Sang sa-ai kamei Hồ Thị Thúy Hằng, umur 25 thun, daok di xa Hồ Đắc Kiện hu pala labaih 15 thun ini. Dahlau diah, caraih hadei di tuk paik blaoh rilo meng lac hu pablei ka dom darak pasak di dom tinh gah Meraong. Min, jalan pablei tabiak gaok mai oh lagaih. Abih di nyu hu lac, tuk jit ruak COVID-19 tamuh tabiak, bruk pajeng ba gaok klaih klaoh ngak ka rilo kaya nong oh pablei hu. Dalam tuk rilo urang daok duah jalan pablei akaok tabiak, sa-ai Hằng mbaoh tangin ngak iek haong sa jalan nao biak bahrau, ba baoh caraih tagok mang saong dom darak pablei salih online.

"Thun jit ruak COVID ye kaya pablei oh hu, kaya nong ye pablei oh hu nan adei ngak iek ba tagok online. Dahlau lac ba tagok Facebook min, hadei ye adei ba tagok darak pasar pablei salih online piah pablei. Ye adei mboh pablei jeng hu. Tuk nan kaya rilo lo yau nan ye adei ba tagok Facebook atau lac darak pasar online piah pablei. Ye mboh rilo urang jeng blei. Nan lac meng nan adei ba akaok caraih pablei angaok darak pasar brei pablei salih meng online.”

Urak ini sang sa-ai Hằng pala labaih 80 tal 100 kong taneh caraih, yaok thun pabak hu jaik 150 tan kaya tamo. Langiu di nan sa-ai daok pambuak pataom blei akaok caraih di mikva dalam bhum. Meng bruk pambuak pablei kaya tui jalan meng dahlau mai haong darak pẩ pablei salih online, yaok harei labik pablei kuhria rah tapa labaih 1,5 tan baoh caraih, tukvak tabung glaong meda hu 2 tan.

"Mayah ba tagok dom darak online ye urang mbuan maong mboh jang. Akaok caraih di darak pasar bhian yaom pablei jeng glaong, daok sang adei pablei tapak meng bein nan yaom gap mbiah jang, urang jeng mbuan blei jang.”

Bruk ngak di sa-ai Hằng daok brei bruk ngak bhian ka rilo urang di bhum palei. Yaok bilan paik, labik caong meng 15 tal 20 urang likei ngak bruk cakac caoh akaok caraih. Ngan haong Nguyễn Thị Kim Mơ hadei rilo thun daok di sang, bruk papaok akaok caraih hu daong sa-ai hu jien mek tame blaoh jeng biak lagaih piah sangka urang dalam sang.

 "Adei tame ini ngak jeng hu 2 bilan blaoh paje. Mboh bruk di ini jeng sahnang glaih, buh akaok caraih tame blaoh papaok min. Mboh jeng tani tanat, jeng jaik sang danaok. Yau Hằng jeng brei kein lagaih ka urang jaik sang hu jien mek tame. Dom anai ngak di ini hu urang pambuak pagam labaih sa thun, hu urang jaik dua thun blaoh paje.”

Daok amuk Ngô Thị Hạnh, jaik sa thun pambuak pagam haong labik hu ba mai ka amuk jien mek tame meng 200 tal 300 ribau dong yaok harei. Urak ini gam pasang saong anek kamei jeng daok ngak bruk di ini:

 "Hu urang nao ngak blaoh thau, urang khan brei ka drei pang blaoh drei likau tame ngak. Meng di nan blaoh drei hu bruk ngak, hu jien mek tame piah cai pandar dalam baoh sang jeng tani tanat. Urak ini praong thun paje oh nao ngak atah hu. Mik Cei jeng daok ngak dalam ini, blaoh anek kamei jeng ngak, baoh sang dahlak jeng ngak di ini.”

Meda mboh lac, gam haong sa-ai Hồ Thị Thúy Hằng, sa urang anek dara ba hatai salih jalan sahaneng ngak mbang, pambuak kaya ngak nong haong darak pasar meng ilamo ngak kong taka so oh lac daong phun caraih palei pala duah hu akaok tabiak karo kajap, blaoh daok peih tabiak jalan patagok bahrau ka kaya nong bhum palei dalam jaman salih lek taka so./.