Meng dom rai mai tal jaman ini, adaoh eirei jeng sa ragam ragu hu adaoh rilo dalam bruk daok dang ilamo bhap bini urang bangsa Randaiy daok di Tay Nguyen. Eirei hu ragam ragu bangi pang, siam gheih, bhian hu adaoh hari khan di dalam rilo urang pataom gauk. Adaoh eirei brei mboh gheih ghang meng bruk mayai ndom sap paoh ngak jeng sa ragam saong phling ragu. Dalam sap bahsa nan, dom kadha adaoh yau dom bruk pambuak talei rohim saong gauk.

Dahlau diah, ragam eirei hu adaoh dalam harei bui sambai me-in halei di urang Randaiy; nyu hu adaoh dalam ndam padhi ye meng hu yava ragu lai tame lac sac kadait ndinh nam. Hadei ini, adaoh tamia bhap bini pachreih hu me-in dom ragam ragu, abih di nyu hu lac tuk adaoh eirei bhian pambuak saong sap kadait ndin nam atau hu urang adaoh tui.

Gam tui sap adaoh eirei jangaih, bangi pang, amuk H Bliư̆ Hwing oh lac sa janih urang naih gheih dalam grauk mbang me-in bui sambai, blaoh daok gaok tal hatai jai dalam dom harei drut druai. Sap adaoh di amuk biak drut druai: meng jamen hia ka urang plang urang matai lahik, tal chreih takre ragam anit ranam gauk, blaoh hatai caong takre padang sa mbuon palei ginup meda. Amuk H Bliư̆ Hwing ndom meyai lac:

“Meng kal mai, ong ame mukkei drei hu caik rai dom ragam ragu adaoh bhap bini yau ye adaoh eirei, adaoh kưt – dom ilamo siam gheih saong hu yaom glaong di bangsa. Khol drei brei iek praong saong khik ramik dom hatai sahaneng nan, oh luai kurang dom bruk siam gheih hu ong ame caik rai yau ye adaoh bhap bini eirei, adaoh kưt, yuk nding nam, nding tut…

Tuk ndom ka ragu adaoh eirei, Amuk H Bliư̆ Hwing brei thau lac:

Eirei bhian hu adaoh tagok dalam dom ndam padhi, piah palao urang plang urang matai lahik. Asal kadha adaoh khan ka raidiuk di urang matai lahik, brei mboh cambaih laih bruk jamen hia saong pandik pandua rilo. Panuac adaoh hu adaoh meng malam tal page, oh tok piah pahadar, bo daok piah ndom tagok dom kadha gheih ghang ka ayut cuai sahabat, meyut meyau, bhum palei, saong caong takre padang bhum palei dak harei dak trei sir, ginup meda.”

 Darah urang ma-in ilamo nghe si hu njom bak dalam hatai jai amuk H Bliư̆ Hwing. Jeng ye rah tapa dom bruk tagok trun di dalam raidiuk, amuk pilih ruah ba tame adaoh dalam yaok ragam ragu, panuac adaoh bhap bini. Dalam bruk adaoh tui sap paoh di amuk H Bliư̆ Hwing brei mboh dom drut druai khang kadang, caong takre sa hatai anit ranam tuk adaoh ka asal kadha uranam.

Adei H’Lana Hwing, umo 12 thun, taco kamei di amuk H’Bliư̆ Hwing, drut druai ndom mayai lac: Yaok mbang amuk peih sap adaoh eirei, ong gilac daok taphia yuk nding nam. Yava ragu ragam danei grauk labik dalam sang. Sa baoh sang adei daok gilac haong gauk pang. Dom tuk yau nan, adei mboh dalam hatai biak la-an bingi. H’Lana brei thau, dom bruk yau nan hu brei ka adei hu hatai anit ranam ragu ragam adaoh bhap bini di bangsa drei.

“Anek biak chreih pang amuk adaoh Eirei. Nyu hu ieu lac sa janih ilamo siam gheih di bangsa Randaiy. Hadei ini adei daok hu bac rilo jang piah thau saong khik ramik ilamo siam gheih ini. Anek brei jak dom ayut cuai sahabat bac haong gauk.”

Sa-ai Y-Novel Hwing, akaok palei Buôn Tu, xa Ea Tul, tinh Dak Lak brei thau, amuk H Bliư̆ Hwing lac sa urang naih gheih dalam bhap bini ka bruk pato, khik ramik ragu adaoh bhap bini siam gheih di bangsa Randaiy.

“Amuk H Ƀliư̆ Hwing tuk halei jeng hu mikva anit ranam kayua hu sap adaoh eirei bangi pang saong gheih ghang. Amuk oh sa janih ieu lac naih joi brei ka sap adaoh bhap bini, blaoh muk daok hu mbaok di dom danak dak ilamo di dom mbon mbon bhum palei. Amuk tuk halei jeng adaoh piah daong prein, rabha saong pambuak pagam mikva dalam grauk tukvak grauk labik”.

Yaom lac thun umo praong, mbuk patih kaok tui thun bilan, min di dalam mata amuk H Ƀliư̆ Hwing jeng brei mboh sa hatai chreih takre haong ilamo bhap bini. Amuk tuk halei jeng susah duh dalam hatai sa ka kadha: ngak yau habar piah dom ragam ragu eirei oh hu kurang dalam raidiuk di jaman urak ini, piah anek taco hadei ini jeng daok hu pang, hu adaoh saong hadah mbaok meta ka halau agha di bangsa drei. Yaok mbang peih sap adaoh, amuk oh lac daok khan sa kadha, blaoh daok payua abih hatai jai di dalam hatian, sa inem krung di rilo rairah urang Randaiy tame kadha adaoh, tame sap nding nam./.