Langiu umo 70 thun, taha palei angan Y Yơng Niê Kdăm, urang daok di mbon palei Ea M’Droh, xa Ea M’Droh, tinh Đắk Lắk, jeng buh abih hatai tian haomg dom bruk ngak haong gauk di mbon palei. Dalam dom var nyaom mbon palei, dom mbang ndom meyai bhian harei, ong bhian kakei mikva khik ramik gul pataom, ngak tui hukum nagar, sangka bruk bac megru di anek kamuan. Tuk dalam bhap bini rah tabiak bruk oh siam haong gauk, ong hu mbaok tame ghak kakei, daong dom baoh sang duah hu sa sap ndom. Sa-ai Y Knap, akaok mbon palei Ea M’Droh brei thau, dom bruk ngak di taha palei lac ilamo hu yaom glaong piah rai rah sit umo bac tangi dalam luac jalan taduan bruk di palei.

“Rup dahlak biak iek praong bruk rik daong di urang taha palei Y Yơng dalam bruk pathau khan bruk gul paataom di mbon palei lac dalam dom bruk pathau khan hukum nagar brei ka raidiuk rahra, asal kadha langyah dom bruk oh siam haong gauk, ba pasiam dalam mbon palei. Ngan haong mikva ye sap ndom di taha palei lac biak hu yaom glaong. Nan jeng lac sa bruk piah dom rai rah sit umo yau khol dahlak bac megru saong ngak tui.”

Mbon palei Ea M’Droh daok hu thau tal haong angan ieu Buôn Cháy, pagam haong dom thun bilan rahra sa hatai tui katmang, mbon palei njauk cuh tayah dalam mesuh metak. Mbon palei urak ini hu jaik 1.300 rahra, jaik abih lac mikva bangsa Randaiy. Meng bhum taneh ciuk rilo khat lahik, Buôn Cháy harei ini hu dom jalan praong laneing lanoi, rilo baoh sang patagok bruk ngak tabiak kophi, dak harei dak pasiam jien mek tame.

Lac urang pagam haong bhum labik katmang meng dahlau, taha palei Y Yơng maong mboh bruk salih di mbon palei hadei harei taneh ia tame sa baoh nagar. Rah tapa rilo labik ngak bruk, taha Y Yơng tuk halei jeng kakei mikva khik ramik bruk gul pataom, gam haong nan sangka jang tal raidiuk urak ini.

“Jak ba mikva dom jalan kuhria, jalan ngak di Ndang saong Karja. Yau harei ini dahlak hulin jak ba mikva mboh hu bruk ngak suan lac drei oh ngak tui, khik ramik adat, raidiuk siam mekre. Meng pagam mai di ini lac jak ba mikva, rilo meng lac uranaih, sangka ka nyu nao bac tui njauk jalan di Ndang saong hukum di Karja.”

Oh lac pandar meng panuac ndom, dom urang taha palei, urang hu angan je di dom mbon palei Dak Lak daok pagam bruk jak ba saong patagok kinh te, pasiam raidiuk. Di palei Phước Tân, xa Tây Sơn, ong La O Lanh, urang bangsa Cam, thun ini umo 74 thun, jeng srap gap ngak mbang saong hu mbaok tame bruk haong gauk. Ong jeng jak ba mikva khik ramik haatai gul pataom, ba pasiam dom bruk oh jhak di gauk dalam bhap bini. Ong La O Lanh ndom lac, khin mikva je tame saong ngak tui ye drei brei ngak kreih camin dahlau, ndom hu saong ngak hu.

“Lac urang hu angan je brei ngak kreih camin, ba akaok ka rahra, dalam bhap bini. Dahlak hulin yaom lac urang praong thun paje min jeng hu mbaok tame ngak bruk piah ngak tabiak kaya kan piah jak ba mikva patruh eik patrun kathaot, kham merat jak ba piah pathau khan mikva ngak tui, gam haong gauk patruh kathaot.”

Đắk Lắk urak ini hu 1.546 palei, mbon, kapul to dan pho gam haong 1.069 urang hu angan je dalam bhap bini. Meng bruk pambuak pagam, thau tanat saong hu thau ka bruk haong mbon palei, kapul ini paglaong bruk gul pataom pambuak karja haong rahra, daong bruk karja palei palei 2 pakat samar drah ngak bruk siam lagaih.