Tui ong Trịnh Bá Dũng, Phaok Akaok Kapul Jirah rivang Hai Phong, tuk mblang kapal ahaok par Long Thanh tame peih ngak, tuai damuai meng Ban raya Ho Chi Minh, gah Pei negar saong dunya tuh mai lac biak rilo. Bruk hu makna lac bhum palei brei hu ndap nda kaya hu ginup bruk dui pachreih piah pablei ka tuai damuai. Dong Nai daok hu rilo “asar intan” yau ye: Glai dauk dalam ia mbak, Bein pakat negar Cát Tiên, danao Trị An, jirah rivang jalan tapen kraong… min bruk pandar daok oh ka lagaih, kurang jitvu tani tanat. Kadha katih kuhria biak di abih urak ini lac bhum palei brei pataom tame bhum pasak vil mblang kapal ahaok par, hu camreip meng jirah rivang sinh thai, ilamo, kaya mbang ndung bak ilamo bhum palei.

Daok ong Nguyễn Mạnh Thản, Akaok Kapul Jirah rivang ban ine Ha Noi, ndom lac dalam tuk camreip, Dong Nai oh ka nduac tui pakat glaong blaoh daok brei thau tani tanat ka darak pasar. Dom bruk jirah rivang hacih hijao, jirah rivang bhap bini, ba drei tame saong sangka prein yava daok lac bruk hu ngak rilo brei hu pataom tame pandar. Piah dui pachreih phun jien praong, Dong Nai brei padang labik buh jien tame biak siam mekre: " Urak ini ndap nda kaya jirah rivang hu rah tabiak ye daong prein ka bhap bini pasiam veik bruk ngak lagaih. Daok dom danak dak praong, brei mboh ngak jeng labik padeih, labik mai tal hu angan je ye Dong Nai brei pataom tame piah daong prein ka adei sa-ai ngak mbang pablei salih. Abih di nyu nan lac taoh talaih kan kandah, rilo meng lac asal kadha hu pambuak tal mbaok taneh, taneh riya jeng yau nan"

Maong meng gah brei mboh ka angan je, ong Huỳnh Quốc Thắng, Phaok Akaok Kapul Jirah rivang Ban raya Ho Chi Minh ndom lac, bruk cakrok samar di jirah rivang Dong Nai brei samu haong bruk kinh te di bhum palei. Bruk ini brei ka hu bruk kong nghiep glaong, pandar ilamo khoa hoc – kong nghe ngak bruk tani tanat, tui pakat dunya: "Dong Nai ieu lac sa bhum taneh hu labik biak gheih dalam sajarah – ilamo gam haong kinh te – xa hoi di Meraong Negar. Min, dalam caong khin ka labik dang bahrau, di ban raya dalam Trung Uong saong hu kein lagaih lac mblang kapal ahaok par Long Thanh, patagok jirah rivang brei ka hu patagok siam jang veik ka urang ngak, drap ar langik tasik, ilamo. Abih di nyu nan lac dom bruk pambuak piah hu kein lagaih ngak bruk “peih chiaok par meng prein di drei – tabiak atah meng ilamo” mek hu tanut dunya."

Mboh cambaih laih brei ka bruk ngak capat samar drah ini, ong Lê Trường Sơn-Phaok Akaok UB Bhap bini Ban raya Dong Nai, ndom lac bruk padang ndap nda kaya, brei mboh ka labik mai tal saong bruk pambuak angan je lac bruk blaoh Dong Nai brei mek tangin tame ngak samar saong ngak catang. Dom jabat pasang iek karja oh lac dang di langiu bo brei pambuak, ndom meyai, gaok mai padang dom paok daong gah ngak mbang pablei salih ngak tabiak ndap nda kaya bahrau: "Urak ini oh meda cang hu, oh ngak rah rah hu, caong khin bruk ngak dalam tukvak bahrau ba tabiak biak samar chip. Jalan ngak bruk brei karei saong haong hatai di sa bhum palei hu bruk kinh te, rahra dalam Top akaok, khol dahlak brei ngak catang jang veik."

Dong Nai daok yam tame bruk patagok bahrau gam saong dom bruk salih karei ka ha tang saong ngak ban medin. Bruk ini ba tabiak caong khin bruk daok rai: Gah jirah rivang brei ka hu salih drei meng tuk ini piah oh klak tapa kein lagaih sajarah meng mblang kapal ahaok par Long Thanh./.