Xa An Cư, tinh An Giang hu pagam meng dom xa Văn Giáo, Vĩnh Trung saong An Cư, hu labaih 40.000 pabah mbang; dalam nan hu mikva bangsa Khmer hu labaih 77%. Piah ngak jalan njauk tui akaok mbram “xa oh hu jru aphil”, Kong an xa saong kapul jabat ngak bruk karjar pilih puk Srây Skốth peih bruk “puk oh hu jru phil” ngak di bhum palei, hadei di nan peih praong di bruk ini di bhum palei karei daok veik.

Piah mikva je tame saong ngak tui, kapul kong an pambuak saong kapul dam dara mai tal yaok baoh sang rahra, pathau khan biak mbuan thau piah mikva mboh bruk kanjah jhak di jru aphil, tacei ba mikva thau ka bruk brei mboh di urang randap mahu jru phil, jalan pacang caga meng di baoh sang.

Ong Chau Mênh, puk Srây Skốth, xa An Cư brei thau, khol dahlak hu paguon sanya mbaoh tangin oh pandar jru aphil saong bhian kakei anek kamun di drei thau tantu ka bruk kanjah di jru phil piah brei ka anek kamuan plaih atah ba hu dom bruk oh siam di aphil:

“Rahra dalam bhum palei sa hatai saong paguon sanya kakei brei ka anek kamuan dalam sang di drei thau ka kanjah jhak di jru phil, ngak ka menuac urang, meda ngak tabiak dom bruk klauk, kacaoh, atau ngak dom bruk jhak dalam rahra. Abih urang kham merat oh brei ka anek kamuan oh pandar jru phil.”

Brei mboh bruk hu makna di dom halau janeing agama dalam bruk pathau khan, Kong an xa bhian taom gaok, ndom meyai khao tin, jak ba dom halau janeing gam haong gauk pathau khan ka rahra tui agama saong mikva.

Urang Acar Chau Sóc Phi Rin, Dang akaok sang baha Văn Râu, brei thau, yaok adit baoh sang baha jeng pagam asal kadha dalam dom mbang taom mbaok urang tui agama piah thau tanat, meng nan pasang iek, pato megru anek kamuan dalam baoh sang siam jang.

“Dalam tukvak tapa Kong an xa An Cư hu tapa padaong pathau khan kanjah jhak di jru aphil; po acar jeng hu pathau khan tal urang tui agama nao sang baha dalam harei po rami saong sa bilan pak mbang piah ka rahra thau tanat, pathau khan ka anek kamuan di drei dalam baoh sang hu siam jang.”

Bruk patagok bruk di dom halau janeing agama dalam bruk padang “xa oh hu jru aphil” oh lac sa janih jalan langyah hu kuhria brei ka suai atah, karo kajap, blaoh daok brei mboh hatai gul pataom, bruk ngak di sa majam chinh tri saong taong abih rahra dalam mbang jhul kadun bruk pandar jru phil tabiak patruh raidiuk rahra.

Tui Trung ta Nguyễn Văn Vũ, bruk pambuak di dom acar dang akaok baha tukvak tapa hu ba mai siam lagaih cambaih laih jang. Rilo bruk pandar suan hukum janih jru phil hu duah mboh, dil samu pathau khan khau tin ka kapul Kong an:

“Khol dahlak hulin peih bruk pasang duah catang, tagok harak angan taong abih dom urang medil ka pandar jru phil suam hukum, blaoh dom labik pataom gauk atau dom urang hu pambuak tal bruk pablei salih, pajeng ba, khik piah suan hukum dom janih jru phil piah hu bruk da-a mai test pasang iek.”

Gam saong bruk ba drei tame ngak catang di abih majam chinh tri jeng yau bruk pambuak siam lagaih di dom halau janeing agama, bruk padang bhum palei oh hu jru aphil di xa An Cư daok ba mai dom bruk salih mboh cambaih laih. Caong khin xa hu brei saong truh tapa jalan ngak ba tabiak bruk “xa oh hu jru phil” di thun 2028, brei kein lagaih ka bhum palei patagok kinh te – xa hoi, ba mai raidiuk sahnang hatai di phum, soc./.