieu lac biak siam. Urak ini, khaol dahlak daok pataok tame dak padang xa palei pala bahrau saong kham merat ngak salah blaoh dalam bilan 8/2027 tui sarak di UBND tinh”.

Meng baoh jeng siam mekre di dalam bruk ngak bein, rai diuk bhap bani Thanh Hưng dak harei dak patagok. Rilo urang ngak nong hu jeng dom urang ngak mbang naih jioi, hu jien mek tame glaong. Urak ini jien mek tame kuhria tui akaok manuac di xa jaik 89 trieu ndong/thun; dalam xa daok 58 baoh sang kathaot, mboh rilo lac dom baoh sang oh hu taneh riya piah pala drak.

Cak rok patagok kinh te bein oh lac sa janih ba mai yaom jien mek tame tani tanat brei ka bhap bani blaoh daok jhul khang bruk ngak mbang pablei salih, ba brei bruk ngak saong peih prong darak pasar pablei tabiak kaya nong. Ini jeng lac jalan nao laghaih haong jalan ngak cak rok patagok bruk ngak nong di tinh Ndong Thap dalam vaktu bahrau/./