Srap gap tuk padeih kreih pandiak, Trung ta Y Dhăm Byă, Phaok Akaok Kong an xa Quảng Phú, tinh Dak Lak, nduac radaih tame mbon Ea Mắp. Sa-ai duah mai tal sang urang taha palei Y Lưng Êban, urang hu angan je saong jeng lac Akaok Kapul an ninh siam mekre di mbon, piah biai ka bruk ngak, thau ka an ninh trat tu. Labaih sa thun tapa, dom mbang taom gaok yau nan rah tabiak bhian, oh cang tal dom mbang tabung glaong. Taha Y Lưng brei thau: “Sa-ai Y Dhăm pagam haong mbon, njauk ndom lac meng hadei pagam karja saong urak ini karja palei 2 pakat. Sa-ai bhian tame mbon thau ka bruk di mbon, rilo meng lac di labik kapul tui agama, pang bruk di dom labik kapul nan hu njauk hukum halei. Tuk sa-ai pasang iek yau nan ye dahlak jeng nao tui, pambuak langyah saong ghak pachreih bhap bini rahra.”

Meng di dom mbang taom mbaok gaok haong urang taha palei, khau tin ka raidiuk, hatai di rahra hu panduan tal kapul kong an xa. Tuk hu asal kadha tamuh tabiak, urang hu angan je gam haong karja saong kong an labik tapak taom gaok, langyah, jak ba, oh luai dom kan tavak dui suai atah.

Dahlau di ini labaih 7 thun, dom baoh sang hu mbaok tame danak dak aguma oh ka njauk haong adat karja. Kong an Quãng Phú pambuak haong karja, taha palei saong urang hu angan je taom gaok, pathau khan, tacei ba piah rahra thau saong njauk njauk hukum. Labaih 200 urang hadei nan gilac mai ngak bruk aguma tui njauk adat karja.

Muc su Y Nuer Bdap, Dang akaok Hội thánh Lutheran mbon Ea Mắp brei thau, bruk “Hatai je khang kajap – mbon palei karo salamat” daok hu peih ngak dalam mbon, nao tal bruk padang bhap bini tui aguma gul pataom, daok dang siam gheih ka raidiuk saong aguma, ngak njauk adat hukum saong hu mbaok khik ramik an ninh siam mekre.

“Tuk hu Karja mbaoh tangin ye mikva hu bruk ta-eng ka bruk daok dang me-in bruk aguma, oh daok huac kanda. Hadei di bruk ngak tui “Hatai je khang kajap – mbon palei salamat” hu ngak ye raidiuk saong bruk daok dang di mikva tani tanat saong karja haong mikva ye peih hatai jang. Kong an xa, jeng yau kong an tinh ye tuk halei jeng rivang tangi saong dom hội thánh”.

Hadei di pagam, xa Quảng Phú hu 37 palei, mbon hu jaik 62 ribau rahra, dalam nan hu 9 mbon rilo meng lac urang bangsa Randaiy daok rai. Bhum taneh praong, rahra rilo bangsa, bruk ngak adat cambat, aguma rilo ngak ka bruk khik kajap an ninh siam mekre di labik brei ka hu urang jakar thau tanat ka labik bhum saong thau ka raidiuk bhap bini.

Lac sa urang bangsa randaiy, Trung ta Y Dhăm Byă hu kein lagaih ka sap bahsa saong thau ka adat cambat urang bangsa Randaiy. Sa-ai bhian trun yaok palei, mbon, taom gaok rahra piah pang rahra saong duah thau ka bruk kadha. Meng dom khau tin tapak nan, kapul kong an xa meda hu srap gap langyah dom asal kadha tamuh tabiak di mbon palei.

“Glo akaok mikwa sahaneng kuria oh ka ganap tantu, drei brei tacei ba, mbang daok gam haong mikva, ngak bruk haong mikva piah ka mikva thau hu ka jalan di Ndang, di Karja. Tuk rahra thau blaoh paje ye rahra ngak njauk tui adat. Tapa dom taha palei, muc su hu prein hu angan, langyah ka yaok baoh sang rahra.”

Di dom mbon palei drap ilamo, adat cambat, khik salamat mai meng bruk jaik taphia saong njauk je tame. Tui Trung ta Y Dhăm Byă, nan lac dom mbang trun mbon palei, taom gaok urang taha palei, urang hu angan je, pang rahra piah dil samu thau tanat saong taoh talaih dom asal kadha meng labik. Thaik thaot urang jakar srap gap tukvak padeih pandiak duah mai tal sang taha palei jeng yau lac sa bruk bac megru saong ngak tui Wa Ho: jaik rahra, jaik labik, piah khik salamat karo kajap meng yaok mbon palei./.