Diuk pasang ong Cao Ngọc Minh dao di xa Ea Rôk, hu taneh di xa Ea Súp, khin panjauk siam harak brei angan chung taneh meng tuk daok karja pakat huyen. Mada yaom lac bruk ngak harak gar gah taneh riya pambuak gauk phi địa giới meng lavik, min diuk pasang taha umur jaik 80 thun lahik bih jaik 2 bilan nduac trun nduac tagok min oh ka blaoh salah. Ong Cao Ngọc Minh brei thau lac, langiu brei angan pandar taneh di drei ngak chung, kat căn cước rahra bhap bini jeng chung, yau nen ye oh mbuan si lang:

“Duah dom taka di labik nay oh hu. Taneh di Ea Súp, nao tal Ea Súp ye urang brei harak, khin caong brei pasiam panjauk harak piah ngak. Blaoh ong nao bih 3 harei blaoh. Ong taha paje, huac tal matai paje min tapi ka oh ngak harak blaoh dom anek taco oh ka hu harak brei angan po pandar taneh”

Ini jeng ieu lac talei kak oh mbuan si langdi bhum taneh Tay Nguyen-Nam Trung bo. Ngak hu labaih 90% tal 98% dom janih harak gar ngak njauk tukvak ngak ka urang mboh sanang hatai. Min biak di nyu, dom janih kadha nan ieik yau ye sit sot, meng 2 tal mala 10% min nyu yau ye gai naong kateik trak di majam pajabat karja.

 Tui ong Phạm Ngọc Hải, Bi thu Ndang uy xa Tây Khánh Sơn, tỉnh Khánh Hoà, prein yava brei ka angka daok kurang ralo, 1 bruk daok ngak nao ngak mai ralo mbang, ngak ka bruk kateik geik trak damak dak harei dak katang:  

“Mayah urang jakar, urang ngak bruk karja khol dahlak hulin hu pandar dom phan mem ye biak lagaih, nyu mada pakurang hu tukvak, siam jang brei ka ba tacei bruk hit, siam jang brei ka bruk daong ka bhap bini rahra jeng ye ka urang ngak mbang blei salih. Praong di nyu hu lac jien ndo blei angan phan mem ban quyen, lakau UB Bhap bini tinh daong jien ndo piah palei blei pandar daok mayah oh hu ye tinh blei, hadei di nan, parabha quyen, brei adat quyen pandar ka jakar urang ngak bruk karja meng pakat tỉnh tal xa piah ka khol dahlak hulin hu si pandar”.

 Hadei di sa thun ngak bruk tui jlan karaj dua pakat, ralo palei di Tay Nguyen – Nam Trung bo tamuh ralo jalab labik katial papik bahrau di dalam bruk iek glang labik. Dalam nan, kurang biak ralo brei ka prein angka daok dui atah di pakat xa – labik dang di anak mikva bhap bini khin caong lang yah bruk kadha.

Oh sa janih brei pabak manuac urang, di dom palei daok njauk pabak prein ha tang du lieu, cong cu angka jeng ye hu manuac urang piah paglaong jang brei ka bruk paglaong prein khik iek – dui ba. Yau ye hu brei panuac patacei padar di Bi thu Tinh uy Dak Lak Lương Nguyễn Minh Triết, parabha bruk njauk brei tui njauk lagaih, piah “pakat tinh khang brei ka jalan kuhria jeng ye pakat xa khang brei ka bruk ngak”:

“Njauk nao tui jalan parabha bruk, parabha quyen khang ka pakat xa gam saong brei jien ndo manuac urang njauk lagaih, oh njauk lac yau gauk taong abih. Ngak njauk tui jalan jao quyen tal halei ye khik karo prein manuac tal nan, rabha pakat tal halei ye ieik glang tani tanat tal nan. Njauk ngak tui jalan khik kajap pakat tỉnh khang gah jalan nao atah kuhria ye pakat xa njauk khang brei ka bruk ngak”

Dom bruk mbeik rup siam lagaih di jalan ngak tui karja 2 pakat di Tay Nguyen – Nam Trung bo brei mboh lac tapa bruk harak gal lang yah njauk tui masa bia ralo. Min, kateik geik brei ka bruk ngak di pakat palei daok ralo: kurang urang hu prein angka brei ka majam khik iek, urang jakar dang ngak jeng ye urang bhap bini.  Biar halei parabha pakat, parabha quyen gam saong buh jien tame brei ka sa humu gauk di gahdu lieu, cong cu angka jeng ye prein khang brei ka urang jakar jeng ye brei bhap bini, ye pakat xa barau ganap prein piah daong bhap bini piah ngak siam di abih./.