Njauk tame dom harei puac adit, dom urang dalam kapul nyaom Lan Song Mao Long Su padhih (Kapul nyaom) di xa Hai Ninh, tinh Lam Ndong gilac pataom mbaok di mblang sang bac Mau giao 19-5 klak, piah gam gauk pathram dom mbo phap, kadha tamia lan, su, rong saong ginum biai nao mai ka dom bruk ngak di kapul nyaom. Kapul nyaom hu padang tagok meng di thun 2023 kayua sa-ai Lý Đức Tường dang akaok.

        Labaih 10 thun pambuak pagam haong bruk ngak, sa-ai Tường caong khin pambak prong hatai chreih takre brei ka rai rah ranaih, patui di nan, daong ka dom adei hu sa mblang ma-in siam gheih pathram pren yava brei ka rup bhap.

      Di ini, dom urang bahrau tame ye hu sa-ai Tường tacei pato ilamu taong hagar, tamia lan,... piah hu mbaok tame bruk ngak iek. Hadei di nan, dom adei pathram, pal kajap taong abih ilamu tamia lan, su, rong.

      Sa-ai Lý Đức Tường, Akaok kapul nyaom Lan Song Mao Long Sư padhih xa Hải Ninh, tinh Lam Dong brei thau, ini oh lac labik pato ka dam dara, ranaih ka bruk tamia lan bo daok lac "baoh sang saong gauk " piah klah rabha haong gauk, daong ba adei sa-ai nao njauk jalan. Ngan haong dom adei daok tui bac dalam sang bac, ye sa-ai Tường pachreih patui veik bruk bac megru; daok dom adei padeih bac, ye sa-ai pachreih nao duah bruk ngak tani tanat.

“Tui jalan khik ramik ilamo di urang Lo di Song Mao, pathram pren yava, ngak jeng mblang ma-in siam gheih brei ka anek kamuan harei hadei. Meng nan hatai saneng dak padang sa kapul nyaom lan hu ngak pandiak mai meng dom adei sa-ai nan lac urang dahlau diah di kapul nyaom dahlau. Sa urang sa tangin, piah dak padang kapul nyaom lan, puac thun 2023 meng hu dak padang kapul nyaom Lan Song Mao Long Sư padhih.”

       Adei Lỷ Và Hỷ thun ini hu umur bahrau 12 thun nan lac sa dalam dom urang sit thun umo di di abih dalam kapul nyaom, min gilac thau cambaih ilamu taong hagar. Mai meng hatai chreih takre tamia lan meng tuk daok sit, adei mboh tangin likau tame kapul nyaom saong hu mbaok tal harei ini. Adei Lỷ Và Hỷ bui sambai khan lac:

“Adei mboh biak bui sambai saong siam ka pren yava di drei tuk hu mbaok tame kapul nyaom.”

       Dom urang daok dalam kapul nyaom hu bruk ngak karei saong hu rai diuk karei di gauk min thei jeng rami ramik piah pathram haong gauk yaok harei di puac adit. Gam haong di nan nao ngak iek di dom harei roya, harei tet raya atau harai peih pakak. Jien mek tame hu sa binah hu neh tabiak brei ka bruk nao mai, blei khan ao, ndap nda ragam ragu; binah daok veik meda buh tame kadung jien di kapul nyaom. 

       Tamia lan, su, rong, ieu lac sajanih ilamu bhap bani, hu halaw gha meng di nagar Trung Quoc, tui takei di dom urang Lo nao dak padang mbang angui di bhum taneh bahrau dalam nan hu Viet Nam. Ilamu tamia lan, su, rong bhian hu mboh dalam harei roya, abih di nyu lac Tet Nguyen tieu, tet Trung Thu saong Tet Nguyen ndan yaok thun. Kayua lac tui hatai saneng di urang A Ndong, klau drei anek ini lambaok ka bruk kaya meda, tamuh cak, haniem phol saong mblo huan.

       Janih tamia ini gam brei mboh kadha gheih mekre di ilamu bhap bani gam brei mboh asal my thuat saong kadha karei cih di ilamo bhum palei. Pambak tui mblang ma-in prong, sit saong asal di yaok roya, tamia lan, su, rong meda hu dom kadha karei di gauk. Gaok tuk mai klau kadha tamia ini hu peih ngak karei, hu tuk jeng caong khin pambuak veik haong gauk piah ngak jeng mbo klau siam gheih, pachreih bruk sangka biak karei di urang mong iek mai meng thaik thaok, tangin takai, bruk sahanak saong mbaok meta biak karei di yaok kapul nyaom tamia.

        Xa Hải Ninh nan lac labik hu rilo bangsa adei sa-ai diuk rai, dalam nan rilo abih nan lac urang bangsa Nung, Lo. Kayua yau nan ye, labik ini jeng daok khik ramik rilo mbo mon ilamu biak karei di urang Lo, dalam nan mbluak di abih nan lac ilamu tamia lan su rong.

        Ong Nguyễn Văn Trí daok di xa Hai Ninh, tinh Lam Dong brei thau, yaok urang yaok rai diuk, min tuk pataom veik haong gauk tok daok dom ragam tamia lan siam gheih saong khang kajap. Tuk sap hagar, caing yava tagok, dom urang likei dam sa janih tok daok thau laik tame haong hatai takre di drei.

“Dahlak mboh ini lac sa janih ilamo piah khik ramik asal ilamo di bhap bani bangsa Lo di palei. Kadhua tra nan lac ngak jeng mblang ma-in siam gheih brei ka dom adei hadei di tuk bac piah bo hu labik ma-in kein laba, gam pathram tamia, gam pathram rup bhap, gam ngak iek dom kadha ilamo biak karei di urang Lo dalam dom harei roya.”

        Dak padang saong patui khik dalam kan kandah, min dom urang dalam kapul nyaom Lan Song Mao Long Su padhih di xa Hải Ninh, tinh Lam Dong jeng daok yaok harei jak gauk nao angaok jalan tui khik hatai takre. Hatai caong khin di dom urang nan biak mbuan mbiah nan lac hu rilo urang thau tal, piah hu ngak iek di rilo labik, pabak hatai takre, tapa nan ngak brei khik ramik ilamo bangsa./.