Dom harei ini, rahra daok di xa Nhơn Mỹ jeng oh ka abih var glai hadei di dom mbang jaleih taneh druh jatuh trak rah tabiak gam gam, theik abih sang danaok, jalan mbak saong jhul rilo baoh sang rahra laik tame bruk daok dalam bruk duh hatai.

Di labik gah mblang anak sang di amuk Lê Thị Bích Thủy, daok di puk Phụng An hu 3 mbang glut jaleih taneh jatuh trun kraong Phụng An. Labik jaleih taneh atah 30 met, mbang tame dalam ar 10 met, ngak jaleih sa baoh sang caik pambuak anak di amuk Thủy bo baoh sang amuk pandar piah pablei salih saong cakak klaoh jalan mbak nao mai. Amuk Thủy brei thau, labik jaleih taneh hu mbang tame sang pasak ngak duh hatai praong ka baoh sang.

"Meng tuk jaleih taneh tal tuk nan, dalam sang oh thei khin ndih dalam sang gah anak ini, nao tame gah likuk. Ndih di gah sang likuk, oh khin ndih gah sang anak. Biar halei ngak ar pacang tani tanat ka drei meng kuhria hadei. Daok urak ini  lac oh khin. Kaya ndap nda di sang anai pablei di tadai kuan min rilo lo, nan ye dom kaya njuel njac anai cak di ini."

Jaik di nan, di ar anak kraong Phụng An jeng rah tabiak glut jaleih taneh atah labaih 30 met, ngak jaleih đal, ngak kan kandah tal sang daok saong bruk salamat jalan mbak di rahra dalam bhum palei. Amuk Lê Thị Hoàng Mai, urang hu sang jaik labik jaleih taneh brei thau, bruk ini rah tabiak biak katuak di labaih mon 4 tuk page. Di hadei nan, jabat karja hu nao tal labik jaleih taneh, klauk ralaoh kakei caga, peih jalan nao anak meta tapa taneh di sang drei piah ka dom adei anek saih sumu nao tal sang.

"Oh peih jalan ye oh jeng. Jalan ini calah abih paje, urak ini ciuk min oh thau ngak habar. Jeng caong khin karja buh jien tame aval ngak ar piah anek saih nao bac salamat, jalan ini anek saih nao bac rilo, kayua nan dahlak peih piah dom kamuan nao bac, meyah oh ye biak kan kandah."

Dua jalan taneh glut jaleih ini jeng lac jalan pasak duh ka bruk pajeng ba kaya ndap nda, nao mai saong daok dang di mikva. Makna kayua jalan kraong nduac vaiy ngak ka jalan ia nduac khang saong gaving tame ar. Taphia nan, bruk kanjah di langik salih karei ngak salih bruk ia ndik saong ia nduac jeng ngak rah tabiak glut jaleih trak praong jang.

Xa Nhơn Mỹ hu pagam meng 3 xa dalam nan hu: Nhơn Mỹ, An Mỹ di huyen Kế Sách saong xa Song Phụng, huyen Long Phú, tinh Soc Trang (klak). Ini lac bhum palei jaik kraong Hậu, hu rilo kraong ribaong nan bhian rah tabiak bruk glut jaleih ar kraong, jaleih đal saong dak harei dak rah tabiak srau kadau. Kuhria meng hadei pagam tal ini, Nhơn Mỹ hu rah tabiak 74 jalan jaleih taneh hu taong abih atah jaik 1.400 met di 11 puk palei dalam bhum.

Ong Nguyễn Văn Điệp, Phaok Akaok UB Bhap bini xa Nhơn Mỹ brei thau, anak bruk rah tabiak glut jaleih taneh dak harei dak trak, bhum palei hu pataom tame rilo gah piah pakajap, pabak caga pacang dom jamang phun trúc anak meta hu 32 jalan glut jaleih taneh hu atah 683 met. Gam haong nan daong rahra taoh talaih sang danaok, panduan drap ar nao tal labik karo salamat:

“Urak ini daok veik 42 jalan hu atah jaik 900 met. Kayua jien padai daok oh lagaih yau nan ye oh ka meda pasiam hu abih dom jalan ini hu. Khol dahlak hulin jeng brei panuac ndom likau UB Bhap bini ban raya Can Tho, So Ngak nong saong Alam langik gam haong Chi kuk Kraong ribaong ban raya patui sangka, daong jien piah ba bhum palei pasiam dom labik jaleih taneh, khik kajap bruk nao mai di rahra dalam bilan ribuk hajan jaik tal.”

Meda mboh lac, jaleih taneh oh lac theik nao taneh riya, sang danaok blaoh daok dui tui bruk duh hatai bhian di urang daok tapen kraong. Ngan haong rahra xa Nhơn Mỹ, ban raya Can Tho tuk ini oh caong khin hagait jang lac dom danak dak, jalan, jalan ngak pasiam aval drah hu peih ngak piah mikva tani tanat karon dalam raidiuk, sahnang hatai ngak bruk, ngak mbang saong oh daok duh hatai huac kanda, njauk ndom lac di tuk urak ini daok yam tame bilan hajan./.