Bahrau meng harei 7 tal harei 12/8, Kapul K91, Phong Chinh tri, Bo Pato tacei Bol lin tinh Dong Thap pataom hu 15 atau talang bol lin di labik Kubo Cả Cái. Piah roh duah hu dom atau talang gam haong kaya ndap nda ini, urang jakar, bol lin di labik hu roh cakac duah dalam labaih 2m tanah. Gam tui di nan, pataom atau talang gam haong dom kaya ndap nda tui adat dak, duh bruk ngak tantu, pasang iek, ngak cambaih laih angan je bol lin. Thuong ta Trần Khánh Dương, Urang ngak Chinh tri di Kapul K91, Bo Pato tacei Bol lin tinh Dong Thap brei thau, kapul patui veik peih praong labik roh duah, ngak bruk tani tanat, hu ilamo, ngan haong kham merat oh klak tapa atau talang bol lin halei.

 “Urak ini, kapul K91 daok roh duah di dalam negar, labik daok dalam tinh Dong Thap, langik urak ini lac biak oh lagaih, pandiak, ba-uh, hajan… ngak kan kandah tal prein yava di urang jakar, bol lin. Min, tui hatai kham merat, oh huac kan kandah, oh huac glaih glar, ngak harei malam, kham merat lac daok khau tin ye daok roh duah atau talang bol lin”.

Tui urang jakar, bol lin Kapul K90, Kuk Chinh tri, Quan khu 9, luac jalan roh duah, pataom atau talang bol lin lac sa bruk praong glaong biak kan kandah. Truh tapa dom kan kandah dalam glai ram, raung atau yaom lac langik oh lagaih, dom sa-ai tuk halei jeng taduan hu bruk daong anit ranam meng pakat uy, karja saong rahra bhum palei. Rahra srap gap daong kapul roh duah, dom bruk nan ndung bak hatai bol lin haong rahra. Amuk Nguyễn Thị Lý, xa Nhuận Phú Tân, Vinh Long brei thau.

  “Harei hu dom cei bol lin mai di ini cakac piah roh duah atau talang di dom bol lin klak rup ndih trun dalam taneh ini piah ba mai sang haong gauk gar baoh sang, bhum palei… dahlak hu trun mai di ini rivang tangi dom cei bol lin, mboh dom cei ngak bruk biak glaih glar; mboh biak drut druai. Dahlak hulin bhian jak ba mikva di puk palei, alin kaya, brei li-u, brei menuk, ada, brei ahar baoh kayau, ia menyum…”

Tui Mbang pato tacei 515 Quan khu 9, meng tuk peih ngak “Danak dak 500 harei malam” tal ini, 4 kapul pataom hu tame bruk roh duah di 10 tinh, ban gah Campuchia saong dom bhum palei dalam negar; hu roh duah, pataom hu jaik 564 atau talang bol lin. Jaik abih dom atau talang ini oh ka tantu hu angan je.

Urak ini dom kapul daok peih bruk pataom atau talang di dom bhum palei dalam negar, kham merat peih praong bruk roh duah di dom labik rah tabiak mesuh metak dahlau saong dom kubo anak meta. Langiu di nan, bruk patagok pambuak haong Kapul K90 saong dom jabat, labik hu pambuak piah jul samar tukvak panak roh duah atau talang bol lin. Dai ta Nguyễn Thúc Linh – Phaok Chu nhiem Chinh tri Quan khu 9, Phaok Akaok Thuong truc Mbang Pato tacei 515 Quan khu 9 ndom khang lac.

“Ngak “Danak dak 500 harei malam”. Tui bruk roh duah atau talang bol lin, ini lac bruk chinh tri biak hu angan makna; piah ba dom cei, dom sa-ai halan tian klak rup brei ka bruk hit peih yasa bangsa negar, jeng yau lac pacang khik Taneh ia ka kubo, piah khol dahlak cuh galau nyang, pok meyaom, thau dhar phol dom bol lin krah bijak; gam tui di nan, piah ka urang dalam sang patrun bruk drut druai ngan haong bruk lahik urang dalam sang drei”.

Di angak jalan roh duah, duah pataom atau talang bol lin, yaok yam takai di urang jakar, bol lin oh lac sa mbang roh duah, blaoh daok lac sa jalan gilac mai haong ayut cuai, haong baoh sang saong bhum palei. Ngan haong kadha “daok khau tin, daok roh duah”, dom urang jakar, bol lin dom kapul roh duah jeng harei malam truh tapa, nduac haong tukvak, piah ba dom bol lin krah bijak gilac mai haong bhum amaik, daong patrun pandik pandua saong ngak njauk adat “Menyum ia hadar tal halau gha” di bangsa./.