Rilo urang Lo padeih takai di pabah lamnge Phú Hài. Meng di tuk yam takai tal bhum taneh bahrau, hadom cuang kandah min tuk nan dom urang Lo samar drah ba drei tame dalam bhap bani urang Yuen. Yaom lac taom gaok haong dom ilamo meng kan karei di gauk, min jeng daok khik dom janih ilamo, jalan diuk rai karei yau: panuac ndom akhar vak, jalan diuk rai meng kan, paling yang akaok akei hu kong peih pakak ba jalan ka anek taco.

      Dom bruk ngak paling yang mai meng nan hu dak padang tagok piah pabak hatai caong khin bruk jia tui saong jeng lac labik pambak di bhap bani tuk nan tuk taom gaok haong cuang kandah dak padang mbang angui di bhum taneh bahrai. Di bhum taneh Phú Hài, Phan Thiet, bhap bani urang Lo hu dak padang tagok baha Amuk Thiên Hậu.

        Inem meng kan khan veik, baoh baha hu padang ngak di thun 1725, kayua sa kapul nyaom urang Lo tamuh tabiak, yau nan ye baha ndung bak kien truc di gah Barak. Baha daok di angaok mbuan ceik glaong, mbaok mong tapa gah kraong Phu Hai. Baoh baha sahanak, yau urang amaik pacang khik ka dom urang anek hu hatai dak padang mbang angui. Hadei harei ini, tapa rilo mbang pasiam veik, baha hu dom rup patau, ngan haong dom panuac pandip brei mboh ilamo di gah Meraong. Thaik binguk dom patau inegirai, phuong hu ngak biak gheih gam pok glaong kadha siam gheih brei ka baoh baha, gam hu makna hatai jia dalam adat paling kakuh Amaik.

        Mai meng labik pambak khang kajap ka glo akaok, bhap bani urang Lo pak di ini  kham merat ngak mbang, peih prong cak rok patagok bruk pablei salih, abih di nyu lac di labik darak Phan Thiet, Nga Bay.

        Ong Lý Cẩm Minh, Phaok akaok Mban bhian iek Quan Đế kalan Thiên Cung Hậu, phuong Phan Thiet brei thau, di phuong Phan Thiet, urang Lo meblah jaik 1,2% bhap bani dalam phuong. Bhap bani diuk rai pambak tame pablei salih, jit vuk. Dom baoh sang pablei salih hu angan je prong nan lac: Lý Chấn Ký, Vạn Thuận, Liên Hoa, Nhơn Ái, Kim Sơn...

      Urang Lo di Phan Thiet pataom ma-in dom dom mbang, nan ye meng dak padang hu 4 nyaom kuan saong mek angan tui mbang di drei, nan lac: Hai Nam, Quang Dong, Trieu Chau atau Phuc Kien piah paling kakuh akaok akei nao dahlau saong daong veih gauk ngak mbang, cak rok patagok kinh te. Yau nan min, lambaok hajat ka urang Lo di Phan Thiet gam ilamo jeng yau hatai jia jeng pataom tame Danaok Quan Đế atau daok iew lac baha Ong, hu padang ngak di meteh puac abap XVIII.

       Khan tal baha Ong ye oh meda klak tapa roya Nghinh Ong – sa di dalam dom roya meng kan prong abih di ini. Roya hu ngak 2 thun sa mbang dalam 3 harei adit puac bilan 7 saka aia bulan di dom thun chan, ngan haong bruk ngak prong, pachreih yaok ribau urang bol saong tuai damuai hu mbaok tame. Ini oh lac tukvak piah likau angin siam, hajan laghaih, ngak mbang cak rok, bo daok lac tukvak piah khik ramik saong pambak prong janih ilamo biak karei di bhap bani urang Lo pak Phan Thiet. Ar thak harei roya tuk halei jeng dhin dhang lamang ndaih saong bak ban sambo.

       Langiu di nan, pandap mbang menyum di urang Lo jeng caik inem biak dalam gam haong dom kaya mbang bhian randap yau: mi hoanh thanh, sui cao, xa xiu, ada  quay… Rilo kuan mbang jeng daok khik tamo bingi yamen meng kan tapa rilo rai rah.

     Bhap bani urang Lo di phuong Phan Thiet, tinh Lam Dong nan lac brei mboh ka bruk pambuak pagam ilamo khang kajap. Kreh jaman diuk rai bahrau, dom yaom meng kan hu khik ramik saong cak rok patagok, hu jeng sa binah oh kurang hu dalam blah cih ilamo di puk palei./.