Meng bilan 10/2023, Pasak Khik ramik inem mek pakat negar di Con Dao (Ba Ria – Vung Tau klak), Ban raya Ho Chi Minh peih bruk “Kadung bai kaya adat hijao”, jak ba mikva saong tuai damuai patakik, pamaong tal bruk oh daok cuh harak bi-ar, salih meng bangu that, baoh kayau saong dom kaya siam mekre haong alam langik.

Meng tuk camreip, bruk ini hu peih ngak yaok adit ngan haong angan “harei Sanecar kadung bai kaya adat hijao”, hadei nan peih praong jeng “Adit kadung kaya adat hijao” saong tal akaok thun 2025 hu peih ngak samu di dom labik inem mek dalam bhum taneh.

Tui dom baoh sang ngak mbang pablei salih jitvu ngak adat di kaoh pulao Con Dao, tuk akaok meti ye duh hatai ka bruk ngak bahrau ngak kan kandah tal bruk pablei salih. Min biak nao, dak harei dak hu tuai damuai srap gap ruah “Kadung bai kaya adat hijao” salih ka bruk cuh bi-ar ja ameh.

Sa-ai kamei Đinh Mai Hương, tuai dmauai mai meng Ban ine Ha Noi mboh katuak drei tuk nao tal Kubo Hàng Dương saong mboh jaik abih rahra jeng duh paling meng bangu that, baoh kayau dalam bruk praong prang, hacih sa-at.

"Dahlak hulin mboh bruk duh paling arwah yau ini lac biak siam mekre, oh lac duh ka alam langik hacih hijao di Con Dao blaoh hatai di urang nao ngak adat jeng mboh biak sahnang sron mbon dalam hatai tuk hu ngak adat yau nan, brei mboh hatai duh paling tal dom urang bijak, bol lin."

Gam tui di nan, baoh kayau hadei duh paling mbuan bluk, oh daok mbang hu ye brei ka dom baoh sang raong glang piah ngak kaya mbang ka athur raong atau ngak tui jalan hareik harom huu co di labik.

Sa-ai kamei Trần Thị Mỹ Xuân, labik rahra ka 1, urang daok di pulao Con Dao brei thau, baoh sang daok pandar halau baoh kayau bluk bram, oh mbang hu… meng dom labik inem mek piah ngak jeng kaya mbang ka dom anek athur raong, menuk ada labaih 1.500 drei. Dahlau diah hu rilo baoh kayau klak nao mboh biak palai, urak ini urang raong glang hu halau kaya mbang meng di urang duh paling nan patakik hu rilo ka jien buh tabiak ka kaya mbang dalam raong glang:

"Bruk pandar baoh kayau meng kubo Hàng Dương mai ngak kaya mbang dalam raong glang hu patakik jien buh tabiak ka baoh sang, khik tani tanat bruk ngak mbang. Meng bruk pandar dom kaya mbang dalam raong glang hu daong ka khol dahlak hulin hu daong prein patagok kinh te baoh sang."

Tui Muyim – Patapuk Ba Ria-Vung Tau, labik daok pasang iek Kubo Hàng Dương, yaok harei hu 3 mbang daok iek urang duh paling, kuhria rah tapa yaok mbang hu labaih 400kg baoh kayau hu rilo ahar di tuai damuai, urang duh paling. Dom kaya ini hu langyah tui yaok kapul piah patakik abih bruk palai jamen.

Tal ini bruk ngak “Kadung bai kaya adat hijao” di Kubo Hàng Dương saong dom labik duh paling yang dalam bhum urak ini mek hu labaih 98%. Hu makna abih jang, bruk ini hu daong salih ilamo di bhap bini tui jalan siam mekre, gheih ghang haong alam langik saong patakik bruk palai dalam dom bruk di angaok kaoh pulao. Amuk Phạm Thị Tám, Phaok Akaok Gilang khik drap ar-Gilang tapuk Ba Ria-Vung Tau brei thau:

"Tal ini, bruk ngak kinh te payeng vil tapa jalan ngak “kadung bai kaya adat hijao” lac sa bruk jak jeng biak praong ngan haong pulau Con Dao. Ini lac bruk daong ka Con Dao dak harei dak siam jang, gheih ghang jang, alam langik hacih sa-at jang… piah dui pachreih tuai damuai dak harei dak sahang hatai jang tuk mai tal Con Dao."

Danak dak “lac oh” haong cuh harak bi-ar saong kaya katak pandar sa mbang hu ngak ka labik inem mek, Kubo Hàng Dương jeng laneing lanoi, hacih sa-at jang, oh daok mbau thak saong bau harak bi-ar yau dahlau. Dom salih sit meng bruk randap di tuai damuai, rahra hu ngak jeng bruk salih praong ka alam langik, ka bhap bini saong brei mbaok meta di pulao Con Dao./.